ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ހެއްކާ ބެހޭ ބިލުގައި ހުރި ކަންބޮޑުވުންތަކާ ގުޅިގެން ރައްޔިތުންގެ މަޖިލިސް އިދާރާ ކުރިމަތީގައި ނޫސްވެރިން ސުލްހަވެރި އިހުތިޖާޖެއް ކޮށްފި އެވެ.
އެ ބިލު ރައްޔިތުންގެ މަޖިލީހުގެ ޖުޑިޝަރީ ކޮމިޓީން ދިރާސާކުރި ބިލުގައި ގާނޫނުއަސާސީން ނޫސްވެރިންނަށް ދީފައިވާ މަސްދަރު ރައްކާތެރިކުރުމުގެ ހައްގު ހަނިކުރަން ވަނީ ހިމަނާފަ އެވެ. އެގޮތުން, ބައެއް ހާލަތްތަކުގައި ޝަރުއީ ކޯޓަކަށް ނޫސްވެރިޔާގެ މަސްދަރު ހާމަކުރަން އެންގުމުގެ ބާރު އެ ބިލުން ވަނީ ލިބިދީފަ އެވެ.
އެގޮތުން, މިހާރު ބިލް ފާސްކޮށްފައި އޮތް ގޮތުން ޓެރަރިޒަމް އަދި ގައުމީ ސަލާމަތާ ގުޅޭ މައްސަލަތަކުގައި މަސްދަރު ހާމަކުރުމަށް ކޯޓަށް ނޫސްވެރިޔާގެ މައްޗަށް އަމުރު ކުރެވިދާނެ އެވެ. ގައުމީ ސަލާމަތަކީ, އެއްވެސް ގާނޫނެއްގައި މާނަކޮށްފައިނުވާ ވަރަށް ފުޅާ ގޮތެއްގައި ދޫކޮށްލާފައިވާ ކަމެއްކަމުން, އެކަމުގެ ކަންބޮޑުވުން ނޫސްވެރިންގެ ވަރަށް ބޮޑަށް އެބަ އޮތެވެ.
މޯލްޑިވްސް ޖާނަލިސްޓު އެސޯސިޝަން (އެމްޖޭއޭ) އިސް ނަގައިގެން, މިއަދު މަޖިލީހުގެ އިދާރާ ދޮށުގައި އެއްވެ އަޑު އުފުލީ, މަސްދަރު ހާމަކުރުމުގެ މާއްދާ އިސްލާހުނުކޮށް ބިލް ފާސްނުކުރުމަށެވެ. އެކަމުގައި ބައިވެރިވި ނޫސްވެރިން ވަނީ ބިލުގައި ގައުމީ ސަލާމަތް މާނަކުރާ ގޮތް ހާމަކުރުމަށާއި ބިލާއި މެދު ނޫސްވެރިންގެ ހުރި ކަންބޮޑުވުންތައް އަޑުއެހުމަށް ވެސް ގޮވާލާފަ އެވެ. އަދި ބިލު ފާސްކުރުން ފަސްކުރުމަށް ވެސް ވަނީ ގޮވާލާފަ އެވެ.
މަޖިލިސް ކުރިމަތީ ތިބި ނޫސްވެރިންނާ ވާހަކަ ދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ އެ ބިލު ކޮމެޓީގައި އޮންނަތާ މިހާރު ހަ މަސް ވެފައިވާ ކަމަށާއި އެ މާއްދާ ބާތިލް ކުރަން ނޫސްވެރިން ބޭނުންނަމަ ކުރެވޭނެ ކަމަށެވެ.
"ތި ބޭފުޅުންނަށް އެނގިވަޑައިގަންވަން ޖެހޭނެ މިއީ މަޖިލީހުގެ ފުރަތަމަ ކިޔުމެއް ނޫން، މިއީ ތިންވަނަ ކިޔުން. އަޅުގަނޑަށް ޔަގީން އެއްވެސް މެމްބަރަކު ނޫސްވެރިންގެ ޝަކުވާތައް ބަލައިގަންނަން ނޫން ގޮތަކަށް ނުތިބޭނެ،" ނަޝީދު ވިދާޅުވި އެވެ.
އެ ބިލަށް ދެން އޮންނާނެ ހައްލަކީ ބިލު ފާސް ކުރުމުން އަލުން އިސްލާހު ކުރުމަށްލުން ކަމަށެވެ. އެކަމާ ދެކޮޅަށް ނޫސްވެރިން ވަނީ ވާހަކަ ދައްކާފަ އެވެ. އެއީ ދިގު އަދި އުނދަގޫ ކަމެއް ކަމަށެވެ.
މިކަމާ ގުޅިގެން އެމްޖޭއޭއިން ބުނި ގޮތުގައި, ބިލް ކޮމިޓީން ފާސްކޮށްފައިވަނީ އެ ޖަމިއްޔާގެ ހިލާލުތައް ހުށަހެޅުމަށް ވަގުތުކޮޅެއް ދިނުމަށް އެދިފައިވަނިކޮށެވެ. އެ ޖަމިއްޔާއިން މަޖިލީހަށް ހިޔާލު ފޮނުވީ ބޭރުގެ ތަޖުރިބާރުންގެ މަޝްވަރާގެ މަތިންނެވެ. މިހާރު މާއްދާ އޮތް ގޮތަކީ, އައިއެފްޖޭ އަދި އެމްނެސްޓީން ވެސް ކަންބޮޑުވާ ކަމެއްގެ ގޮތުގައި އެމްޖޭއޭއިން ފާހަގަކުރެ އެވެ.
އެމްޖޭއޭއިން ހުށަހެޅި ކަރުދާސް ބިނާކޮށްފައިވަނީ, ބްރިޓިޝް ހައި ކޮމިޝަންގެ އެހީގެ ދަށުން އެލިނިއާ އިންޓަނޭޝަނަލް އިން ރާއްޖޭގައި ހިންގަމުން އަންނަ ކޮމިއުނިކޭޝަންސް ގަވަނަންސް ޕްރޮޖެކްޓްގެ ކޮންސަލްޓަންޓް، ޑރ. ޖޮއޭން ބަރާތާގެ މަޝްވަރާގެ މަތިންނެވެ.
