ބަންގްލަދޭޝްގައި ތިބި ރޮހިންޔާ ރެފިއުޖީން އަނބުރާ މިޔަންމާއަށް ފޮނުވުމުގަައި ޗައިނާގެ އެހީތެރިކަމަށް އެދެފި އެވެ.
އެކަމަށް އެދުނީ ޗައިނާގެ ފޮރިން މިނިސްޓަރު ވާންގް ޔީ ބަންގްލަދޭޝަށް ކުރެއްވި ދަަތުރެއްގަ އެވެ. މީގެ ކުރިން 2017 ވަނަ އަހަރު ވެސް ޗައިނާ މެދުވެރިވެގެން 700،000 ރޮހިންޔާ ރެފިއުޖީން އަނބުރާ މިޔަންމާއަށް ފޮނުވޭނެ ގޮތް ހެދި އެވެ.
އެހެން ނަމަވެސް، މިޔަންމާގައި ރެފިއުޖީންނާ މެދު ލާއިންސާނީ އަމަލު ހިންގާނެ ކަމަށް ބެލެވޭތީ، އެ މީހުން އެނބުރި ދާން ދެކޮޅު ހެދި އެވެ.
ހޮނިހިރު ދުވަހު ދާކާއަށް ވަޑައިގެންނެވި ޔީ ވަނީ ބޮޑު ވަޒީރު ޝެއިހް ހަސީނާ އާއި ފޮރިން މިނިސްޓަރު އޭކޭ އަބްދުލް މޮމެންއާ ބައްދަލުކުރައްވާފަ އެވެ.
އާދީއްތަ ދުވަހު ޔީ ފުރާވަޑައިގެންނެވުމުގެ ކުރިން ދެ ގައުމުގެ ގުޅުމާއި ބައިނަލްއަގްވާމީ މައްސަލަތަކާ ގުޅޭ ގޮތުން މަޝްވަރާ ކުރެއްވި އެވެ.
ބަންގްލަދޭޝް އާއި ޗައިނާއާ ދެމެދު ގާތް ގުޅުމެއް އޮވެ އެވެ. އެހެން ނަމަވެސް، އިންޑިއާ އާއި އެމެރިކާއާ ވެސް ގާތް ގުޅުމެއް ބާއްވަން ޖެހޭތީ، ގުޅުންތައް ބެލެންސް ކުރުމުގެ ގޮންޖެހުން ބަންގްލަދޭޝަށް ވެސް ދިމާވެ އެވެ.
ބަންގްލަދޭޝްގައި ޗައިނާގެ 500 އަށް ވުރެ ގިނަ ކުންފުނި ހަރަކާތްތެރިވެ އެވެ. ބަންގްލަދޭޝްގެ އެންމެ ބޮޑު ޕްރޮޖެކްޓްތަަކުގައި ޗައިނާގެ ބައިވެރިވުން ހިމެނޭ އިރު، ދާދި ފަހުން ވަނީ 3.6 ބިލިއަން ޑޮލަރު ހޭދަކޮށްގެން އެ ގައުމުގެ އެންމެ ބޮޑު ބްރިޖް ޕަޑްމާ ކޯރު މަތިން އަޅަން އެހީވެދީފަ އެވެ.
