ބްރަސެލްސް، ބެލްޖިއަމް (ޖުލައި 19) - އަލްބޭނިއާ އާއި ނޯތު މެސެޑޯނިއާއިން ޔޫރަޕިއަން ޔޫނިއަަން (އީޔޫ) ގެ މެމްބަރުކަން ހޯދުމަށް އަންގާރަ ދުވަހު ރަސްމީކޮށް މަަޝްވަރާ ފަށައިފި އެވެ.
ޔޫރަޕިއަން ކޮމިޝަންގެ ރައީސް އުރްސުލާ ވޮން ޑެ ލެޔެން ވަނީ އަލްބޭނިއާގެ ބޮޑު ވަޒީރު އެޑީ ރާމާ އަދި މެސެޑޯނިއާގެ ބޮޑު ވަޒީރު ޑިމިޓާރް ކޮވަޗެވްސްކީއަށް މަަރުހަބާ ދަންނަވާފަ އެވެ.
މި ވަގުތު އީޔޫގައި 27 މެމްބަރު ގައުމު ހިމެނޭ އިރު، އިތުރު ގައުމަކަށް މެމްބަަރުކަން ދިނުމުގެ އިޖުރާއަތު ދިގުލައިގެން ދިޔުން އެކަަށީގެންވެ އެވެ. ނަމަވެސް, ރަސްމީ މަޝްވަރާ ފެށުމަކީ ކުރިއެރުމެއް ކަމަށް ބެލެވެ އެވެ.
"މިއީ ވަރަށް ބޮޑު ހިތްހަމަަޖެހުމެއް. އީޔޫގެ މެމްބަރުކަން ހޯދަން އެދުނުތާ 17 އަހަރު ފަހުން މަޝްވަރާ ފެށުމަަކީ ހިތްހަމަޖެހުމެއް،" ކޮވަޗެވްސްކީ ވިދާޅުވި އެވެ.
އަަލްބޭނިއާއިން އީޔޫގެ މެމްބަރުކަން ހޯދަން އެދި ހުށަހެޅީ 2009 ވަނަަ އަހަަރު އެވެ. ރާމާ ވިދާޅުވީ އަދިވެސް ގިނަ ދުވަސްތަަކެއް ހޭދަވުން އެކަށީގެންވާ ކަމަށެވެ.
ވޮން ޑެ ލެޔެން ވިދާޅުވީ ޔޫރަޕްގެ އާދަތަކާއި ސްޓޭންޑަޑްތަކަށް ކަންކަން ގެންދިޔުމަށް އަލްބޭނިއާ އާއި ނޯތު މެސެޑޯނިއާއިން މިހާރު ވެސް ބޮޑެތި ކުރިއެރުންތަކެއް ހޯދާފައިވާ ކަމަށެވެ.
ޔުގޯސްލޭވިއާގެ ދަށުން މެސެޑޯނިއާ މިނިވަންކަން ހޯދީ 1991 ވަނަ އަހަރު އެވެ. އޭގެ ފަހުން ނޭޓޯގެ މެމްބަރުކަން ހޯދަން ހުށަހެޅުމުން، ގްރީސްގެ ފިއްތުން ކުރިމަތިވެ އެ ގައުމުގެ ނަން ނޯތު މެސެޑޯނިއާާއަށް ބަދަލު ކުރީ 2018 ވަނަ އަހަރު އެވެ.
ނޭޓޯގެ މެމްބަރުކަން ލިބުނު ނަމަވެސް، ހުޅަަނގުގެ ބޮޑެތި ގައުމުތަކުން ނޯތު މެސެޑޯނިއާ އަދި އަލްބޭނިއާއަށް އީޔޫގެ މެމްބަަރުކަން ދިނުމާ ކުރިން ދެކޮޅެވެ.
