ފިލިޕީންސްގައި އޮތް ގްރެޖުއޭޝަން ހަފްލާއެއްގައި ބަޑި ޖަހައި ކުރީގެ މޭޔަރަކާ އެކު ތިން މީހުން މަރާލަައިފި އެވެ.
މަރުވި މީހުންގެ ތެރޭގައި ހިމެނެނީ ލަމިޓަން ސިޓީގެ ކުރީގެ މޭޔަރު ރޯޒް ފުރިގޭ އެވެ. ކުއޭޒޮން ސިޓީގައި އޮތް ގްރެޖުއޭޝަން ހަފްލާގައި ބަޑި ޖެހުމުން ފުރިގޭގެ އަންހެން ދަރިފުޅަށް އަަނިޔާވި އެވެ.
ތުހުމަތު ކުރެވޭ މީހާ ހައްޔަަރުކޮށްފައިވާ އިރު، އޭނާ އާއި ފުރިގޭއާ ދެމެދު ކޯޓުގައި މައްސަލައެއް އެބަ އޮތެވެ.
ފިލިޕީންސްގެ ސްކޫލްތަކާއި ޔުނިވާސިޓީތަކުގައި ބަޑި ޖެހުމަކީ ވަރަށް ނުފެންނަ މަންޒަރެކެވެ. ނަމަވެސް އެ ގައުމުގެ ސިޔާސީ މީހުންގެ ގަޔަށް ބަޑި ޖަހައި މެރުން ވަރަށް އާއްމެވެ.
އާދީއްތަ ދުވަހު ބަޑި ޖެހީ އެޓީނިއޯ ޑެ މެނީލާ ޔުނިވާސިޓީގެ ގާނޫނު ކިޔަވާ ދަރިވަރުންގެ ގްރެޖުއޭޝަން ހަފްލާއަށް، ދަރިވަރުންގެ އާއިލާތައް ޖަމާވެފައި އޮތް ވަގުތެއްގަ އެވެ.
ބަޑި ޖެހުމުން މަރުވީ ފުރިގޭ އާއި އޭނާގެ އެސިސްޓަންޓް އަދި ޔުނިވާސިޓީގެ ސެކިއުރިޓީ ގާޑެކެވެ. ހާދިސާ ހިނގި އިރު، ފިލިޕީންސްގެ އުއްތަމަ ފަނޑިޔާރު އެލެގްޒެންޑާ ގެސްމުންޑޯ ހަފްލާގައި ވާހަކަ ދެއްކެވުމަށް ވެސް ހަމަޖެހިފައި އޮތެވެ. އެކަމަކު ބަޑި ޖެހީ، އެމަނިކުފާނު އެ ތަނަށް ވަޑައިގެންނެވުމުގެ ކުރިންނެވެ.
ރައީސް ފާޑިނަންޑް މާކޯސް ޖޫނިއާ ނެރުއްވި ބަޔާނެއްގައި ވިދާޅުވީ ފުލުހުން އެ މައްސަލަ އަވަހަށް ތަަހުގީގުކޮށް، އިންސާފުގެ ކުރިމައްޗަށް ގެންދަން ޖެހޭ މީހުން ގެންދާނެ ކަމަށެވެ.
