ރައީސް އޮފީހުގެ ކޮމިއުނިކޭޝަންސް އޮފީހުގެ ހިންގުން އެ އޮފީހުގެ އަންޑަސެކެޓަރީ މުހައްމަދު ހިސާން އަލީ ފަހުމީއާ ހަވާލުކޮށްފި އެވެ.
މީގެ ކުރިން ކޮމިއުނިކޭޝަންސް އޮފީސް ހިންގަމުން އައީ ޗީފް ކޮމިއުނިކޭޝަންސް ސްޓްރެޓަޖިސްޓް އިބްރާހިމް ހޫދުގެ ބެއްލެވުމުގެ ދަށުންނެވެ.
ރައީސް އޮފީހުގެ މީޑިއާ ގުރޫޕަށް ހޫދު މިއަދު ފޮނުއްވި މެސެޖެއްގައި ވިދާޅުވީ މިއަދުން ފެށިގެން ކޮމިއުނިކޭޝަންސް އޮފީސް ހިންގުން ހިސާންއާ ހަވާލުކޮށްފައިވާ ކަމަށެވެ. އަދި އޭނާ މީގެފަހުން ހާއްސަ ވާނީ ރައީސް އޮފީހުގެ ފޮރިން ރިލޭޝަން އޮފީހުގެ މަސައްކަތްތަކުގައި ކަމަށް ހޫދު ވިދާޅުވި އެވެ.
ކޮމިއުނިކޭޝަންސް ހެޑްގެ މަގާމާ ހަވާލުވި ހިސާން, ރައީސް އޮފީހާ ގުޅިވަޑައިގަތީ 2019 ވަނަ އަހަރުގެ ތެރޭގަ އެވެ. އޭގެ ކުރިން އޭނާ ވަނީ ދިރާގުގެ މާކެޓިން ޑިޕާޓްމަންޓުގައި ވެސް މަސައްކަތް ކުރައްވާފަ އެވެ.
ކޮމިއުނިކޭޝަންސް އޮފީހުގެ ވެރިއަކަށް ހޫދު ހަމަޖެއްސެވީ މިދިޔަ އަހަރުގެ ޖެނުއަރީ މަހުގެ ތެރޭގަ އެވެ. އެއީ އެ މަގާމުގައި ހުންނެވި ހަސަން އިސްމާއިލު މަގާމުން އިސްތިއުފާ ދެއްވުމާ ގުޅިގެންނެވެ.
އެ އޮފީހުގެ ވެރިއަކަށް ހޫދު އައްޔަން ކުރެއްވުމުގެ ކުރިން އޭނާ ހުންނެވީ ރައީސް އޮފީހުގެ ތަރުޖަމާނަކަށެވެ. މިހާރު ރައީސް އޮފީހުގެ ތަރުޖަމާނަކަށް ހުންނަވަނީ މުހައްމަދު މަބްރޫކް އަޒީޒެވެ.
