މާލެ ސަރަހައްދުން ދޫކުރަން ދޫކުރާ ގޯއްޗާއި ފްލެޓަށް އެދި ފޯމްލާން މީހުންނަށް އެހީތެރިވާ ހަރަކާތެއް އެމްޑީޕީން ފަށައިފި އެެވެ.
ވެރިކަން ކުރާ ކޯލިޝަނުގެ މައި ޕާޓީ، އެމްޑީޕީން މިއަދު ކުރި އިއުލާނެއްގައި ބުނީ ގޯއްޗާއި ފްލެޓަށް އެދި ފޯމުލާން އެހީތެރިވާށާއި އެކަމާ ބެހޭ މައުލޫމާތު ދޭން އެޕާޓީން ސެޝަން ތަކެއް ކުރިއަށް ގެންދަނީ، ގެދޮރުވެރިކުރުމުގެ ސިޔާސަތަކީ އެޕާޓީގެ އެންމެ އިސް އެއް ސިޔާސަތުކަމަށް ވާތީ ކަަމަށެވެ.
"...އެމްޑީޕީގެ އަމާޒަކީ މަލޭ ރަށްވެހިންގެ ތެރެއިން ވީހާވެސް ގިނަބަޔަކަށް ބޯހިޔާވަހި ކަމުގެ މިޕްރޮގްރާމްގެ ނަފާ ލިބި މާލޭ ސަރަހައްދުން އަމިއްލަ ގޯއްޗާއި ފްލެޓް ލިބިގެން ދިއުމެވެ." އެމްޑީޕީގެ އިއުލާނުގައި ބުންޏެވެ.
އެ ޕާޓީން އިތުރަށް ބުނީ، ފޯމުލާން އެހީތެރިވާށާއި މައުލޫމާތުދޭން މިރޭން ފެށިގެން ކޮންމެ ރެއަކު 8:30 އިން 10:30 އަށް ކުރިއަށް ގެންދާނެ ކަމަށެވެ. ސެޝަންތައް ބާއްވަން ހަމަޖެހިފައިވަނީ ޗާންދަނީ މަގުގައި ހުންނަ އެޕާޓީގެ "ދަނޑިކޮށި ޖަހަ" ގަ އެވެ.
