މިދިޔަ މާޗް މަހުން ފެށިގެން ކާބޯތަކެއްޗާއި ތެލުގެ އަގު އުފުލެމުން ދާތީ ދުނިޔޭގެ އެންމެ ފަގީރު ގައުމުތަކުން 71 މިލިއަން މީހުން ފަގީރުކަމަށް ވެއްޓިފައިވާ ކަމަށް ޔޫއެންޑީޕީން ބުރާސްފަތި ދުވަހު ޝާއިއު ކުރި ރިޕޯޓެއްގައި ބުނެފި އެވެ.
ޔޫއެންޑީޕީން ނެރުނު ޕްރެސް ރިލީޒެއްގައި ބުނީ ފާއިތުވި ތިން މަހުގެ ތެރޭގައި ތަރައްގީވަމުންދާ ގައުމުތަކުގެ ފަގީރުންގެ ނިސްބަތް އުފުލިފައި ވަނީ "ކޮވިޑް-19 ގެ ޝޮކަށް ވުރެ އެތައް ގުނައެއް އަވަހަށް" ކަމަށާއި އޭގެ ސަބަބުން ޔޫކްރެއިންގައި ކުރާ ހަނގުރާމަ ކަމަށެވެ.
ޔޫއެންޑީޕީން ބުނީ މި ހާލަތާ ގުޅިގެން ހަކަތައިގެ ސަބްސިޑީ ހުރިހާ އެންމެންނަށް ހުޅުވާލައިގެން ދިނުމަށް ވުރެ، ވަކިވަކި ގޭބިސީތަކަށް ޓާގެޓުކޮށްގެން ނަގުދު ފައިސާގެ އެހީ ފޯރުކޮށްދިނުން މާ ރަނގަޅު ވާނެ ކަމަށެވެ. ނަމަވެސް ސަރުކާރުތަކުގެ ހަރަދު ދެކޮޅު ޖެއްސުމަަށް ބައިނަލްއަގްވާމީ ނިޒާމުގެ ތެރެއިން އެހީ ބޭނުން ވާނެ ކަމަށް ބުންޏެވެ.
ޔޫއެންޑީޕީން އިތުރަށް ބުނީ އިންފްލޭޝަން މަތިވާ މައްސަލަ ހައްލު ކުރުމުގެ ގޮތުން މަރުކަޒީ ބޭންކުތަކުން އިންޓްރެސްޓް ރޭޓް މަތި ކުރަމުން ދިޔުމުގެ ސަބަބުން "އިތުރު ފަގީރުކަމުގެ ތެރެއަށް ވެއްޓުނު ނުރައްކާ ބޮޑު" ކަމަށެވެ. އެހެން ވެއްޖެ ނަމަ "މި ކާރިސާ އިތުރަށް ގޯސް ވާނެ" ކަމުގެ އިންޒާރު ދިނެވެ. ޔޫއެންޑީޕީގެ ރިޕޯޓުގައި ބެލީ 159 ގައުމެއްގެ ހާލަތަށެވެ.
"ކުއްލިއަކަށް ތަކެތީގެ އަގު އުފުލުމުގެ މާނައަކީ އިއްޔެ ފަސޭހައިން ގަަނެވުނު ކާބޯތަކެތި، މިއަދު ގޮސް ގަތުމުގެ މާލީ ގާބިލްކަން ނެތުން،" ޔޫއެންޑީޕީގެ ވެރިޔާ އާޗިމް ސްޓެއިނާ ވިދާޅުވި އެވެ.
"ދިރިއުޅުމުގެ ހަރަދު މި ގޮތަށް ބޮޑުވަމުން ދާތީ، އެތައް މިލިއަން ބަޔަކު ފަގީރުކަމާއި ބަނޑުހައި ހޫނުކަމުގެ ތެރެއަށް ވެއްޓުމުން ދަނީ އަންދާޒާ ވެސް ނުކުރެވޭހާ އަވަސް ސްޕީޑެއްގައި. އެއާ އެކު އިޖުތިމާއީ ހަމަޖެހުން ގެއްލިގެން ދިޔުމުގެ ބިރު ދުވަހަކށް ވުރެ ދުވަހެއް ދަނީ ބޮޑުވަމުން."
ރިޕޯޓުގައިވާ ގޮތުން ތަކެތީގެ އަަގު އުފުލުމުގެ އަަސަރު އެންމެ ބޮޑަށް ކުރަމުންދާ ގައުމުތަކުގެ ތެރޭގައި ގާނާ، ކެންޔާ، ރްވާންޑާ، ސޫދާން، ހައިޓީ، ޕާކިސްތާން، ސްރީލަންކާ، އިތިއޮޕިއާ، ނައިޖީރިއާ އަދި ޔަމަން ހިމެނެ އެވެ.
