ޗައިނާގެ މެދުތެރޭގައި އޮންނަ އަންހުއި ޕްރޮވިންސްގައި ހޯމަ ދުވަހު ކޮވިޑްގެ 300 ކޭސް ރިޕޯޓުކޮށްފައި ވަނިކޮށް، 1.7 މިލިއަން މީހުންނާ އެކު ބޮޑު ސަަރަހައްދެއް ލޮކްޑައުންކޮށްފި އެވެ.
ކޮވިޑް އެއްކޮށް ނައްތާލުމުގެ ސިޔާސަތެއް ގެންގުޅޭ ހަމައެކަނި ބޮޑު ގައުމަކީ މިހާރު ޗައިނާ އެވެ. އެހެންވެ، ލޮކްޑައުން ކުރުމާއި، އެކަހެރި ކުރުމާއި، ގިނަ ބަޔަކު އެއް ފަހަރާ ޓެސްޓު ކުރުން ކުރިއަށް ގެންދެ އެވެ.
އަންހުއިގައި ކޮވިޑް ފެތުރެން ފަށައި 100 އެއްހާ ކޭސް ރިޕޯޓު ކުރީ މިދިޔަ ހަފްތާގަ އެވެ. ވެރިރަށް ބެއިޖިން އާއި ޝަންހާއީގެ ހިސާބުތައް ގިނަ ދުވަސްތަކަށް ލޮކްޑައުން ކުރުމުން އިގްތިސާާދަށް ވަނީ އަސަރު ކުރަން ފަށާފަ އެވެ.
ބެއިޖިން އާއި ޝަންހާއީ އެނބުރި ނޯމަލް ހާލަތަށް ދާން ފަށާފައި ވަނިކޮށް އަންހުއިގެ ކޭސްތައް ފެނުމުން މިދިޔަ ހަފްތާގައި ލޮކްޑައުން ކުރީ ސިޒިއާން އަދި ލިންގްބީ ހިސާބެވެ. އެ ދެ ހިސބުގެ 1.7 މިލިއަން މީހުންނަށް ގެއިން ނިކުމެވޭނީ ޓެސްޓު ކުރަން އެއްބަސްވެގެން ކަމަށް ވަނީ އަންގާފަ އެވެ.
އެ ޕްރޮވިންސްގެ ޖުމްލަ ކޭސްތަކުގެ އަދަދު މިހާރު އުޅެނީ 1000 އަށް ވުރެ މަތީގަ އެވެ. ގިނަ ކޭސްތަކުގައި ބަލީގެ އެއްވެސް އަލާމާތެއް ނުފެނެ އެވެ. އަންހުއި ކައިރީގައި އޮންނަ ޖިއާންގްސޫ ޕްރޮވިންސުން ވެސް ހޯމަ ދުވަހު 56 ކޭސް ރިޕޯޓުކުރި އެވެ.
