ޓީޗަރުންނަށް ލައިސަންސެއް ދޫކުރުމާ ގުޅޭ ހުރިހާ ލިޔެކިޔުންތައް މިހާރު ނިމިފައިވާ ކަމަށާއި، މި އަހަރުގެ ތެރޭ އެކަމުގެ އަމަލީ މަސައްކަތް ފެށޭނެ ކަމަށް އެޑިއުކޭޝަން މިނިސްޓަރު އައިޝަތު އަލީ ވިދާޅުވެއްޖެ އެވެ.
މަތީ ތައުލީމުގެ ނިޒާމަށް އިތުރު ބަދަލުތަކެއް ހުށަހަޅައި "މަތީ ތައުލީމާބެހޭ ބިލު"ގައި ޓީޗަރުކަން ކުރުމަށް ހާއްސަ ލައިސަންސެއް ދޫކުރަން ޖެހޭ ގޮތަށް ވަނީ ފާސްކޮށްފަ އެވެ.
ދިރާސީ އާ އަހަރު މިއަދު ފެށުމުގެ މުނާސަބަތުގައި އަމީނިއްޔާ ސްކޫލުގައި ބޭއްވި ރަސްމިއްޔާތެއްގައި ވާހަކަ ދައްކަވަމުން މިނިސްޓަރު ވިދާޅުވީ މުދައްރިސުންނަށް ކިޔަވައިދިނުމުގެ ލައިސަންސު ދޫކުރުމަކީ ތައުލީމީ ދާއިރާގެ ފެންވަރު ރަނގަޅުކުރުމަށް އެޅޭނެ އެންމެ މުހިންމު ފިޔަވަޅު ކަމަށެވެ.
"މިކަމުގެ ނަތީޖާއެއްގެ ގޮތުން، އުންމީދު ކުރަނީ، ޓީޗަރުން ކަމުގެ ތައުލީމު ހަރުދަނާވެ، ހުނަރުވެރި، އަބުރުވެރި ޓީޗަރުން ކުރިމަގުގައި ލިބޭނެކަމަށް" މިނިސްޓަރު ވިދާޅުވި އެވެ.
ތައުލީމީ އާ ގާނޫނަށް އަމަލުކުރަން ފެށިތާ އަހަރެއް ފުރެން ގާތްވެފައިވާއިރު، އެ ގާނޫނާ ގުޅިގެން ހަދަންޖެހޭ ހުރިހާ ގަވާއިދެއް މިހާރު ހަދާ ނިމިފައިވާ ކަމަށާއި މި އަހަރު އެ ގަވާއިދުތައް ތަންފީޒުކުރަން ފެށޭނެ ކަމަށް ވެސް އެޑިއުކޭޝަން މިނިސްޓަރު ވިދާޅުވި އެވެ.
"އާ ގާނޫނުން އެންމެ ބޮޑު އިސްކަމެއް ދެނީ ދަރިވަރުންގެ ރައްކާތެރި ކަމަށް. އެހެން ކަމުން ދަރިވަރުންނާ ބައްދަލުވާ އެންމެން ވެސް އެ ކަމަށް ސަމާލުކަން ދޭން ޖެހޭ،" މިނިސްޓަރު ވިދާޅުވި އެވެ.
މިހާރު އޮންނަ ގަވައިިދުގެ ދަށުން އެއްވެސް ޓީޗަރަކަށް ވަކި ލައިސަންސެއް ދޫކޮށްފައެެއް ނޯވެ އެވެ. ޓީޗަރުން ރަޖިސްޓްރީ ކޮށްފައި ތިބެނީ އެޑިއުކޭޝަން މިނިސްޓްރީގަ އެވެ. އެއްވެސް ޓިއުޝަން ސެންޓަރަކުން ނުވަތަ ކްލާހެއްގެ ޓީޗަރަކުވެސް އެކަން ކުރަމުންދަނީ ރަޖިސްޓްރީ ކޮށްގެން ނޫނެވެ.
"ތައުލީމުގެ ބިލް" އާއެކު، ސްކޫލުތަކުގައި ކިޔަވައިދޭ ޓީޗަރުންގެ އިތުރުން އެ ނޫން ވެސް ތަނެއްގައި ކިޔަވައިދޭނަމަ ރަޖިސްޓްރީކުރުން މަޖުބޫރުވާނެ އެވެ.
ތައުލީމު ގާނޫނުގެ ދަށުން އުފައްދަން ޖެހޭ "ޓީޗާސް ރަޖިސްޓްރޭޝަން ބޯޑު" އެކުލަވާލައިފައި ވަނީ މިދިޔަ އަހަރު އެވެ.
ޓީޗާސް ރަޖިސްޓްރޭޝަން ބޯޑުގައި ހިމެނޭ މެންބަރުން:
- ރަޖިސްޓްރާ: އާއިޝަތު އަތިޔާ ނަސީރު، މިނިސްޓާ އޮފް ސްޓޭޓް ފޯ އެޑިޔުކޭޝަން
- އެޑިޔުކޭޝަނަލް މެނޭޖްމަންޓް ދާއިރާ ނުވަތަ ތައުލީމީ ސިޔާސަތުގެ ދާއިރާ: ނަހުޒާ ޝަރީފް، އެޑިޔުކޭޝަން އޮފިސާ
- ކިޔަވައިދިނުމުގެ ދާއިރާ: ޔުސްރާ މުރާދު، އެޑިޔުކޭޝަން އޮފިސާ
- ތައުލީމީ މަންހަޖު އެކުލަވާލުމުގެ ދާއިރާ: އާމިނަތު މުހައްމަދު، އެޑިޔުކޭޝަން ޑިވެލޮޕްމަންޓް އޮފިސާ ކޯޑިނޭޓަރު
- ޗައިލްޑް ސައިކޮލޮޖީ ނުވަތަ އެޑިޔުކޭޝަނަލް ސައިކޮލޮޖީގެ ދާއިރާ: ފައުޒިއްޔާ އަލީ، އެޑިޔުކޭޝަން އޮފިސާ
