ނޫސްވެރިކަމުގެ މަސައްކަތުގައި ބޭނުންކުރާ މަސްދަރުތައް ހިމާޔަތްކުރުމަށް ގާނޫނުއަސާސީން ލިއްބައިދޭ ހައްގު ހަނިކުރަން ގާނޫނުގައި ހިމަނަން މަސައްކަތް ކުރަމުންދާނީ ނޫސްވެރިންގެ ހިޔާލުތަކަށް ބެލުމެއް ނެތި ކަމަށް ބުނެ ދުނިޔޭގެ ނޫސްވެރިންގެ އެންމެ ބޮޑު ޔުނިއަން، އިންޓަނޭޝަނަލް ފެޑެރޭޝަން އޮފް ޖާނަލިސްޓް (އައިއެފްޖޭ) އިން ކަންބޮޑުވެއްޖެ އެވެ.
ސަރުކާރުގެ ފަރާތުން ހުށަހަޅާފައިވާ ހެއްކާ ބެހޭ ބިލު ރައްޔިތުންގެ މަޖިލީހުގެ ޖުޑިޝަރީ ކޮމިޓީން ދިރާސާކުރަމުންދާއިރު, އެ ބިލުގައި ގާނޫނުއަސާސީން ނޫސްވެރިންނަށް ދީފައިވާ މަސްދަރު ރައްކާތެރިކުރުމުގެ ހައްގު ހަނިކުރަން ވަނީ ހިމަނާފަ އެވެ. އެގޮތުން, ބައެއް ހާލަތްތަކުގައި ޝަރުއީ ކޯޓަކަށް ނޫސްވެރިޔާގެ މަސްދަރު ހާމަކުރަން އެންގުމުގެ ބާރު އެ ބިލުން ވަނީ ލިބިދީފަ އެވެ.
މީގެކުރިން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި މޯލްޑިވްސް މީޑިއާ ކައުންސިލް (އެމްއެމްސީ) އިން ވަނީ އެ މާއްދާ އެއްކޮށް އުނިކޮށް ދިނުމަށް ޖުޑިޝަރީ ކޮމިޓީގައި އެދިފަ އެވެ. ނަމަވެސް, ކޮމިޓީން އެ ހުށަހެޅުން ބަލައިނުގަނެ, މަސްދަރު ހާމަކުރުމުގެ މާއްދާ އިސްލާހުކޮށް އެއަށް ކޮމެންޓް ކުރުމަށް އެމްޖޭއޭ އަދި އެމްއެމްސީއަށް ފޮނުވާފައިވެ އެވެ.
މަސްދަރު ހާމަކުރުމުގެ މާއްދާ ކޮމިޓީން މިހާރު ޑްރާފްޓް ކޮށްފައި އޮތް ގޮތް ވެސް ބަދަލުކޮށް, މަސްދަރު ހާމަކުރުން އެންގުމަކީ ވަރަށް ނާދިރު ހާލަތެއްގައި ނޫނީ ނުކުރެވޭނެ ކަމެއްކަން ޔަގީންކުރުމަށް އެމްޖޭއޭއިން އިއްޔެ ވަނީ މަޖިލީހަށް ކަރުދާހެއް ހުށަހަޅާފަ އެވެ. މިފަދަ ކަރުދާހެއް އެމްއެމްސީން ވެސް މަޖިލީހަށް ހުށަހެޅި އެވެ.
އެގޮތުން, ޓެރަރިޒަމްގެ ވަކި ހާއްސަ ކުށްތަކަކާ ގުޅޭ މަސްދަރެއް ނޫނީ ހާމަކުރަން ނޭންގޭނެ ގޮތަށް އިސްލާހު ކުރުމާއި އެ ހާލަތުގައި ވެސް ގިނަ ކަންތައްތަކެއް ސާބިތު ކުރެވިގެން މެނުވީ ނޫސްވެރިޔާގެ މަސްދަރު ހާމަކުރަން ކޯޓަކަށް އެންގިގެން ނުވާނެކަމުގެ ޔަގީންކަން ބިލުގައި ހިމެނުމަށް އެމްޖޭއޭގެ ހިޔާލު ކަރުދާހުގައި ހިމަނާފައިވެ އެވެ.
އެމްޖޭއޭއިން ހުށަހެޅި ކަރުދާސް ބިނާކޮށްފައިވަނީ, ބްރިޓިޝް ހައި ކޮމިޝަންގެ އެހީގެ ދަށުން އެލިނިއާ އިންޓަނޭޝަނަލް އިން ރާއްޖޭގައި ހިންގަމުން އަންނަ ކޮމިއުނިކޭޝަންސް ގަވަނަންސް ޕްރޮޖެކްޓްގެ ކޮންސަލްޓަންޓް، ޑރ. ޖޮއޭން ބަރާތާގެ މަޝްވަރާގެ މަތިންނެވެ.
ޑރ. ބަރާތާއަކީ ހިޔާލުފާޅުކުރުމާއި ނޫސްވެރިކަމުގެ މިނިވަންކަމުގެ އިތުރުން ނޫސްވެރިންގެ ރައްކާތެރިކަމާ ބެހޭ މައްސަލަތަކުގައި ކައުންސިލް އޮފް ޔޫރަޕް, ޔުނެސްކޯ، އޯގަނައިޒޭޝަން އޮފް އެމެރިކަން ސްޓޭޓްސް އަދި އޯގަނައިޒޭޝަން ފޯ ސެކިއުރިޓީ އެންޑް ކޯޕަރޭޝަން އިން ޔޫރަޕް (އޯއެސްސީއީ) ފަދަ ބައިނަލްއަގުވާމީ މުއައްސަސާތަކަށް ލަފާދޭ ތަޖުރިބާކާރެކެވެ.
ނަމަވެސް, އެ ހިޔާލު ކަރުދާސް އިއްޔެ މަޖިލީހަށް ފޮނުވުމުގެ ކުރިން ޖުޑިޝަރީ ކޮމިޓީން ވަނީ ހެއްކާ ބެހޭ ބިލް އެއްކޮށް ފާސްކޮށްފަ އެވެ. މަސްދަރު ހާމަކުރުމުގެ މާއްދާއާމެދު ބޮޑެތި ކަންބޮޑުވުންތަކެއް އޮތްވައި, މިއަދު މަޖިލީހުގެ ތަޅުމުން އެ ބިލް ފާސްކުރުމަށް ދަނީ މަސައްކަތް ކުރަމުންނެވެ.
އެކަމާ ގުޅިގެން އައިއެފްޖޭއިން ބުނީ ނޫސްވެރިކަމަށް ހުރަސްއެޅޭނެ މާއްދާއެއް ފާސްކުރުމުގެ ކުރިން އެމްޖޭއޭގެ ހިޔާލުތަކާއި ކަންބޮޑުވުންތަކަށް މަޖިލީހުން ރިއާޔަތް ކުރަން ޖެހޭނެ ކަމަށެވެ. އައިއެފްޖޭއިން މި ކަންބޮޑުވުން ފާޅުކުރިއިރު, އެމްޖޭއޭއިން ވެސް ވަނީ މަސްދަރު ހާމަކުރުމުގެ މާއްދާ އިސްލާހު ނުކޮށް ފާސްނުކުރުމަށް އެދި މަޖިލީހުގެ ރައީސް މުހައްމަދު ނަޝީދަށް ސިޓީއެއް ފޮނުވާފަ އެވެ.
އެ ސިޓީގައި ބުނެފައިވާ ގޮތުގައި މިހާރު މާއްދާ އޮތް ގޮތުން މަސްދަރު ހާމަކުރަން ނޫސްވެރިންނަށް އެންގުމުގެ ފުރުސަތު ވަރަށް ފުޅާ ގޮތެއްގައި ކޯޓުތަކަށް ވަނީ ހުޅުވިފަ އެވެ. އެކަމުގެ ސަބަބުން ނޫސްވެރިންނަށް މައުލޫމާތު ދިނުމަށް މީހުން ފަސްޖެހި ނޫސްވެރިންނަށް ބޮޑެތި އަދަބުތަކާ ކުރިމަތިލާން ޖެހުމުގެ ފުރުސަތު ބޮޑެވެ.
އެމްޖޭއޭއިން ބުނި ގޮތުގައި, ބިލް ކޮމިޓީން ފާސްކޮށްފައިވަނީ އެ ޖަމިއްޔާގެ ހިލާލުތައް ހުށަހެޅުމަށް ވަގުތުކޮޅެއް ދިނުމަށް އެދިފައިވަނިކޮށެވެ. އެ ޖަމިއްޔާއިން މަޖިލީހަށް ހިޔާލު ފޮނުވީ ބޭރުގެ ތަޖުރިބާރުންގެ މަޝްވަރާގެ މަތިންނެވެ. މިހާރު މާއްދާ އޮތް ގޮތަކީ, އައިއެފްޖޭ އަދި އެމްނެސްޓީން ވެސް ކަންބޮޑުވާ ކަމެއްގެ ގޮތުގައި އެމްޖޭއޭއިން ފާހަގަކުރެ އެވެ.
"މި އެސޯސިއޭޝަނުން އެދެނީ މި ޖަމިއްޔާގެ ކަރުދާހުގައި ހުށަހަޅާފައިވާ އިސްލާހުތަކަށް ރިއާޔަތްކޮށްފައި ނޫނީ ބިލް މަޖިލީހުގެ ތަޅުމުން ފާސްނުކުރުމަށް" ސިޓީގައިވެ އެވެ.
