އަވަށްޓެރި ސްރީލަންކާގައި އުފެދިފައިވާ ހަމަނުޖެހުން ނިމުމަކަށް ގެނައުމަށްޓަކައި އެ ގައުމުގެ ވެރިކަން ސުލްހަވެރިކަމާ އެކު ބަދަލުކުރަން ޖާގަދޭން އެމެރިކާއިން ގޮވާލައިފި އެވެ.
ލަންކާގެ ވެރިރަށް ކޮލަމްބޯގައި ހުންނަ އެމެރިކާ އެމްބަސީން އިއްޔެ ނެރުނު ބަޔާނެއްގައި ބުނީ ޒިންމާ އުފުލުމަށާއި ހާމަކަންބޮޑުކޮށް ކަންތައް ކުރުމަށާއި ރައްޔިތުންނަށް ރަނގަޅު މުސްތަގުބަލެއް ހޯދައިދޭން ގޮވާލައި އެތައް ހާސް ބަޔަކު ކުރަމުންދާ މުޒާހަރާތައް އެމެރިކާއިން ގާތުން ބަލަމުން އަންނަ ކަމަށެވެ. މިއީ ލަންކާގެ ތާރީޚުގައި އައި ވަރަށް ހައްސާސް ހިނދުކޮޅެއް ކަމަށް ވެސް އެ ބަޔާނުގައި ބުންޏެވެ.
"...ސުލްހަވެރިކަމާ އެކު ބާރުތައް ބަދަލުކުރުމަށް ޓަކައި ހުރިހާ ފަރާތްތަކުން ވެސް އެއްބާރުލުން ދޭން އަހަރެމެން ގޮވައިލަމެވެ. އަދި ދިގުމުއްދަތުގެ ހަމަޖެހުން ގެނެވޭ ފަދަ ހައްލުތައް ތަންފީޒުކުރުމަށާއި ގޯސްވަމުންދާ ކާނާއާއި ކަަރަންޓާއި ތެލުގެ ދަތިކަން ކުރިމަތިވުން ހިމެނޭ ގޮތުން، އިގުތިސާދީ ހާލަތާ މެދު ސްރީލަންކާ ރައްޔިތުން ފާޅުކުރަމުންދާ ނުރުހުމަށް އެޑްރެސް ކުރަން، ދެން އަންނަ، ގާނޫނު އަަސާސީއާ އެއްގޮތަށް އިޚުތިޔާރުކުރާ ކޮންމެ ސަރުކާރަކަށް އަހަރެމެން ގޮވައިލަމެވެ،" އެމެރިކާގެ ބަޔާނުގައި ބުންޏެވެ.
އެމެރިކާގެ ބަޔާނުގައި ބުނި ގޮތުގައި ސްރީލަންކާއަށް ކުރިމަތިވެފައިވާ ދަރަނީގެ މައްސަލަ ހައްލުކުރަން އަޅާ ދެމެހެއްޓެނިވި ކޮންމެ ފިޔަވަޅަކަށް މަދަދުކުރަން ބައިނަލް އަގުވާމީ އެހެން އެތައް ބަޔަކާ އެކު އެމެރިކާ އޮތީ ތައްޔާރަށެވެ.
މުޒަހާރާ ކުރާ މީހުންނާއި ނޫސްވެރިންނާ ދެކޮޅަށް ހިންގާ ހަމަނުޖެހުން އެމެރިކާގެ ބަޔާނުގައި ކުށްވެރިކުރި އެވެ.
ސްރީލަންކާއަށް ކުރިމަތިވެފައިވާ އިގުތިސާދީ ކާރިސާ ދިގުދެމި، އެގައުމުގެ ރައްޔިތުން ސަރުކާރާ ދެކޮޅަށް ނުކުމެ ހަމަނުޖެހުންތައް ހިންގާތާ މިހާރު ގިނަ ދުވަސްތަކެއް ވެއްޖެ އެވެ. އެގައުމުގެ ވެރިރަށް ކޮލަމްބޯގައި މުޒާހަރާކުރި މީހުން ވަނީ ރިޔާސީ ގަނޑުވަރަށާއި ބޮޑުވަޒީރުގެ ގެކޮޅަށް މިދިޔަ ހޮނިހިރު ދުވަހު ވަދެގަނެފަ އެވެ.
ލަންކާގެ ރައީސް ގޮޓަބަޔާ ރާޖަޕަކްސާއާއި ބޮޑުވަޒީރު ރަނިލް ވިކްރަމަ ސިންހަ އަންނަ ބުދަ ދުވަހު މަގާމުން އިސްތިއުފާދެއްވާނެކަން މިހާރު ވަނީ އިއުލާނުކޮށްފަ އެވެ.
