ލިވަޕޫލް (ޖުލައި 26) - ކުރިއަށް އޮތް އިނގިރޭސި ޕްރިމިއާ ލީގުގެ ސީޒަނުގައި ވެސް ޗެމްޕިއަންކަން ހޯދާނެ ކަމަށް އެންމެ ބޮޑަށް ބެލެވޭ ޓީމަކީ މެންޗެސްޓާ ސިޓީ ކަމަށް އެ ޓީމާ މިދިޔަ ސީޒަނުގެ ލީގަށް ވާދަކުރި ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.
ސިޓީން މިދިޔަ ސީޒަނުގައި އިނގިރޭސި ޕްރިމިއާ ލީގުގެ ޗެމްޕިއަންކަން ސީޒަނުގެ އެންމެ ފަހު ދުވަހު ކަށަވަރުކުރީ ލިވަޕޫލް ފަހަތަށް ޖައްސާލުމަށް ފަހު އެވެ.
ސިޓީން ކުރިއަށް އޮތް އަހަރު އެ ކްލަބްގެ ތާރީހުގައި ފުރަތަމަ ފަހަރަށް އިނގިރޭސި ލީގުގެ ޗެމްޕިއަންކަން ޖެހިޖެހިގެން ތިން ފަހަރަށް ހޯދަން އެ ޓީމުން އަމާޒު ހިފާފައިވާއިރު، ސިޓީގެ އެންމެ ބޮޑު ވާދަވެރިޔާ، ލިވަޕޫލްގެ ކޯޗު ކްލޮޕްގެ ނަޒަރުގައި ވެސް ފޭވަރިޓަކީ ސިޓީ އެވެ.
"ކުރިއަށް އޮތް ސީޒަނުގައި ޕްރިމިއާ ލީގަށް ވަރުގަދަ ފައިޓެއް ފެންނާނެ. އަހަންނަކަށް ނޭނގެ ރޭހުގައި އޮންނާނެ ޓީމެއް ސީދާ ބުނާކަށް، އެކަމަކު، އަހަރެންގެ ނަޒަރުގައި ޗެމްޕިއަންކަން ހޯދާނެ ކަމަށް ބެލެވެނީ ސިޓީ،" ކުރިއަށް އޮތް ސީޒަންގެ ތައްޔާރީތަކާ ގުޅޭގޮތުން ސްކައި ސްޕޯޓްސް އަށް ދިން އިންޓަވިއުގައި ކްލޮޕް ބުންޏެވެ.
"އަހަރެމެން (ލިވަޕޫލް) މީގެ ދެ އަހަރު ކުރިން ލީގު ތަށި ނުހޯދިނަމަ ފަހެއް ނޫނީ ހަ ފަހަރު އޮންނާނީ ސިޓީ އަތުގައި ލީގު، އަހަރެމެންނަށް ރަނގަޅު ސީޒަނެއް ނިންމާލެވިދާނެ ކަމަށް ބަލައި، ހޯދޭނެ އެއްޗެއް ހޯދަން އަމާޒަކީ،"
އިނގިރޭސި ޕްރިމިއާ ލީގު އެންމެ ފަހުން ބޭއްވި ފަސް ފަހަރުގެ ތެރެއިން ހަތަރު ފަހަރު ސިޓީ ހޯދިއިއިރު އަނެއް ފަހަރު ތަށި ހޯދީ ލިވަޕޫލުންނެވެ.
ކްލޮޕް ބުނީ ހަގީގަތުގައި ޕްރިމިއާ ލީގުގެ ފޯރި މިހާރު އޮތްގޮތުން ކޮންމެ ޓީމެއް ވެސް ލީގު ފަށާއިރު ބޭނުންވަނީ ގަދަ ހަތަރެއްގެ ޓާގެޓާ އެކު ކުރިއަށްދާން ކަމަށެވެ. އަދި މެޗުތައް ދާ ގޮތާއި ލީގު ތާވަލްގައި އޮންނަ މަގާމެއް ބަލައި ވަކި ހިސާބަކުން ތައްޓަށް ވާދަކުރެވެން އޮތިއްޔާ އެ ވިސްނުމުގައި ކުރިއަށްދަނީ ކަމަށް ކްލޮޕް ބުންޏެވެ.
ލިވަޕޫލާއި ސިޓީން ވެސް ވަނީ އާ ސީޒަނަށް ކުޅުންތެރިން ސޮއިކުރުވައިފަ އެވެ. ދެ ޓީމުން މައިގަނޑުކޮށް ގަތް ކުޅުންތެރިންނަށް ބަލާއިރު ލިވަޕޫލުން ވަނީ ބެންފީކާގެ ޑާވިން ނޫނޭޒް އާއި ފުލަމްގެ ފަބިއޯ ކަވާލިއޯ ގަނެފަ އެވެ. ސިޓީން ވަނީ ޑޯޓްމަންޑްގެ އާލީ ބްރައުޓް ހާލަންޑް އާއި ލީޑްސް ޔުނައިޓެޑްގެ ކަލްވިން ފިލިޕްސް އަދި އާޖެންޓީނާގެ ފޯވާޑް ހޫލިއަން އަލްވަރޭޒްގެ ޑީލް ނިންމައިފަ އެވެ.
"ސިޓީ ހަަމައެކަނި ގަތީއެއް ނޫން، ދެން ކުޅުންތެރިން (ގަބްރިއެލް ޖީސޫސް އާއި އޮލެކްސަންޑަ ޒިންޗެންކޯ) އާސެނަލަށް ދީފި، އެއް ކުޅުންތެރިއަކު (ރަހީމް ސްޓާލިން) ޗެލްސީ އަށް ވިއްކައިފި، ޔަގީނުން ވެސް އެއް ޓީމެއް ގޮވައިގެން އެއްގޮތަކަށް ކުރިއަށް ނުދެވޭނެ. އާ ސްޓައިލުގެ އާ ކުުޅުންތެރިން ބޭނުންވާނެ، އެކަން ކޮންމެެ ޓީމަކުން ވެސް ކުރާނެ، ކުރަން ވެސް ޖެހޭނެ،" ކްލޮޕް ބުންޏެވެ.
ކްލޮޕް ބުނީ މީގެ ކުރިން ސީޒަންތަކުގައި ޕްރިމިއާ ލީގުގައި ކިޔުނު ގަދަ ހަ ޓީމުގެ ތެރެއަށް ވަންނަން މަސައްކަތް ކުރާ ކްލަބްތައް މި ފަހަރު ކުރިން އަހަރަށް ވުރެން އިތުރުވާނެ ކަމަށެވެ.
ލިވަޕޫލުން އާ ސީޒަން ފަށާ މެޗުގައި މި މަހު 30 ވަނަ ދުވަހު ނުކުންނާނީ އިނގިރޭސި ކޮމިއުނިޓީ ޝީލްޑް މެޗުގައި ސިޓީއާ ދެކޮޅަށެވެ.
