ޖަރުމަނުވިލާތުގެ ކުރީގެ ނާޒީ ޑިކްޓޭޓަރު އެޑޯލްފް ހިޓްލަރުގެ އަތުކުރީ ގަޑިއެއް އެމެރިކާގައި 1.1 މިލިއަން ޑޮލަރަށް ވިއްކާލައިފި އެވެ.
ހިޔުބާ ބްރޭންޑުގެ އެ ގަޑިއަށް 1.1 މިލިއަން ޑޮލަރު ހުށަަހެޅި ފަރާތުގެ ވަނަވަރު ހާމަކޮށްފައެއް ނުވެ އެވެ. އެ ގަޑީގައި ސްވާސްޓިކާ ލޯގޯ އާއި އެޑޯލްފް ހިޓްލަރުގެ ނަމުގެ ދެ އަކުރު ކަނޑާފައިވެ އެވެ.
އެލެގްޒެންޑާ ހިސްޓޮރިކަލް އޯކްޝަންސްއިން އެ ގަޑީގެ ނީލަން ހުޅުވާލުމާ އެކު ޔަހޫދީ ލީޑަރުން ވަނީ އެ ނިންމުން ކުށްވެރިކޮށްފަ އެވެ.
އެކަމަކު މީގެ ކުރިން ވެސް ނާޒީންނާ ގުޅޭ ތާރީހީ ތަކެތި ވިއްކާފައިވާ އެ އޯކަޝަން ހައުސްއިން ބުނީ މަގްސަދަކީ ތާރީހު ރައްކާތެރި ކުރުން ކަމަށެވެ.
ނީލަމުގައި ވިއްކާލި ހިޓްލަރުގެ ގަޑި.
އެޑޯލްފް ހިޓްލަަރު 1933 އިން 1945 އަށް ޖަރުމަނުގައި ވެރިކން ކުރެއްވި އިރު، 11 މިލިއަން މީހުން މެރި އެވެ. އޭގެ ތެރެއިން ހަ މިލިއަން މީހުން މެރީ ޔަަހޫދީންނަށް ވާތީ އެވެ.
ގަޑީގެ ކެޓެލޯގްގައިވާ ގޮތުން ބެލެވޭ ގޮތުގައު އެއީ 1933 ވަނަ އަހަރު ހިޓްލަރުގެ އުފަން ދުވަހަށް ލިބުނު ހަދިޔާއެކެވެ. ޖަރުމަނުގެ ޗާންސެލަރު ކަމަށް ހިޓްލަަރި އައީ އެ އަހަރު އެވެ.
އެ ގަޑި ގެންދިޔައީ މޭ 1945 ވަނަ އަހަަރު ފަރުބަދަ މަތީގައި ހުންނަ ހިޓްލަރުގެ ބެރްގޯފް ގެ ބަލައި ފާސްކުރި 30 ފްރާންސް ސިފައިންގެ ތެރެއިން މީހެކެވެ.
އޭގެ ފަހުން ގަޑި ވިއްކާލައި، އެއް ޖީލުން އަނެއް ޖީލަށް ބަދަލުވަމުން ގޮސް، ނީލަމާ ހަމައަށް ފޯރީ ކަމަށް ބެލެވެ އެވެ.
ނީލަމުގައި ވިއްކާލި އެހެން ބައެއް ތަކެތީގެ ތެރޭގައި ހިޓްލަރުގެ އަނބިކަނބަލުން އީވާ ބްރައުންގެ ހެދުމަކާއި ނާޒީ އޮފިޝަލުން ސޮއިކޮށްފައިވާ ފޮޓޯތައް ހިމެނެ އެވެ.
