ރާއްޖެއިން އަދި މިހާތަނަށް މަންކީޕޮކްސްގެ ކޭސްއެއް ދެނެގަނެވިފައި ނުވާ ކަމަށް އެޗްޕީއޭއިން ބުނެފި އެވެ.
ދުނިޔޭގެ އެކި ގައުމުތަކުގައި މިހާރު ފެތުރެމުންދާ މަންކީޕޮކްސްއަކީ އާންމު ސިއްހަތަށް ހުރި ނުރައްކަލެއްގެ ގޮތުގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަނޑައެޅުމާ ގުޅިގެން ރާއްޖޭގެ ހާލަތު ސާފުކުރުމަށް "އަދަދު" އިން ގުޅުމުން އެޗްޕީއޭއިން ބުނީ، މަންކީޕޮކްސްގެ ކޭސްއެއް ރާއްޖެއިން އަދި ދެނެގަނެވިފައި ނުވާ ކަމަށާއި، ފެނިއްޖެނަމަ އެ އެޖެންސީން އެކަން އަންގާނެ ކަމަށެވެ.
މަންކީޕޮކްސްއަކީ އާންމު ސިއްހަތަށް ހުރި ނުރައްކަލެއްގެ ގޮތުގައި ޑަބްލިއުއެޗްއޯއިން ކަނޑައަޅާފައި ވާއިރު، ދުނިޔޭގެ 75 ގައުމަކުން މިހާތަނަށް މަންކީޕޮކްސްގެ 16،000 އަށްވުރެ ގިނަ ކޭސް ވަނީ ރިޕޯޓުކޮށްފަ އެވެ. އަދި، މި ބަލީގައި މިހާތަނަށް ފަސް މީހަކު ވަނީ މަރުވެފަ އެވެ.
މަންކީޕޮކްސްގެ އެންމެ ފަހުގެ ހަބަރުތަކަށް ބަލާލާއިރު، އެމެރިކާގެ ދެ ކުޑަކުއްޖަކަށް ވެސް އެ ބަލި ޖެހިފައިވާ ކަމަށް އެ ގައުމުގެ އޮފިޝަލުން ބުނެ އެވެ. ސެންޓާ ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން މައުލޫމާތުދޭ ގޮތުގައި އެއް ކުއްޖަކީ ކެލިފޯނިއާއަށް ނިސްބަތްވާ ދެ އަހަރު ނުފުރޭ ކުއްޖެކެވެ. އަނެއް ކުއްޖާއަކީ އެމެރިކާ ރައްޔިތެއް ނޫން ނަމަވެސް، އެ ކުއްޖާ ވޮޝިންޓަންގައި ކުރި ޓެސްޓުގެ ނަތީޖާ ޕޮޒިޓިވްވެފައި ވެއެވެ.
ދެ ކުދިންގެ ހާލު ވެސް ރަނގަަޅު ކަމަށާއި ފަރުވާދެމުންދާ ކަމަށް އޮފިޝަލުން ބުނެ އެވެ. އަދި އެ ކުދިންނަށް ބަލި ޖެހުނު ގޮތް ތަހުގީގު ކުރަމުންދާ އިރު، ބޮޑަށް ބެލެވެނީ އާއިލާގެ އެހެން މީހެއްގެ ފަރާތުން ޖެހުނު ކަމަށެވެ.
މަންކީޕޮކްސްއާ ބެހޭގޮތުން މިހާތަނަށް ދެނެގަނެވިފައިވާ މައުލޫމާތުތަކުން އެނގޭ ގޮތުގައި ކޮންމެ މީހަކު ވެސް "ކްލޯޒް ކޮންޓެކްޓް" ވެއްޖެ ނަމަ ބަލި ޖެހިދާނެ އެވެ. މި ބައްޔަކީ ޖިންސީ ގުޅުން ހިންގުމުގެ ސަބަބުން ގައިންގަޔަށް އަރާ ބައްޔެއްތޯ އަދި ކަށަވަރު ކުރެވިފައެއް ނުވެ އެވެ.
ނަމަވެސް، މަންކީޕޮކްސްގެ ގިނަ ކޭސްތައް ފެނިފައި ވަނީ އެއްޖިންސުން ގުޅުން ހިންގާ ފިރިހެނުންގެ ފަރާތުން ކަމަށް ބައެއް ރިޕޯޓުތަކުން ބުނެ އެވެ. އެގޮތުން، މަންކީޕޮކްސްގެ ކޭސްތަކުގެ 96 ޕަސެންޓަކީ އެއް ޖިންސުން ގުޅުން ހިންގާ ފިރިހެނުންގެ ފަރާތުން ފެނިފައިވާ ކޭސްތަކެވެ.
