"މީސް މީޑިއާ" ގެ ނަމުގައި ހިންގާ ފޭސްބުކް ޕޭޖާއި ވެބްސައިޓުން ދިވެހި ނޫސްތަކުގެ ކޮންޓެންޓް ހުއްދަ ނެތި ވިޔަފާރި އުސޫލުން ބޭނުންކުރާ މައްސަލަ ޕޮލިހަށް ހުށަހަޅަން މޯލްޑިވްސް މީޑިއާ ކައުންސިލުން ނިންމައިފި އެވެ.
މީޑިއާ ކައުންސިލްގެ ރައީސް މުހައްމަދު ޝަފާއު ވިދާޅުވީ އެ މައްސަލަ ކައުންސިލުން ބެލީ އަމިއްލަ އިސް ނެގުމަށް ކަމަށާއި ފުލުހުންނަށް މިއަދު މައްސަލަ ފޮނުވާނެ ކަމަށެވެ.
"ހުއްދަ ނެތި ނޫސްތަކުގެ ފިކުރީ މުދާ އެ ޕޭޖުން ބޭނުން ކުރަމުން އެބަދޭ. ނޫސްތަކުގެ ލިޔުންތަކުގެ ކުޑަ ތަންކޮޅެއް ފެންނަ ގޮތް ހަދާފައިވާއިރު، އިތުރަށް ކިޔާލަން ފައިސާ ދައްކަން ޖެހޭ. އެހެންވެ މައްސަލަ ކައުންސިލުން ބެލުމަށް ފަހު ޕޮލިހަށް ފޮނުވަން މި ނިންމީ އިއްޔެގެ ބައްދަލުވުމުން،" ޝަފާއު ވިދާޅުވި އެވެ.
"މީސް މީޑިއާ" ވެބްސައިޓްގައި ގިނަ ނޫސްތަކެއްގެ ކޮންޓެންޓް ހިމަނާފައިވެ އެވެ. ނޫސްތަކުގެ ލިޔުންތައް އެ ވެބްސައިޓުން ކިޔާލަން މަހަކަށް 30ރ. ދައްކަންޖެހެ އެވެ. އެ ފައިސާ ޓްރާންސްފާ ކުރަންޖެހޭ އެކައުންޓް ނަންބަރު ވެސް ވެބްސައިޓްގައި ޖަހާފައިވެ އެވެ.
އެ އެކައުންޓް ނަންބަރަކީ ވިޔަފާރިއެއްގެ އެކައުންޓް ނަންބަރު ނޫން ކަމަށާއި އަމިއްލަ މީހެއްގެ އެކައުންޓެއް ކަމަށް ޝަފާއު ވިދާޅުވި އެވެ.
ކޮޕީރައިޓާއި އެއާގުޅޭ އެހެނިހެން ހައްގުތަކުގެ ގާނޫނުގެ ދަށުން މަޒުމޫނާއި އަދި އެނޫންވެސް ލިޔުންތައް އެ އުފެއްދި މީހެއްގެ ހުއްދަ ނެތި ބޭނުން ކުރުމަކީ ޖިނާއީ ކުށެއްގެ ގޮތުގައި ބެލިދާނެ އެވެ. އެ ކުށުގެ އަދަބަކީ 50,000ރ. އާއި 300,000ރ. ދެމެދުގެ އަދަދަކުން ޖޫރިމަނާކުރުމެވެ.
ގާނޫނުގައި ބުނެފައިވާ ގޮތުން ޖޫރިމަނާގެ އަދަދު ކަނޑައަޅާނީ ހިމާޔަތްކުރެވިފައިވާ ހައްގެއްގެ ވެރިފަރާތަށް ލިބިފައިވާ ނުވަތަ ލިބޭނެ ގެއްލުމެއްގެ މައްޗަށް ބިނާކޮށްގެންނެވެ.
ޖިނާއީ ކުށުގެ އަދަބުގެ އިތުރުން، މަދަނީ ބަދަލު ހޯދުމަށް ދައުވާކުރުމުގެ ހައްގު ވެސް އެ ލިޔުމެއްގެ ހައްގުތައް ލިބިގެންވާ ފަރާތަށް އޮންނާނެ ކަމަށް އެ ގާނޫނުގައި ބުނެފައި އޮވެ އެވެ.
ކޮޕީރައިޓާއި އެއާގުޅޭ އެހެނިހެން ހައްގުތަކުގެ ގާނޫނަކީ 2010 ވަނަ އަހަރު އަމަލުކުރަން ފެށި ގާނޫނެކެވެ.
