ރާއްޖޭއި ވެސް ދާއިމީ ބަލިތަކަށް ފަރުވާ ހޯދާ މީހުންނާއި ތަފާތު އެކި ސިއްހީ މައްސަލަތަކުގެ ސަބަބުން އެނދުމަތިވެފައިވާ މީހުންނާއި ހާއްސަ އެހީއަށް ބޭނުންވާ މީހުން ގިނަ އެވެ. މީގެ ތެރޭގައި ބަރާބަރަށް ލޭގެ ޕްރެޝަރާއި ބްލަޑް ޝުގާ ބަލަން ޖެހޭ މީހުންނާއި މެޑިކަލް ވަސީލަތެއްގެ ބޭނުން އަބަދުކުރަން ޖެހޭ މީހުން ވެސް ހިމެނެ އެވެ.
މިހެން އުނދަގޫ ދިރިއުޅުމެއް އުޅެންޖެހޭ މީހުންގެ ދިރިއުޅުން ފަސޭހަކޮށްދެނީ މެޑިކަލް ޓެކްނޮލޮޖީއަށް އަންނަ ކުރިއެރުމާއި އެ ޓެކްނޮލޮޖީ ބޭނުންކޮށްގެން އުފައްދާ ވަސީލަތްތަކެވެ. މި ޓެކްނޮލޮޖީތަކަކީ ބައެއް ގައުމުތަކުގައި ފަސޭހައިން ލިބެން ހުންނަ އެއްޗެއް ނަމަވެސް ރާއްޖެ ފަދަ ގައުމުތަކުގައި ހޯދަން ދައްޗެވެ. ލިބެން ހުއްޓަސް އަތްފޯރާފަށުގައި ލިބެނީ މަދު ފަހަރަކު އެވެ.
މީގެ 12 އަހަރު ކުރިން ވުޖާދަށް ގެނައި މެޑްޓެކް އުފެއްދުމުގެ މައިގަނޑު މަގުސަދަކަށްވީ މެޑިކަލް ވަސީލަތްތައް ރާއްޖެ ގެނެސް މުޅި ސިއްހީ ނިޒާމު ބަދަލުކޮށްލުމެވެ. އެ މަސައްކަތުގެ ތެރެއިން ކުރި ދިގު އުނދަގޫ ދަތުރުގެ ތެރެއިން އެ ކުންފުނިން ވަނީ ގިނަ ކާމިޔާބީތަކެއް ހޯދާފަ އެވެ. މެޑްޓެކުން އެންމެ ފަހުން ހުޅުވި މެޑްޓެކް ހޯމްކެއާ ޝޯރޫމްއަކީ މި ކާމިޔާބީގެ ތެރެއަށް އިތުރުވީ ބޮޅެކެވެ.
މެޑްޓެކްގެ ހޯމްކެއާ ފިހާރަ
ސިއްހީ މައްސަލަތައް ދިމާވެފައިވާ މީހުންނަށް ގޭގައި އަމިއްލައަށް ބޭނުންކުރެވޭނެ ވަސީލަތްތަކަށް ހާއްސަ މި ފިހާރައިން ފަހުގެ ގިނަ މެޑިކަލް އާލާތްތަކާއި ވަސީލަތްތައް ލިބެ އެވެ. އޭގެ ތެރޭގައި މުޅިން ވެސް ހިމެނެނީ އެމެރިކާ އާއި ޔޫރަޕުގެ ނަން މަޝްހޫރު ބްރޭންޑުތަކުން އެންމެ ފަހުން ބާޒާރަށް ނެރުނު އުފެއްދުންތަކެވެ.
ހިނގާބިނގާވެ ނޫޅެވޭ މީހުންނާއި ހަރަކާތްތެރިވެ އުޅުމަށް ދަތި މީހުންނަށް ދުއްވާ ގޮނޑިއާއި، އެނދުމަތިވެފައިވާ ބަލި މީހުން ބާއްވާ އެނދާއި ބޭނުންވާ މެޝިނުތަކާއި ހަކުރު ބަލީގެ މީހުންނާއި ނޭވާލާ ނިޒާމުގެ ބަލިތައް ދިމާވެފައިވާ މީހުންނަށް ހާއްސަ އާލާތްތައް މި ފިހާރައިގައި ހުރެ އެވެ. އެންމެ ބޮޑު ސަމާލުކަމެއް ދިނީ ވެސް މިހާރު ރާއްޖޭގައި އެންމެ ބޭނުންޖެހިފައިވާ އަމާޒުކޮށްގެން އެ އާލާތްތައް ފަސޭހައިން ލިބޭނެ ގޮތެއް ހެދުމެވެ.
އެގޮތުން ހާއްސަ އެހީއަށް ބޭޏުންވާ މީހުންނަށް ތަންތަނަށް ދިޔުމުގައި ލުއިފަސޭހާ ކޮށްދިނުމުގެ ގޮތުން އުފައްދާފައިވާ އެންމެ ޒަމާނީ މޮޓޮރައިޒްޑް ވީލް ޗެއާ އާއި ސްކޫޓަރު ލިބެން އެބަހުއްޓެވެ. ނޭވާލާ ނިޒާމުގެ ބަލިތަކަށް ފަރުވާ ހޯދާ މީހުންނާ ގޭގައި އޮކްސިޖަން ތެރަޕީ ދޭން ބޭނުންކުރާ އޮކްސިޖަން ކޮންސަންޓްރޭޓާ އާއި ނެބިއުލައިޒާ އާއި ބައިޕެކް ވެސް ލިބެން ހުންނާނެ އެވެ.
އޭގެ އިތުރުން އަވަސް ފަރުވާގައި ބޭނުންކުރާ ފަސްޓް އެއިޑް ކިޓާއި ޑިސްއިންފެކްޓަންޓާއި މާބަނޑު އަންހެނުންނަށް ބޭނުންވާ "މަދާ އެންޑް ބޭބީ ކެއާ"ގެ ކޮލިޓީ ޕްރޮޑަކްޓުތަކުގެ އިތުރުން އެނދުމަތިވެފައިވާ މީހުން ބަލަހައްޓާ ފަރުވާދޭން ބޭނުންވާ ފުލް ރޭންޖު މިތަނުން ލިބެން އެބަހުއްޓެވެ.
މި ހުރިހާ ޕްރޮޑަކްޓެއްގެ މެއިންޓެނަންސާއި ރިޕެއާގެ ހިދުމަތް ވެސް ފޯރުކޮށްދެނީ މެޑްޓެކުންނެވެ. ބައެއް ވަސީލަތްތައް އެންސްޕާ މެދުވެރިކޮށް ގަނެވޭނެ އިންތިޒާމު ވެސް ވަނީ ހަމަޖެހިފަ އެވެ.
titledesc
