ޗައިނާގެ ރައީސް ޝީ ޖިންޕިން އާއި އެހެން ލީޑަރު ޖެއްސެވީ އެ ގައުމުގައި އުފެއްދި ކޮވިޑް ވެކްސިން ކަމަށް ޗަައިނާ ސަރުކާރުން ބުނެފި އެވެ.
ސަރުކާރުން އެކަން ހާމަކުރީ، ކޮވިޑާ ދެކޮޅަށް ވެކްސިން ޖެހުން އިތުރު ކުރުމަށް ހިންގާ ކެމްޕެއިނެއްގެ ދަށުންނެވެ.
ޗައިނާގެ ނެޝަނަލް ހެލްތު ކޮމިޝަނުގެ ނައިބު ރައީސް ޒެންގް ޔިޒިން ވިދާޅުވީ އެކަމުން ހާމަވަނީ ގައުމުގެ ވެރިން ޗައިނާގެ ވެކްސިންތަކަށް ކުރައްވާ އިތުބާރު ކަމަށެވެ. ޒެންގް ވިދާޅުވީ ޗައިނާގެ ހުރިހާ ވެރިން ވެސް ޖެއްސެވީ އެ ގައުމުގައި އުފެއްދި ކޮވިޑް ވެކްސިން ކަމަށެވެ.
ޗައިނާއިން އަދިވެސް ގެންގުޅެނީ "ޒީރޯ ކޮވިޑް" ސިޔާސަތެވެ. އޭގެ ދަށުން ކޮވިޑް އެއްކޮށް ނައްތާލުމަށް ލޮކްޑައުން ކުރުމާއި ޓެސްޓު ކުރުން އަދިވެސް ދަނީ ކުރިއަށެވެ.
އެހެން ގައުމުތަކާ އަޅާ ބަލާއިރު ޗައިނާގައި ކޮވިޑް ޖެހިގެން މަރުވާ މީހުންގެ އަދަދު މަދު ނަމަވެސް، ފިޔަަވަޅުތަކަށް ލުއި ނުދޭތީ ބައެއް އާއްމުން ވަނީ ހިތްހަމަނުޖެހުން ފާޅުކޮށްފަ އެވެ.
ރައީސް ޝީ ޖިންޕިން ތަކުރާރުކޮށް ވިދާޅުވީ "ޒީރޯ ކޮވިޑް" ސިޔާސަތު ނޫން އެހެން ގޮތެއް ނެތް ކަމަށެވެ.
ޖޯން ހޮޕްކިންސް ޔުނިވާސިޓީގެ ތަފާސްހިސާބު ދައްކާ ގޮތުން ބަލިމަޑުކަމުގައި ޗައިނާއިން މިހާތަނަށް 2،167،619 ކޭސް ރިޕޯޓުކޮށް، 14،647 މީހުން މަރުވެފައިވެ އެވެ.
އެންމެ ފަަހުގެ ތަފާސްހިސާބު ދައްކާ ގޮތުން ޗައިނާގެ އާބާދީގެ 90 ޕަސެންޓް ވަނީ ވެކްސިންގެ ދެ ޑޯޒް ޖަހާފަ އެވެ.
