އިންޑިއާގެ އާ ރައީސްގެ މަގާމަށް، ގަބީލާއަކަށް ނިސްބަތްވާ ސިޔާސީ ބޭކަނބަލެއް ކަމަަށްވާ، ދްރޫޕަދީ މުރްމޫ އިންތިހާބުވެވަޑައިގެންފި އެވެ.
އުމުރުން 64 އަހަރުގެ މުރްމޫއަކީ ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) ގެ ކެންޑިޑޭޓެވެ. އޮޑިއްސާ ސްޓޭޓުގެ ކުރީގެ މުދައްރިސަކަށް އުޅުއްވި މުރްމޫ ވަނީ ކުރިން ސްޓޭޓް ގަވަރުނަރުކަން ކުރައްވާފަ އެވެ.
މިއީ އިންޑިއާގެ ގަބީލާއެއްގެ ބޭފުޅަކު ރައީސް ކަމަށް ވަޑައިގެންނެވި ފުރަތަމަ ފަހަރެވެ. އިންޑިއާގެ ދައުލަތުގެ އެންމެ އިސްވެރިޔަކީ ރައީސް ނަމަަވެސް، ދައުލަތް ހިންގުމުގެ ބާރެއް ނޯވެ އެވެ.
ރައީސް އިންތިހާބު ކުރަނީ ޕާލިމެންޓްގެ މަތިގެ އާއި ތިރިގެ އަދި ވަކި ސްޓޭޓްތަކާއި ޓެރިޓަަރީތަކުގެ ގާނޫނު ހަދާ މަޖިލީހުގެ މެމްބަަރުންގެ މެދުގައި ނަގާ ވޯޓުންނެވެ.
މިހާރުގެ ރައީސް ރާމް ނަތް ކޮވިންދްގެ ދައުރު ޖުލައި 24 ގައި ހަމަަވުމުން، މުރްމޫ ރަސްމީކޮށް ރައީސް ކަމުގެ ދައުރު ފައްޓަވާނެ އެވެ.
ބީޖޭޕީގެ ކެންޑިޑޭޓުގެ ގޮތުގައި މުރްމޫ ހޮވީ 20 ބޭފުޅުންގެ ތެރެއިންނެވެ. އެކަމަނާ ވިދާޅުވީ ޕާޓީގެ ނިންމުމުގެ ހަބަރު ލިބުނީ ޓީވީ މެދުވެރިކޮށް ކަމަށެވެ.
މުރްމޫއަަކީ މާޔުރްބާންޖް ޑިސްޓްރިކްޓުގެ ބައިދަޕޯސީ އަވަށަށް ނިސްބަތްވާ ބޭކަނބަލެކެވެ. އެކަމަނާ ހިމެނޭ ސަންތަލް ކޮމިއުނިޓީއަކީ އިންޑިއާގެ އެންމެ ބޮޑު އެއް ގަބީލާ އެވެ.
އަންނަަ މަަހު ނައިބު ރައީސް ހޮވުމުގެ ވޯޓު ވެސް އޮންނާނެ އެވެ. ބީޖޭޕީގެ ކެންޑިޑޭޓަކީ މި ވަގުތު ވެސްޓް ބެންގޯލް ސްޓޭޓުގެ ގަވަރުނަރުކަން ކުރައްވާ ޖަަގްދީޕް ދަންކަރް އެވެ.
