ރާއްޖޭގައި ކުރިން ހިއްކާފައިވާ ބޮޑެތި ބިންތައް އަދި ވެސް ބޭނުން ނުކޮށް އެބަހުރި ކަމަށާއި ބޭކާރު ގޮތުގައި ބިންތައް ހިއްކުން ހުއްޓައިލަން ޖެހޭ ކަމަށް އެންވަޔަރްމެންޓް ޕްރޮޓެކްޝަން އެޖެންސީ (އީޕީއޭ) އިން މިއަދު ބުނެފި އެވެ.
ރައްޔިތުންގެ މަޖިލީހުގެ އެންވަޔަރްމެންޓް އެންޑް ކްލައިމެޓް ޗޭންޖް ކޮމިޓީން މިއަދު ބޭއްވި ބައްދަލުވުމެއްގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުން އީޕީއޭގެ ޑިރެކްޓަރް ޖެނެރަލް އިބްރާހީމް ނައީމް ވިދާޅުވީ ހިއްކި ގިނަ ބިންތަކެއްގެ ބޭނުން އެކަށީގެންވާ ވަރާ ގާތަށް ވެސް ކޮށްފައި ނުވާ ކަމަށެވެ. އެގޮތަށް ހިއްކާފައި ބޭނުން ނުކޮށް ފަންސާހަށް ވުރެ ގިނަ ބިން އެެބަ އޮތް ކަމަށް އޭނާ ވިދާޅުވި އެވެ. ނައީމް ވިދާޅުވީ ބިން ހިއްކާއިރު އެއީ ހަމަ ހަގީގަތުގައި ވެސް ރަނގަޅު ބޭނުމަކަށް ހިއްކާ ތަނެއްކަން ކަށަވަރުކުރަން ޖެހޭ ކަމަށެވެ.
"ހިއްކާގައި ބޮޑެތި ބިންތައް ދޫކޮށްލާފައި، އެއްވެސް ކަމެއް ނުކޮށް ހަމަ ވިނަފަޅާލާފައި އޮންނަ ގޮތަށް ދޫކޮށްލާފައި އޮންނަ އޮތުން އަޅުގަނޑުމެން އެބަ ޖެހޭ ނިމުކަކަށް ގެންނަން،" ނައީމް ވިދާޅުވި އެވެ.
އެންވަޔަރްމެންޓް ކޮމިޓީގެ މިއަދުގެ ބައްދަލުވުމުގައި އީޕީއޭއާއި ބައެއް މަދަނީ ޖަމިއްޔާތަކުގެ މަންދޫބުން ބައިވެރިކޮށްގެން މަޝްވަރާކުރީ އައްޑޫން ބޮޑު ބައެއް ހިއްކައިގެން، ސަރުކާރުން ކުރިއަށް ގެންދަން އުޅޭ މަޝްރޫއަކާ މެދު މަދަނީ ޖަމިއްޔާތަކަކުން ހުށަހަޅާފައިވާ މައްސަލައަކާ ގުޅިގެންނެވެ.
ތިމާވެށި ހިމާޔަތްކުރަން މަސައްކަތްކުރާ އެ ޖަމިއްޔާތަކުގެ އިސް ފަރާތައް ބައިވެރިވި އެ ބައްދަލުވުމުގައި ކޮމިޓީގެ މެމްބަރު އަދި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު އީޕީއޭއާ ކުރެއްވި ސުވާލުގައި އެއްސެވީ މިހާރު ބޭނުންކުރަމުން އަންނަނީ ހިއްކި ބިންތަކުގެ ކިހާ މިންވަރެއްތޯ އެވެ.
އެ ސުވާލަށް ޖަވާބު ދެއްވަމުން ނައީމް ވިދާޅުވީ 50 އަށް ވުރެ ގިނަ ރަށްރަށުގައި ބިން ހިއްކާފައި ބޭނުން ނުކޮށް އެބަހުރި ކަމަށެވެ.
"ފަންސާހަށް ވުރެ ގިނައިން އެބަހުރި، ދެން އީއައިއޭ ހުއްދަތައް ދިނުމުގެ ކުރިން ވެސް އެބަހުރި، އޭގެ މާކުރިން ވެސް ރަށްތައް ހިއްކުމުގެ މަސައްކަތްތައް ކުރިއަށް ގެންގޮސްފައި އެބަހުރި. ދެން ހިއްކި ހުރިހާ ތަނެއްގެ ބޭނުން ހަަމަ އެކަށީގެންވާ މިންވަރާ ގާތަށް ވެސް ނުކޮށް ހުރީ،" ނައީމް ވިދާޅުވި އެވެ.
އޭނާ ވިދާޅުވި ގޮތުގައި، ހިއްކާފައި ބޭނުންނުކޮށް ހުންނަ ބިންތަކުގެ ކައިރިން ދެވަނަ ފަހަރަށް ބިން ހިއްކާ ގޮތަށް ވެސް ޕްލޭންތައް ހަދާ ކަމަށެވެ.
"ހަމަ އެ ސަރަހައްދުން ނުވެގެން، އެތަނާ އެއްކޮށްލާފައި ދެން އޮންނަ ތަން ލައިގެން އެއަށް ވުރެ މާބޮޑު މަޝްރޫއެއް ކުރިއަށް ގެންދަން މި ހިއްކަނީ. މިކަހަލަ ގޮތަކަށް ހިއްކުމާ ބެހޭ އެއްޗިހީގެ ޕްރޮޕޯސަލްތައް އައިސްފައި މިހުންނަނީ،" ނައީމް ވިދާޅުވި އެވެ.
އައްޑޫގައި ކުރިއަށް ގެންދަން އުޅޭ މަޝްރޫއާ މެދު ޖަމިއްޔާތަކުން މިއަދުގެ ބައްދަލުވުމުގައި ބޮޑެތި ކަންބޮޑުވުންތަކެއް ފާޅުކުރި އެވެ.
