މިލާން (ޖުލައި 6) - މިިދިޔަ ސީޒަނަށް ފަހު ލިވަޕޫލުން ދޫކޮށްލި ބެލްޖިއަމްގެ ފޯވަޑް ޑިވޮކް އޮރީގީ އިޓާލިއަން ލީގުގެ އެންމެ ފަހުގެ ޗެމްޕިއަން އޭސީ މިލާނާ ގުޅިއްޖެ އެވެ.
ލިވަޕޫލުން އޮރީގީ ދޫކޮށްލީ ކޮންޓްރެކްޓް ހަަމަވުމުންނެވެ. މިދިޔަ ޖެނުއަރީ މަހު އޮރީގީ ގަންނަން ވުލްވްސް އިން 15 މިލިއަން ޑޮލަރު ހުށަހެޅި އެވެ. އެކަމަކު، އެ ވަގުތު ލިވަޕޫލްގެ ދެ ފޯވާޑުން ކަމަށްވާ މުހައްމަދު ސަލާހާއި ސަޑިއޯ މާނޭ ހުރީ އެފްރިކަން ކަޕް އޮފް ނޭޝަންސް ކުޅެން ގައުމީ ޓީމާ އެކު ކަމަށްވާތީ ލިވަޕޫލުން އޮރީގީ މަޑުކުރުވީ އެވެ. މިދިޔަ މަހުގެ ނިޔަލަށް ލިވަޕޫލާއި އޮރީގީގެ ކޮންޓްރެކްޓް ހަމަވެ، ހިލޭ ޓްރާންސްފާއެއްގައި އޭނާ އަށް ކްލަބް ބަދަލުކުރަން ފުރުސަތު ފަހިވީ އެވެ.
މިލާނުން ނެރުނު ބަޔާނެއްގައި ބުނީ އޮރީގީ ،27، އެ ކްލަބާއެކު 2026 ގެ ޖޫން މަހުގެ ނިޔަލަށް ކޮންޓުރެކްޓެއް ހަދާފައިވާ ކަމަށެވެ. މީޑިއާ ރިޕޯޓްތަކުން ބުނާގޮތުގައި އޮރީގީ އަށް މިލާނުން ސީޒަނަށް 4.23 މިލިއަން ޑޮލަރުގެ މުސާރައެއް ދޭނެ އެވެ.
ލިވަޕޫލުން މިދިޔަ ސީޒަނުގެ ޗެމްޕިއަންސް ލީގުގެ ގްރޫޕް ސްޓޭޖުގައި މިލާން ދަނޑުގައި އެ ޓީމު އަތުން މޮޅުވި މެޗުގެ މޮޅު ކުޅުންތެރިއަކަށް ހޮވުނީ އޮރީގީ އެވެ.
ލިވަޕޫލްގައި އޮރީގީ ހޭދަކުރި އަށް އަހަރުގެ ތެރޭގައި އޭނާ ބޮޑަށް ބޭނުންކޮށްފައިވަނީ ބަދަލު ކުޅުންތެރިއެއްގެ ގޮތުގަ އެވެ. އެކަމަކު، ލިބުނު ފުރުސަތުގައި، އޭނާ ވަނީ މުހިންމު ގޯލްތަކެއް ލިވަޕޫލަށް ކާމިޔާބުކޮށްދީފަ އެވެ. އެގޮތުން 2019 ވަނަ އަހަރު ޗެމްޕިއަންސް ލީގުގެ ސެމީ ފައިނަލްގައި ބާސެލޯނާ ކޮޅަށް ޖެހި ދެ ލަނޑާއި، އެ މުބާރާތުގެ ފައިނަލްގައި ޓޮޓެންހަމް ކޮޅަށް ޖެހި ލަނޑު ފާހަގަކޮށްލެވެ އެވެ.
ލިވަޕޫލްގެ ސަޕޯޓަރުންގެ މަގްބޫލު ކުޅުންތެރިއެއް ކަމަށްވާ އޮރީގީ ވަނީ 2014 ވަނަ އަހަރުން ފެށިގެން ލިވަޕޫލަށް 176 މެޗު ކުޅެ، 41 ލަނޑު ޖަހައިފަ އެވެ. އޮރީގީ ލިވަޕޫލަށް ސޮއިކުރީ ލިވަޕޫލްގެ ކޯޗަކަށް ބްރެންޑަން ރޮޖާސް ހުރިއިރު އެވެ.
މިލާނުން އޮރީގީ ގެނައީ އެ ޓީމުގެ ފޯވަޑްލައިން ވަރުގަދަ ކުުރުމަށެވެ. މިދިޔަ ސީޒަންގައި އިޓާލިއަން ލީގު ޗެމްޕިއަންކަން ހޯދި ނަމަވެސް، އެ ޓީމުގެ ގޯލު ޖެހުމުގެ ރެކޯޑް ރަނގަޅެއް ނޫނެވެ. ތަޖުރިބާކާރު ދެ ފޯވަޑުން ކަމަށްވާ ޒްލަޓާން އިބްރަހިމޮވިޗާއި އޮލިވިއޭ ޖިރޫގެ ފަރާތުން މިދިޔަ ސީޒަންގައި ފެނުނީ 19 ގޯލެވެ.
ކަކުލުގެ އަނިޔާއަކަށް ފަރުވާ ހޯދަމުން އަންނަ އުމުރުން 40 އަހަރުގެ އިބްރަހިމޮވިޗް ވަނީ މިލާނާ އެކު ހަދާފައިވާ ކޮންޓްރެކްޓް އިތުރު އަހަރަކަށް އާ ކޮށްފަ އެވެ. އެކަމަކު، މި ކޮންޓްރެކްޓްގެ މުއްދަތުގައި އޭނާ އަށް ކުޅެވޭނީ ގިނަ ވެގެން ދެ ބައިކުޅަ އެއްބައި ކަމަށް ބެލެވެ އެވެ.
