ޕެރިސް (ޖޫން 6) - ފަޔަށް ލިބިފައިވާ އަނިޔާއިން އެއްކޮށް ރަނގަޅުނުވެ، އިންޖެކްޝަން ޖަހައިގެން ކުޅެން ޖެހޭނަމަ ކުރިއަށް އޮތް ވިމްބަލްޑަން ޓެނިސް މުބާރާތުން ސްޕެއިންގެ މަޝްހޫރު ޓެނިސް ތަރި ރަފައެލް ނަޑާލް ނުފެނުމުގެ ފުރުސަތު އެބައޮތް ކަމަށް ބުނެފި އެވެ.
ނަޑާލް، 36، ވަނީ ރޭ ކެސްޕާ ރޫޑް ބަލިކޮށް 14 ވަނަ ފަަހަރަށް ފްރެންޗް އޯޕަންގެ ތަށި އުފުލާލައިފަ އެވެ. މި ކާމިޔާބީއާ އެކު ނަޑާލްގެ ގްރޭންޑް ސްލޭމް ރެކޯޑް ވަނީ އިތުރަށް ފުރިހަމަވެފަ އެވެ. ނަޑާލް 22 ގްރޭންޑް ސްލޭމް ކާމިޔާބުކޮށް، ރެކޯޑް ހަދާފައިވާއިރު، އޭނާގެ ފަހަތުން ދެން އޮތީ 20 ގްރޭންޑް ސްލޭމް ކާމިޔާބުކުރި ސާބިއާގެ ނޮވަކް ޖޮކޮވިޗާއި ސްވިޒަލެންޑްގެ ރޮޖާ ފެޑެރާ އެވެ.
މި އަހަރުގެ ފުރަތަމަ ދެ ގްރޭންޑް ސްލޭމް، އޮސްޓްރޭލިއަން އޯޕަން އާއި ފްރެންޗް އޯޕަން ކާމިޔާބުކުރީ ނަޑާލް އެވެ. މި މަހު 27 ވަނަ ދުވަހު، އަހަރުގެ ތިން ވަނަ ގްރޭންޑް ސްލޭމް، ވިމްބަލްޑަން ޓެނިސް މުބާރާތް ފަށަން ނިންމާފައިވާއިރު، އެ މުބާރާތުން ނަޑާލް ފެންނާނެތޯ އަންނަނީ ސުވާލު ކުރިމަތިވަމުންނެވެ.
"އަހަރެންގެ ވާތު ފަޔަަށް ލިބިފައިވާ އަނިޔާއިން އެއްކޮށް ރިކަވާ ނުވެހުރެ، މި ދެ ހަފްތާ (ފްރެންޗް އޯޕަން)ގައި މި ކުޅުނީ އިންޖެކްޝަން ޖަހައިގެން، ޔަގީނުން ވެސް މި ގޮތަށް ކުޅެން ޖެހެންޏާ އަހަރެން ވިމްބަލްޑަންގައި ނުފެންނާނެ،" ނަޑާލް ބުންޏެވެ. "އެކަމަކު، އެބައޮތް ރިކަވަރީ އަށް މުއްދަތެއް، ވިމްބަލްޑަން ފެށެން ވާއިރަށް ފިޓްނަސް އަށް ލުޔެއް ލިބިއްޖެނަމަ އަހަރެން ވިމްބަލްޑަންގައި ކުޅޭނަން،"
މިދިޔަ އަހަރު އަނިޔާގެ ސަަބަބުން ނަޑާލް ވިމްބަލްޑަން އާއި ޔޫއެސް އޯޕަންގައި ނުކުޅެ އެވެ. މި އަހަރު އެނބުރި އައިސް ފުރަތަމަ ދެ ގްރޭންޑް ސްލޭމް ކާމިޔާބު ކުރުމާ އެކު ނަޑާލްގެ ސަޕޯޓަރުން އެދެނީ ފަހު ދެ ގްރޭންޑް ސްލޭމްގައި ވެސް ނަޑާލް ފެނުމެވެ. އެކަމަކު، ނަޑާލްގެ ވިސްނުމަކީ އެންމެ ފުރަތަމަ އަމިއްލަ ސިއްހަތަށް އިސްކަން ދިނުމެވެ.
ނަޑާލް އެންމެ ފަހުން، ޓެނިހުގެ އެއް ސީޒަނެއްގައި، ފްރެންޗް އޯޕަން އާއި ވިމްބަލްޑަން އަދި ޔޫއެސް އޯޕަން ކާމިޔާބުކުރީ 2010 ވަނަ އަހަރު އެވެ.
ނަޑާލް އެންމެ ފުރަތަމަ ފަޔަށް ލިބުނު "ކްރޮނިކް" އިންޖަރީ އަކަށް ފަރުވާ ހޯދީ 2005 ވަނަ އަހަރު އެވެ. އެ އަނިޔާއިން އެ ފަހަރު ރިކާވާވިއިރު، ބައެއް ކަންތައްތައް ދިޔައީ އެންމެ ރަނގަޅަށް ކަމަށް ނުވާތީ، ނަޑާލްގެ ކެރިއަރުގެ އެކި ހިސާބުތަކުގައި ވަނީ އެ ފަދަ އަނިޔާތަކާ ތަކުރާރުކޮށް ކުރިމަތިލާން ޖެހިފަ އެވެ.
