ރާއްޖެ އާއި މޮރޮކޯއާ ދެމެދު އޮންނަ ގުޅުން އިތުރަށް ބަދަހިކުރުމުގެ ގޮތުން މޮރޮކޯގެ ކޮންސިއުލޭޓެއް ފުރަތަމަ ފަހަރަށް ރާއްޖޭގައި ހުޅުވައިފި އެވެ.
މިދިޔަ ހޯމަ ދުވަހު ހުޅުވި އެ ކޮންސިއުލޭޓް ގާއިމުކޮށްފައިވަނީ ހެންވޭރު އަމީރު އަހުމަދު މަގުގައި ހުންނަ އޭޑީކޭ ޓަވަރުގަ އެވެ.
މި ރަސްމިއްޔާތުގައި ރާއްޖެއަށް ކަނޑައަޅުއްވާފައި ހުންނަވާ މޮރޮކޯގެ އޮނަރަރީ ކޮންސުލް އަހްމަދު ނާޝިދު (އޭޑީކޭ ނާޝިދު) އާއި، ފޮރިން މިނިސްޓްރީގެ އިސް ބައެއް ބޭފުޅުން ބައިވެރިވެ ވަޑައިގަތެވެ. މޮރޮކޯގެ އޮނަނަރީ ކޮންސިއުލޭޓް ހުޅުވުމުގެ ގޮތުން އެ އިމާރާތުގައި މޮރޮކޯގެ ދިދަ ނަންގަވައިދެއްވީ ރާއްޖޭގެ ފޮރިން ސެކްރެޓަރީ އަހުމަދު ލަތީފެވެ.
މޮރޮކޯގެ ސަފީރު މުހައްމަދު މާލިކީ ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިން ވަނީ ފޮރިން ސެކްރެޓަރީ ލަތީފުގެ އަރިހަށް އިހުތިރާމުގެ ޒިޔާރަތެއް ވެސް ކުރައްވާފަ އެވެ.
ފޮރިން މިނިސްޓްރީގައި ކުރިއަށްގެންދިޔަ މި ބައްދަލުވުމުގައި ދެ ބޭފުޅުން ވަނީ ދެ ގައުމުގެ ދެމެދުގައި އޮތް ޒަމާންވީ ގާތް ގުޅުން އިތުރަށް ބަދަހިކުރުމާއި، ދެގައުމުގެ ރައްޔިތުންގެ މެދުގައި ވާ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރައްވާފަ އެވެ.
ކޮންސިއުލޭޓް ހުޅުވުމަކީ ރާއްޖެ އާއި މޮރޮކޯއާ ދެމެދު އެކި ދާއިރާތަކުން ގުޅުން ބަދަހިކުރުމަށް އެޅުނު މުހިއްމު ފިޔަވަޅެއްގެ ގޮތުގައި މޮރޮކޯއިން ދެކެ އެވެ. ދިވެހިރާއްޖެ އާއި މޮރޮކޯއިން ހާރިޖީ ގުޅުން ގާއިމު ކޮށްފައިވަނީ 4 ފެބްރުއަރީ 1988 ގައެވެ.
