މާލޭގައި ފެންވަރު ރަނގަޅު ޕަބްލިކް ޓްރާންސްޕޯޓް ނިޒާމެއް ގާއިމުކުރަން, މިނީ ބަހުގެ ހިދުމަތް ދޭން ފެށުމަށް ބޭނުންވާ ބަސްތައް ރާއްޖެ ގެނެސްފި އެވެ.
އެމްޓީސީސީން މިއަދު ހާމަކޮށްފައިވާ ގޮތުގައި ޖުމުލަ 36 މިނީ ބަސް ވަނީ ގެނެސްފަ އެވެ. އަދި ޕޯޓު ކްލިއަރެންސްގެ މަސައްކަތް ކުރިއަށްދާ ކަމަށް އެކުންފުނިން ބުންޏެވެ. މި މަސައްކަތުގެ އެންމެ ފަހުގެ މައުލޫމާތުތައް ކުރިއަށް އޮތް ތަނުގައި ވެސް ހިއްސާކުރަމުންދާނެ ކަމަށް އެމްޓީސީސީން ބުނެ އެވެ.
މާލޭގައި މިނީ ބަހުގެ ހިދުމަތް ތައާރަފު ކުރުމަކީ ރައީސް އިބްރާހިމް މުހައްމަދު ސޯލިހްގެ 100 ދުވަހުގެ ރިޔާސީ ވައުދެކެވެ.
ނަމަވެސް، މި ސަރުކާރަށް ހަތަރު އަހަރުވީ އިރުވެސް އެ ވައުދު ނުފުއްދި އޮތް އިރު އެ ހިދުމަތް ފަށަން ތަފާތު ތާރީހުތައް ދީފައިވެ އެވެ. ނަމަވެސް ފަށާފަ އެއް ނުވެ އެވެ.
މިނީ ބަހުގެ ހިދުމަތް މި މަހުގެ ތެރޭގައި ފަށާނެ ކަމަށް އެމްޓީސީސީގެ ސީއީއޯ އާދަމް އާޒިމް ވަނީ މީގެކުރިން ހާމަކުރައްވާފަ އެވެ. އެހެންކަމުން އާ ބަސްތައް ގެނައުމާއެކު އާޒިމް ވިދާޅުވެފައިވާ ގޮތަށް ވަރަށް އަވަހަށް މި ހިދުމަތް ފެށޭނެ ކަމަށް ބެލެވެ އެވެ.
