ލަންޑަން (ޖުލައި 7) - ވިމްބަލްޑަން ޓެނިސް މުބާރާތުގެ ސެމީ ފައިނަލުގައި މާދަމާ، އޮސްޓްރޭލިއާގެ ނިކް ކިރްގިއޯސްއާ ދެކޮޅަށް ކުޅެން ޖެހޭ މެޗު ބޯމަތިވެފައި އޮއްވައި، ސްޕެއިނުގެ ރަފައެލް ނަޑާލް، އަނިޔާގެ ސަބަބުން މުބާރާތުން ވަކިވެއްޖެ އެވެ.
މި އަހަރުގެ ފުރަތަމަ ދެ ގްރޭންޑް ސްލޭމް ޓެނިސް މުބާރާތް (އޮސްޓްރޭލިއަން އޯޕަން އާއި ފްރެންޗް އޯޕަން) ކާމިޔާބުކުރި، ނަޑާލް، 36، އަނިޔާއާ ހެދި މުބާރާތުން ވަކިވުމުން ވިމްބަލްޑަންގެ ފައިނަލުގެ ފުރަތަމަ ޖާގަ ފުރަތަމަ ފަހަަރަށް ވަނީ ކިރްގިއޯސް އަށް ލިބިފަ އެވެ. މިއީ ކިރްގިއޯސް އަށް ލިބިގެންދިޔަ ބޮޑު ފުރުސަތެކެވެ.
ބުދަ ދުވަހު ވިމްބަލްޑަން ޓެނިސް މުބާރާތުގެ ކުއާޓާ ފައިނަލުގައި އެމެރިކާގެ ޓޭލާ ފްރިޓްޒާ ދެކޮޅަށް ކުޅުނު މެޗުގައި ނަޑާލަށް ވަނީ އަނިޔާގެ ސަބަބުން ފަރުވާ ދީފަ އެވެ. ކުއާޓާ ފައިނަލް މެޗުގެ ތެރެއިން ދެ ވަނަ ސެޓުގައި، ނަޑާލް ވަނީ މެޑިކަލް ޓައިމްއައުޓެއް ނަގައިފަ އެވެ.
އޭގެ ކުރިން، ވިމްބަލްޑަންގެ ހަތަރު ވަނަ ބުރުގެ މެޗުގައި ވެސް ބަނޑުގެ އަރިމަތީގައި ރިއްސާތީ ޓޭޕްކޮށްގެން ނަޑާލް ކުޅުނުއިރު، ކުއާޓާ ފައިނަލް މެޗުގައި ވެސް ނަޑާލް ފަހު ސެޓުތައް ކުޅުނީ ޓޭޕްކޮށްގެންނެވެ.
ކުއާޓާ ފައިނަލް މެޗަށް ފަހު، ނޫސްވެރިއެއްގެ ސުވާލަށް ޖަވާބު ދެމުން ނަޑާލް ބުނީ އަނިޔާއާ ހެދި މެޗު ދޫކޮށްލަން ވެސް ވިސްނި ކަމަށާއި އެކަމަކު، ހިތްވަރާ އެކު ކުޅުނީ މެޗު ފުރިހަމަކުރެވޭނެ ކަމުގެ ޔަގީންކަން އޮތުމުން ކަމަށެވެ.
އެކަމަކު، ސެމީ ފައިނަލް މެޗު ފެށެން 24 ގަޑިއިރަށް ވުރެ ވަގުތު ކުޑަތަންވެފައި އޮއްވައި، ނަޑާލް މިހާރު ވަނީ ވިމްބަލްޑަން އިން ވަކިވެފަ އެވެ.
ނަޑާލް ބުނީ އެންމެނަށް ވެސް އޭނާ އަށް ވި އަނިޔާ ފެންނާނެ ކަމަށާއި ހެދި ޓެސްޓްތަކުން އެނގުނީ ބަނޑުގެ މަސްގަނޑުގައި ހަތް މިލިމީޓަރުގެ ޓިއާއެއް (ރެނދެއް) އިން ކަމަށެވެ. އެހެންވެ، ޑޮކްޓަރުގެ ލަފާގެ މަތިން ނިންމީ މުބާރާތުން ވަކިވުމަށް ކަމަށެވެ.
ސްޕެއިންގެ ނޫސްތަކުން ރިޕޯޓްކުރާގޮތުގައި ނަޑާލް ކުއާޓާ ފައިނަލް މެޗު ކުޅުނީ އެ އިންޖަރީގައި ހުރެ ކަމުގައި ވިޔަސް އޭނާގެ އެ އަނިޔާ އިތުރަށް ގޯސްވެފައިނުވާ ކަމަށެވެ. ނަޑާލް ފްރެންޗް އޯޕަންގައި ދާދި ފަހުން ކުޅުނީ އަނިޔާއަކަށް ފަރުވާ ހޯދަމުންނެވެ. އެއީ ފަޔަށް ލިބިފައިވާ އަނިޔާ އަށް ލުޔެއް ހޯދުމަށް ނަޑާލް ފްރެންޗް އޯޕަންގެ ބައެއް މެޗުތަކުގައި ކުޅުނީ އިންޖެކްޝަން ޖަހައިގެންނެވެ.
"އަހަރެން ކެރިއަރުގައި ކުރިއަށްދާން ބޭނުންނަމަ މި ވަގުތަށް އެންމެ ރަނގަޅީ އަރާމްކޮށް ރިކަވާވުން، އެހެންވެ، ސެމީއާ ހަމައިން މުބާރާތުން ވަކިވާން ނިންމީ،" 22 ގްރޭންޑް ސްލޭމް ތަށި ހޯދައި، ރެކޯޑެއް ހަދާފައިވާ ނަޑާލް ބުންޏެވެ.
ކިރްގިއޯސްއާ ދެކޮޅަށް އާދިއްތަ ދުވަހުގެ ފައިނަލުގައި ކުޅޭނީ، ސެމީ ފައިނަލުގައި އިންގްލެންޑްގެ ކެމަރަން ނޯރީ އާއި ދުނިޔޭގެ އެއް ވަނަ ސާބިއާގެ ނޮވަކް ޖޮކޮވިޗް ކުޅެގެން މޮޅުވާ ކުޅުންތެރިއަކާ އެވެ. ނޯރީ އަކީ 2016 ވަނަ އަހަރަށް ފަހު ވިމްބަލްޑަން ސެމީގައި ފެންނާނެ ފުރަތަމަ އިނގިރޭސި ކުޅުންތެރިޔާ އެވެ.
