ދުނިޔޭގައި ތަކެތީގެ އަގު އުފުލެމުން ދާތީ ރައްޔިތުންނަށް އެހީވުމުގެ ގޮތުން ސައުދީ އަރަބިއްޔާގެ ސަރުކާރުން 5.3 ބިލިއަން ޑޮލަރު ކަނޑައަޅައިފި އެވެ.
ވަލީ އަހުދު އަމީރު މުހައްމަދު ބިން ސަލްމާން ރިޔާސަތު ބަލަހައްޓަވާ ކައުންސިލް އޮފް އިކޮނޮމިކް އެންޑް ޑިވެލޮޕްމަންޓް އެފެއާޒްގެ ނިންމުމަށް ހުއްދަ ދެއްވީ ރަސްގެފާނު ސަލްމާން ބިން އަބްދުލް އަޒީޒެވެ.
ކައުންސިލްގެ ބައްދަލުވުމުގައި ވަލީ އަަހުދު ވިދާޅުވީ ބައިނަލްއަގްވާމީ މުޖުތަމައުގައި އަންނަަމުންދާ ބަދަލުތަކާ ހެދި ތަކެތީގެ އަގު އުފުލުމުގެ އަސަރު އެންމެ ބޮޑަށް ކުރާނެ ރައްޔިތުންނާ މެދު ވިސްނުން މުހިއްމު ކަމަަށެވެ.
އެ ކައުންސިލުން ކަނޑައެޅި 5.3 ބިލިއަން ޑޮލަރުގެ ތެރެއިން 2.7 ބިލިއަން ޑޮލަރަކީ ނަގުދު ފައިސާގެ އެހީގެ ގޮތުގައި ދޭން ހަމަޖެހުނު ފައިސާ އެވެ. ބާކީ 2.6 ބިލިއަން ޑޮލަރު ހޭދަ ކުރާނީ ސައުދީ އަރަބިއްޔާއަށް ބޭނުންވާ ޒަރޫރީ ތަކެތީގެ ސްޓޮކް ހަމަކުރުމަށެވެ.
ދުނިޔޭގެ ބާޒާރުގައި އަގުތައް މަތިވާން ފެށީ ކޮވިޑް ބަލިމަޑުކަމުގެ އަަސަރު ރަނގަޅަށް އަރައި ނުގަނެވިގެން އުޅެނީސް، ރަޝިއާ އާއި ޔޫކްރެއިންއާ ދެމެދު ހަނގުރާމަ ފެށުމުން ތެލާއި ކާބޯތަކެތީގެ ސަޕްލައިއަށް އަސަރު ކުރުމުންނެވެ.
އޭގެ އިތުރުން މޫސުމީ ބަދަލުގެ އަަސަރުތަކާ ހެދި ވެސް ދަނޑުވެރިކަން ގޯސްވެ، ކާބޯތަކެތީގެ ސަޕްލައިއަށް ދަނީ އަސަަރު ކުރަމުންނެވެ.
