ޕެރިސް (އޮގަސްޓް 2)) ވޭލްސްގެ ތަޖުރިބާކާރު މިޑްފީލްޑަރު އާރޮން ރަމްސޭ ފްރާންސް ލީގުގައި ވާދަކުރާ ނީސް އަށް ސޮއިކޮށްފި އެވެ.
ރަމްސޭ ،31، ނީސްއާ މި ގުޅުނުއިރު، އިޓަލީގެ ޔުވެންޓަސްއާ އެކު އޭނާ ހަދާފައިވާ ކޮންޓުރެކްޓްގައި ބާކީ އެއް އަހަރު އޮއްވައި، އޭނާ ވަނީ މިދިޔަ ހަފުތާގައި އުވާލައިފަ އެވެ.
އާސެނަލްގައި ގާތްގަނޑަކަށް އަށް އަހަރު ހޭދަކުރުމަށް ފަހު، ހިލޭ ޓްރާންސްފާއެއްގައި ރަމްސޭ ޔުވެންޓަސްއާ ގުޅުނީ 2019 ވަނަ އަހަރެވެ. ޔުވެންޓަސްގައި ހޭދަކުރި ފުރަތަމަ ސީޒަންގައި އޭނާ ވަނީ އެ ކްލަބާ އެކު އިޓާލިއަން ލީގު ކާމިޔާބުކޮށްފަ އެވެ.
އެކަމަކު، ޔުވެންޓަސްގައި ރަމްސޭ އަށް ފުރުސަތުތައް ހޯދުމަށް އުނދަގޫވި އެވެ. މިދިޔަ ސީޒަންގައި ވެސް އޭނާ އެެ ޓީމަށް ކުޅުނީ ފަސް މެޗެވެ. ސީޒަންގެ ފަހު ބައި އޭނާ ލޯނު އެއްބަސްވުމެއްގައި ކުޅުނީ ސްކޮޓްލެންޑްގެ ރޭންޖާސް އަށެވެ. ރޭންޖާސް އިން ރަމްސޭގެ ލޯން ޑީލް ދާއިމީ ކުރަން ބޭނުންނުވި އެވެ.
މީޑިއާ ރިޕޯޓްތަކުން ބުނާގޮތުގައި، ރަމްސީ ވަނީ ނީސްއާ އެކު އެއް އަހަރު ދުވަހުގެ އެއްބަސްވުމެއް ހަދައިފަ އެވެ.
ނީސް އަށް ރަމްސޭ ސޮއިކުރިއިރު، އިނގިރޭސި ޕްރިމިއާ ލީގުގެ ނޮޓިންހަމް ފޮރެސްޓުން އޭނާ ގެންދަން ޝައުގުވެރިވާ ކަމަށް އަޑުފެތުރުނެވެ. އަދި ވޭލްސްގެ ކާޑިފް އާއި ޖަރުމަނުގެ ބައެއް ކްލަބްތަކުން ވެސް ރަމްސޭ އަށް ކޮންޓްރެކްޓް ހުށަހެޅި އެވެ.
