އިނގިރޭސި ސިފައިންގެ ޔޫޓިއުބާއި ޓްވިޓާ އެކައުންޓް ހެކްކުރި މައްސަލަ ތަހުގީގު ކުރަން ފަށައިފި އެވެ.
ބިލިއަނަރު އެލޮން މަސްކް ފެންނަ ކްރިޕްޓޯކަރެންސީއާ ގުޅޭ ވީޑިއޯތައް ޔޫޓިއުބް ޗެނަލްގައި ހެކަރުން ޕޯސްޓު ކުރި އެވެ. ޓްވިޓާ އެކައުންޓުން ވަނީ އެންއެފްޓީއާ ގުޅޭ ޕޯސްޓްތަކެއް ރީޓްވީޓްކޮށްފަ އެވެ.
އެކައުންޓްތައް ހެކްކުރިކަން ފާހަގަކޮށް އިނގިރޭސި ސިފައިން ބުނީ އިންފޮމޭޝަން ސެކިއުރިޓީއާ ގުޅޭ ކަންކަން "ވަރަށް ސީރިއަސްކޮށް" ނަގާ ކަމަށާއި މައްސަލަ ހައްލު ކުރުމުގެ މަސައްކަތް ކުރަމުންދާ ކަމަށެވެ.
މިހާރު އެ ދެ އެކައުންޓް ވެސް ވަނީ ރިސްޓޯކޮށްފަ އެވެ. ސިފައިންގެ ތަރުޖަމާނަކު ބުނީ އެކަން ހިނގި ގޮތް ބަލަން ތަހުގީގެއް ފަށާފައިވާ ކަމަށެވެ. އެ އެކައުންޓްތައް ހެކްކުރުމުގެ ފަހަތުގައި ވަނީ ކޮން ބަޔެއް ކަމެއް ނޭނގެ އެވެ.
މީގެ ކުރިން ވެސް ޓްވިޓާގައި ބައެއް ހައި ޕްރޮފައިލް އެކައުންޓްތަކަށް ހެކަރުން އަމާޒުކޮށްފައިވެ އެވެ. އެގޮތުން ޖުލައި 2020 ވަނަ އަހަރު އެމެރިކާގެ ބައެއް ޓްވިޓާ އެކައުންޓްތައް ހެކްކުރުމުގެ ފަހަތުގަައި ތިބީ ބިޓްކޮއިން ސްކޭމް ހިންގާ ބަޔެކެވެ.
އެ ފަހަރު ހެކްކުރި އެކައުންޓްތަކުގެ ތެރޭގައި މަހުޖަނުން އެލޮން މަސްކް، ޖެފް ބެޒޯސް، ބިލް ގޭޓްސް އަދި ކުރީގެ ރައީސް ބަރަކް އޮބާމާ އާާއި މިހާރުގެ ރައީސް ޖޯ ބައިޑެން އަދި ސެލެބްރިޓީ ކާންޔޭ ވެސްޓްގެ އެކައުންޓްތައް ހިމެނެ އެވެ.
