ޕާކިސްތާނުގެ ސަރުކާރަށް ފާޑުކިޔާ މަގްބޫލް ޓީވީ ސްޓޭޝަނަކުން "ބައިބައިވުން އުފެދޭ" ކޮންޓެންޓް ދައްކާ ކަމަށް ބުނެ، އެ ޗެނަލް ބަންދުކޮށްފި އެވެ.
އަރީ ނިއުސްގެ ނައިބު ރައީސް އައްމަދު ޔޫސަފް ވިދާޅުވީ އެއީ "ގާނޫނާ ހިލާފު" ނިންމުމެއް ކަމަށެވެ. އެ ނިންމުން ކޯޓަށް ގެންދާނެ ކަމަށް އޭނާ ވިދާޅުވި އެވެ.
ޕާކިސްތާން އިލެކްޓްރޯނިކް މީޑިއާ ރެގިއުލޭޓަރީ އޮތޯރިޓީއިން ނެރުނު ނޯޓިސްގައި ބުނީ އެ ޗެނަލުން ދައްކާ "ބައިބައިވުން އުފެދޭ" ކޮންޓެންޓާ ހެދި ޗެނަލް ހިންގުމުގެ މަގްސަދާ މެދު ކަންބޮޑުވުންތައް ގިނަ ކަމަށެވެ.
ޗެނަލް ބަންދު ކުރުމަށް ފަހު، ޗެނަަލްގެ ސީއީއޯ ބުދަ ދުވަހު އެ އޮތޯރިޓީއަށް ހާޒިރުވުމަށް ވެސް އެންގި އެވެ. އަރީ ނިއުސްއަކީ ޕާކިސްތާނުގެ އެންމެ ބޮޑު އެއް ޕްރައިވެޓް ޗެނަލެވެ.
އެއީ ކުރީގެ ބޮޑު ވަޒީރު އިމްރާން ހާންއަށް ތާއީދު ކުރާ ޗެނަލެކެވެ. އިމްރާންގެ ޕާޓީގެ އޮފިޝަލަކު އެ ޗެނަލްގައި ދާދި ފަހުން ދެއްކި ވާހަކަތަކެއް ނޯޓިސްގައި ފާހަގަކުރި އެވެ.
އެގޮތުން ޝަހްބާޒް ގިލް ދެއްކި ވާހަަކަތަކަކީ ސިފައިންގެ ތެރޭގައި ހަމަނުޖެހުން އުފެދި، ބައިބައިވުމަށް މަގުފަހިވާ ވާހަކަތަކެއް ކަމަށް ބުންޏެވެ.
މިދިޔަ އަންގާރަ ދުވަހު އިސްލާމްއާބާދުން ގިލް ހައްޔަރުކޮށްފައިވާ އިރު، އިމްރާން ހާން ކުރެއްވި ޓްވީޓެއްގައި ވިދާޅުވީ އޭނާ ވީނުވީ ތަނެއް ނޭނގޭ ކަމަށާއި އެއީ ރަހީނު ކުރުން ކަމަށެވެ.
އިންޓީރިއާ މިނިސްޓަރު ރަނާ ސަނާއުﷲ ވަނީ ގިލް ހައްޔަރު ކުރިކަން ކަށަވަރުކޮށްދެއްވާފަ އެވެ. އޭނާއަށް ވެސް ތުހުމަތު ކުރަނީ ބައިބައިވުމަށް ހިތްވަރު ދިން ކަމަށެވެ.
