ކޮވިޑް ބަލި އެންމެ ފުރަތަމަ ފެނުނު ޗައިނާގެ ވޫހާން ސިޓީގެ ހިސާބަކުން އެ ބަލީގެ ހަތަރު ކޭސް ފެނުމުން މިލިއަަނެއްހާ މީހުން ލޮކްޑައުންކޮށްފި އެވެ.
ޖިއަންގްޒިއާ ޑިސްޓްރިކްޓުގެ ރައްޔިތުން ގެއިން ނުނިކުމެ ތިބުމަށް އަންގާފައިވާ އިރު، އެ ތަނުން ރިޕޯޓު ކުރި ހަތަރު ކޭސްގައި ހިމެނޭ މީހުންގެ ފަރާތުން ބަލީގެ އެއްވެސް އަލާމާތެއް ނުފެނެ އެވެ.
ބާރަ މިލިއަން މީހުން ދިރިއުޅޭ ވޫހާންގައި ގަވާއިދުން ކޮވިޑަަށް ޓެސްޓު ކުރަަމުން ދަނިކޮށް، އެއްވެސް އަލާމާތެއް ނެތް ދެ މީހަކު ޕޮޒިޓިވްވީ މީގެ ދެ ދުވަސް ކުރިންނެވެ.
ކޮންޓެކްޓް ޓްރޭސް ކުރުމުގެ ތެރެއިން އިތުރު ދެ ކޭސް ފެނުމާ އެކު، ކޭސްތައް ފެނުނު ސަރަހައްދު ލޮކްޑަައުން ކުރުމަށް އަމުރު ނެރުނެވެ.
ޗައިނާއިން ގެންގުޅެނީ ކޮވިޑް އެއްކޮށް ނައްތާލުމަށް "ޒީރޯ ކޮވިޑް" ވިސްނުމެކެވެ. އެ ވިސްނުމުގެ ދަށުން އެއް ފަހަރާ ގިނަ ބަޔަކު ޓެސްޓު ކުރުމާއި، އެކަަހެރި ކުރުމާއި، ލޮކްޑައުން ކުރުން ކުރިއަށް ގެންދެ އެވެ.
އޭގެ ސަބަބުން ޗައިނާގައި ކޮވިޑް ޖެހިގެން މަަރުވާ މީހުންގެ އަދަދު ނިސްބަތުން އެހެން ގައުމުތަކާ އަޅާ ބަލާއިރު ވަރަށް މަދެވެ.
އެކަމަކު އެ ވިސްނުމާ ދެކޮޅަަށް ބައެއް އާއްމުންނާއި ވިޔަފާރިތައް އަޑު އުފުލަން ފަށާފައި ވަނީ އާއްމު ދިރިއުޅުމާއި ވިޔަފާރީގެ ކުރިއެރުމަށް ހުރަސް އެޅޭތީ އެވެ.
