އިންޑިއާގެ ބިހާރް ސްޓޭޓުގައި ހޮނު އެޅުމުގެ ސަބަބުން 24 ގަޑިއިރު ތެރޭގައި 20 މީހުން މަރުވެއްޖެ އެވެ.
ބުދަ އަދި ބުރާސްފަތި ދުވަހހު ވެސް އިންޑިއާގެ އުތުރުގެ އެކި ހިސާބުތަކަށް ވިދާ ގުގުރާނެ ކަމަށް ލަފާކޮށްފައިވެ އެވެ.
ބިހާރްގެ ޗީފް މިނިސްޓަރު ނިތީޝް ކުމާރް އެދިވަޑައިގެންނެވީ ޑިޒާޒްޓާ މެނޭޖްމަންޓް އޮތޯރިޓީގެ އެންގުންތަކާ އެއް ގޮތަށް އެންމެން ވެސް އަމަލު ކުރުމަށެވެ.
އިންޑިއާގެ ޖޫން މަހު ފަށާ ވިއްސާރަ މޫސުމުގައި ހިނގާ ހޮޅު އެޅުމުގެ ހާދިސާތަކުގައި ކޮންމެ އަހަރަކު ވެސް އެތައް ސަތޭކަ ބަޔަކު މަރުވެ އެވެ.
އެހެން ގައުމުތަކާ އަޅާ ބަލާއިރު އެހާ ގިނަ އަދަދެއްގެ ބަޔަކު އިންޑިއާގައި ހޮނު އަޅައިގެން މަރު ވަނީ ދަނޑުވެރިކަން ފަދަ މަސައްކަތްތަކުގައި ހާމައަށް އޮންނަ ބޮޑެތި ބިމުގެ ސަރަހައްދުތަކުގައި ގިނަ މީހުން މަސައްކަތް ކުރާތީ ކަމަށް ބެލެވެ އެވެ.
އަންގާރަ ދުވަހު ބިހާރް ސްޓޭޓުން ބުނީ ހޮނު އަޅައިގެން މަރުވި 20 މީހުންގެ އާއިލާއަށް ފައިސާގެ ބަދަލުގެ ގޮތުގައި 5،000 ޑޮލަރު ދޭނެ ކަމަށެވެ.
އެ ސްޓޭޓުގެ ހުރިހާ ސަރުކާރު އޮފީހަކާއި ސްކޫލްތަކާއި ހޮސްޕިޓަލްތަކުގަައި ހޮނު އެޅުމުން ރައްކާތެރި ވާނެ ފަދަ "ލައިޓްނިން އެރެސްޓާ" ނިޒާމް ހަރު ކުރަން މިހާރު ވަނީ އަންގާފަ އެވެ.
އިންޑިއަން އިންސްޓިޓިއުޓް އޮފް ޓްރޮޕިކަލް މީޓިއޮރޮލޮޖީއިން އެއްކުރި ސެޓެލައިޓް ޑޭޓާއިން ދައްކާ ގޮތުގައި 1995 އިން 2014 އަށް އިންޑިއާ ސަރަހައްދުގައި ހޮނު އެޅުން ވަރަށް ބޮޑަށް އިތުރުވި އެވެ.
ކްލައިމެޓް ރެޒިލިއެންޓް އޮބްޒާވިން ސިސްޓަމްސް ޕްރޮމޯޝަން ކައުންސިލުން ހެދި ދިރާސާރަކަަށް ފަހު ބުނީ އެޕްރީލް 2020 އިން މާޗް 2021 އަށް އިންޑިއާގައި 18 މިލިއަން ފަހަރު ހޮނު އެޅި ކަމަށެވެ.
