ޕާކިސްތާނުގެ ޕަންޖާބް ޕްރޮވިންސްގެ ބައި އިލެކްޝަނުން ކުރީގެ ބޮޑު ވަޒީރު އިމްރާން ހާންގެ ޕާޓީއިން ކުރި ހޯދައި، އާއްމު އިންތިހާބު އަވަސް ކުރުމަށް ގޮވާލައިފި އެވެ.
އިމްރާންގެ ޕީޓީއައި ޕާޓީއިން ވަނީ ޕަންޖާބްގެ ގާނޫނު ހަދާ މަޖިލީހުން ވޯޓަށް ހުޅުވާލި 20 ގޮނޑީގެ ތެރެއިން 15 ގޮނޑި ކާމިޔާބުކޮށް، އެ މަޖިލީހުގެ މެޖޯރިޓީ ހޯދާފަ އެވެ.
ޕާކިސްތާނުގެ އާއްމު އިންތިހާބު ތާވަަލުކޮށްފައި ވަނީ އޮކްޓޯބަރު 2023 އަށެވެ. އެނެލިސްޓުން ބުނާާ ގޮތުގައި ޕަންޖާބް ބައި އިލެކްޝަންގެ ނަތީޖާއަކީ އާއްމު އިންތިހާބުގެ ނަތީޖާ އަންނާނެ ގޮތުގެ ރަމްޒެކެވެ.
އިމްރާން ހާން ބޮޑު ވަޒީރު ކަމުން ދުރު ކުރީ މިދިޔަަ އެޕްރީލް މަހު ނެގި އިތުބާރު ނެތް ކަމުގެ ވޯޓަކުންނެވެ. ޕންޖާބްގެ ނަތީޖާ އަައި ގޮތުން އާ ބޮޑު ވަޒީރު ޝެހްބާޒް ޝަަރީފްގެ ކޯލިޝަން ސަރުކާރަށް އިތުރު ގޮންޖެހުންތަކާ ވަނީ ދިމާވެފަ އެވެ.
އެގޮތުން އިންފްލޭޝަން މަތިވެ، ހަކަތައިގެ ދަތިކަަން ކުރިމަތިވަމުން ދަނިކޮށް، ސިޔާސީ ހަމަޖެހުން ގެއްލި، ކޯލިޝަން ރޫޅުލުމުގެ ފުރުސަތު ބޮޑެވެ.
ޕަންޖާބަކީ ޒަމާނުއްސުރެ ވެސް ޝެހްބާޒް ޝަަރީފްގެ ޕީއެމްއެލް-އެން ޕާޓީގެ ޕްރޮވިންސެކެވެ. އެކަމަކު އާދީއްތަ ދުވަހުގެ ބައި އިލެކްޝަނުން އެ ޕާޓީއަށް ލިބުނީ އެންމެ ހަތަރު ގޮނޑި އެވެ. ފަސް ވަނަަ ގޮނޑި ލިބުނީ މިނިވަން ކެނޑިޑޭޓަކަަށެވެ.
ޕަންޖާބްގެ ނަތީޖާއިން ދޭހަވަނީ އިގްތިސާދީ ގޮންޖެހުންތަކާ ހެދި ރައްޔިތުންނަށް ކުރިމަތިވެފައިވާ ތަކުލީފްތަކާ ގުޅިގެން ސަަރުކާާރާ މެދު ހިތްހަމަނުޖެހިފައި ތިބި ކަމެވެ.
