ނިއު ދިއްލީ، އިންޑިއާ (ޖުލައި 21) - މަނީ ލޯންޑަރިންގެ މައްސަަލައެއްގައި އިންޑިއާގެ އިދިކޮޅު ކޮންގްރެސް ޕާޓީގެ ރައީސް ސޯނިއާ ގާންދީއާ ފުލުހުން ސުވާލުކޮށްފި އެވެ.
ސޯނިއާއަކީ ކުރީގެ ބޮޑު ވަޒީރު ރަޖީވް ގާންދީގެ އަނބިކަނބަލުންނެވެ. ނަވާރަ ސަތޭކަ ނުވަދިހަ އެއް ވަނަ އަހަރު ރަޖީވް ގާންދީ އަވަހާރަކޮށްލުމުން، ޕާޓީގައި އެންމެ އިސް ދައުރު އަދާ ކުރައްވަނީ އެކަމަނާ އެވެ.
ސޯނިއާއާ ދެކޮޅަށް ފުލުހުން ތަހުގީގު ކުރަމުން ދަނީ މީގެ އެތައް އަހަރެއް ކުރިން، މިހާރު ވެރިކަމުގައި އޮތް، ބަރަތިޔަ ޖަނަތަ ޕާޓީ (ބީޖޭޕީ) ގެ ޕާލިމެންޓް މެމްބަރަކު ހުށަަހެޅި މައްސަލަ އެކެވެ.
އޭރު ތުހުމަތު ކުރީ ސޯނިއާ ގާންދީގެ އާއިލާއިން ކޮންގްރެސް ޕާޓީގެ ފައިސާާ ނުހައްގުން ބޭނުންކޮށް، ނޫހެއް ގަތް ކަމަށެވެ. ގާންދީ އާއިލާއިން އެ ތުހުމަތު ދޮގުކުރެ އެވެ.
ކޮންގްރެސް ޕާޓީއިން ބުނީ މިއީ ބޮޑު ވަޒީރު ނަރެންދްރަ މޯދީގެ ޕާޓީއަށް ލިބިފައި އޮތް ބާރުގެ ބޭނުން ނަހަމަ ގޮތުގައި ބޭނުން ކުރުން ކަމަށެވެ.
އެ މައްސަލައިގަައި ސުވާލު ކުރުމަށް ސޯނިއާ ގާންދީ އެންމެ ފުރަތަމަ ހާޒިރު ކުރީ މިދިޔަ މަހު އެވެ. ނަމަވެސް ކޮވިޑް ޖެހި، އެޑްމިޓް ކުރެއްވުމުން، ސުވާލު ކުރުން ފަސްކުރަން ޖެހުނެވެ.
އެކަމަނާގެ ދަރިކަލުން އަދި ޕާލިމެންޓުގެ ކޮންގްރެސް ޕާޓީގެ ލީޑަރު ރާހުލް ގާންދީއާ ވެސް ޖޫން މަހު ހަމަ އެ މައްސަލަައިގައި ސުވާލުކުރި އެވެ.
ބުރާސްފަތި ދުވަހު މައްސަލަ ތަހުގީގު ކުރާ އެންފޯސްމަންޓް ޑައިރެކްޓަރޭޓް އޮފީހަަށް ސޯނިއާ ވަޑައިގެންނެވީ ރާހުލް އަދި ދަރިކަނބަލުން ޕްރިޔަަންކާއާ އެކު އެވެ.
އެ ތަހުގީގު ކުށްވެރިކޮށް އިދިކޮޅު ޕާޓީތަކުގެ ލީޑަރުން ގުޅިގެން ބުރާާސްފަަތު ދުވަހު ބަޔާނެއް ނެރުނެވެ.
