ޕްރޮޓޮޓައިޕް ސެޓެލައިޓް ހަދާ ޓެސްޓު ކުރުމަށްޓަކައި، ރާއްޖޭގެ އަމިއްލަ އިންސްޓިޓިއުޓެއް ކަމަށްވާ އިންސްޓިޓިއުޓް ފޯ ގްލޯބަލް ސަކްސެސް (އައިޖީއެސް) އިން ފުރަތަމަ ސްޕޭސް ޓީމް އެކުލަވާލައިފި އެވެ.
އިލްމީ ގޮތުންނާއި ހުނަރުގެ ގޮތުން ގައުމީ ފެންވަރުގައި ފާހަގަކޮށްލެވޭ ގިނަ ޒުވާނުން ހިމެނޭ މި ޓީމުގައި، އެއިރޮސްޕޭސް އިންޖިނިއަރުންނާއި އިލެކްޓްރިކަލް، އިލެކްޓްރޯނިކްސް އަދި މެކޭނިކަލް އިންޖިނިއަރުންގެ އިތުރުން ކޮމްޕިއުޓަ ސައިންސް ދާއިރާގެ ގްރެޖުއޭޓުން ހިމެނޭ ކަމަށް އައިޖީއެސް އިން ބުނެ އެވެ.
ފުރަތަމަ ސްޕޭސް ޓީމްގެ މެންބަރުން
- ހުސައިން އައްސަދު، ރ. އަލިފުށި
- ހުސައިން ރިޒާމް، މާލެ
- އަހްމަދު އިޖާޒް އަބްދުالله، އއ. ބޮޑުފުޅަދޫ
- މަރިޔަމް މަހްރޫސާ އަބްދުއްރަހްމާން، މާލެ
- މަރިޔަމް ޝިމާނަތު، ގދ. ރަތަފަންދޫ
- މުހައްމަދު އަޝްހަމް މުޖުތަބާ، މާލެ
- މުހައްމަދު ޖުނައިދު، ހއ. އިހަވަންދޫ
އައިޖީއެސްގެ ޗެއާމަން އަދި ސީއީއޯ ރިފްއަތު މުހައްމަދު ވިދާޅުވީ އެ ޓީމުން މިހާރު ވަނީ، ނެނޯސެޓެލައިޓް އިންޖިނިއަރިން ޕްރޮފެޝަނަލް ކޯސް ފުރިހަމަ ކޮށްފަ އެވެ. ސެޓެލައިޓް ޑިޒައިންކޮށް، ބިލްޑްކޮށް، ލޯންޗްކޮށް ސައިންޓިފިކް ރިސާޗް ހަދަން ދަސްކޮށްދޭ މިކޯސް ކުރިއަށް ގެންގޮސްފައިވަނީ އެމެރިކާގެ ކޭއެސްއެފް ސްޕޭސް ފައުންޑޭޝަނުންނެވެ.
"ޓީމު ތަމްރީނުކޮށް ނިންމައި، ސެޓެލައިޓް ޑިޒައިން ފައިނަލްކޮށް، ހާޑުވެއާ އޯޑަރު ކުރެވިއްޖެ. ކޮވިޑުގެ ބަލިމަޑުކަމާ، އިގްތިސާދީ ދަތިތަކާ ލޮކްޑައުންގެ ގޮންޖެހުމާ އެކުވެސް އަޅުގަނޑުމެންނަށް ކާމިޔާބު މަސައްކަތްތަކެއް ކުރެވިއްޖެ،" ރިފްއަތު ވިދާޅުވިއެވެ. "މި މިޝަންގެ މަސައްކަތް ތާވަލާ އެއްގޮތަށް ބަރާބަރަށް ކުރިއަށްދޭ."
ވައިކުޑާގެ އެހީގައި ޖައްވަސް އުދުއްސާ، ޕްރޮޓޮޓައިޕް ސެޓެލައިޓް ގެ ބޭނުމަކީ ދުނިޔެ ހޫނުވުމާއި މޫސުމަށް އަންނަ ބަދަލުތައް ދެނެގަތުމަށް ބޭނުންވާ މައުލޫމާތު އަޖުމަބެލުމުގެ ގޮތުން އެއްކުރުމެވެ.
ރާއްޖޭގެ ފުރަތަމަ ސްޕޭސް މިޝަންގެ މެއިން ޕާޓްނަރަކީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އެވެ.
ރާއްޖޭގައި ސްޕޭސް ސައިންސް ކުރިއެރުވުމަށް މަސައްކަތް ކުރާ އައިޖީއެސް އިން ވަނީ ކެނޭޑިއަން ސްޕޭސް އެޖަންސީ އާ ގުޅިގެން ޖޫނިއާ އެސްޓްރޮނޯޓް އުފެއްދުމުގެ ޕްރޮގްރާމެއް ވެސް ދިވެހި ދަރިވަރުންނަށް ކުރިއަށް ގެންގޮސްފަ އެވެ. އެ ޕްރޮގްރާމް 32 ދަރިވަރުން ފުރިހަމަކޮށްފައިވެ އެވެ.
