ހުޅުމާލޭ ކޯޓުގެ އިސް މެޖިސްޓްރޭޓް ސިޔާމާ މުހައްމަދުގެ މައްޗަށް ސުލޫކީ މައްސަލައެއް އޮތް ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމާފައިވަނީ ގޯސްކޮށް ކަމަށް ފަނޑިޔާރުންގެ އިސްތިއުނާފް މަޖިލީހުން އިއްޔެ ނިންމައިފި އެވެ.
ޖޭއެސްސީގެ ނިންމުމެއް ފުރަތަމަ ފަހަރަށް ފަނޑިޔާރުންގެ އިސްތިއުނާފް މަޖިލީހުން ބާތިލްކުރިއިރު، އެ މަޖިލީހަކީ ފަނޑިޔާރަކު ވަކިކުރަން ރައްޔިތުންގެ މަޖިލީހަށް ފޮނުވަން ނިންމާ ނިންމުން ފިޔަވައި ޖޭއެސްސީގެ އެހެން ނިންމުންތައް ފަނޑިޔާރުންގެ ފަރާތުން އިސްތިއުނާފް ކުރެވޭ ގޮތަށް އޮންނަ މަޖިލީހެކެވެ.
މަޖިލީހުގައި ތިއްބެވި ފަނޑިޔާރު ހުސްނުއްސުއޫދާއި ފަނޑިޔާރު މުހުތާޒް ފަހުމީ އާއި ފަނޑިޔާރު ޝުއައިބު ހުސައިން ޒަކަރިއްޔާގެ އިއްތިފާގުން ނިންމެވީ މެޖިސްޓްރޭޓް ސިޔާމާގެ މައްޗަށް ތުހުމަތު ކުރެވުނު މައްސަލައަކީ ފަނޑިޔާރުންގެ ސުލޫކާ ހިލާފުވާ އަމަލެއް ނޫން ކަމަށެވެ.
މެޖިސްޓްރޭޓް ސިޔާމާގެ މައްސަލައެއް ޖޭއެސްސީއަށް ހުށަހެޅީ ޕްރޮސެކިއުޓާ ޖެނެރަލް (ޕީޖީ) އޮފީހުންނެވެ. އެއީ ކުށެއްގެ ތުހުމަތެއްގައި ހައްޔަރު ކުރި މީހަކު ދޫކޮށްލީ މެޖިސްޓްރޭޓް ހަގީގަތާ ހިލާފު ވާހަކައެއް ކޯޓު އަމުރުގައި ބަޔާން ކުރުމަށް ފަހު ކަމަށް ބުނެ އެވެ.
އެ މީހަކު ދޫކޮށްލަން މެޖިސްޓްރޭޓް ސިޔާމާ ނެރުނު ކޯޓު އަމުރުގައި ދޫކޮށްލި ސަބަބެއްގެ ގޮތުގައި ވަނީ ކުށުގެ ރެކޯޑު ފިޔަވައި އިތުރު ހެއްކެއް ފުުލުހުން ހުށަހަޅާފައި ނެތުމުންނާއި ތަހުގީގު ނިމިފައިވާ ކަމަށް ފުލުހުންގެ ފަރާތުން ކޯޓަށް ހާޒިރުވި އޮފިސަރު ބުނެފައިވާތީ ކަމަށެވެ.
އޭގައި ސުލޫކީ މައްސަލައެއް އޮތް ކަމަށް ސާބިތުވާ ކަމަށް ކަނޑައެޅުމަށް ފަހު، ޖޭއެސްސީން އަޅާފައިވާ ފިޔަވަޅަކީ އެ ކޮމިޝަނުން ކަނޑައަޅާ ތަމްރީނު ޕްރޮގްރާމެއް މެޖިސްޓްރޭޓް ސިޔާމާ ފުރިހަމަ ކުރަން ޖެހޭ ގޮތަށެވެ.
ފަނޑިޔާރުންގެ އިސްތިއުނާފް މަޖިލީހުން ނިންމާފައިވަނީ ސިޔާމާގެ މައްޗަށް ތުހުމަތު ކުރެވޭ ކަންކަމުގައި ހިމެނެނީ އިޖުރާއީ މައްސަލަތަކެއް ކަމާއި އެފަދަ މައްސަލަތައް މަތީ މަރުހަލާއެއްގެ ކޯޓުގައި އިސްތިއުނާފް ކުރެވޭނެ ކަމުގަ އެވެ. އެކަމަކު އެ މައްސަލަ އިސްތިއުނާފް ކޮށްފައި ނެތްއިރު، އޭގައި ބޭރު ފުށުން ފެންނަ އެއްވެސް ސުލޫކާ ހިލާފު ކަމެއް ފެންނަން ނެތް ކަމަށެވެ.
ޖޭއެސްސީން އެ މައްސަލަ ބެލުމުގައި އަމަލުކުރި އިޖުރައާތުގައި ފާޅުކަން ބޮޑު ބޭ އިންސާފެއް ފެންނަން ނެތް ކަމަށް ވެސް ފަނޑިޔާރު ސުއޫދާއި ފަނޑިޔާރު މުހުތާޒްގެ އަޣުލަބިއްޔަތުން ނިންމެވި އެވެ.
