އިންޑިއާގެ އުތުރު ރާޖަސްތާން ސްޓޭޓުގައި ހިންދޫ މީހެއްގެ ބޯ ބުރިކޮށްލި މައްސަލަ ހޫނުވެ، މުސްލިމުންނާއި ހިންދޫންނާ ދެމެދު އިތުރު ހަމަނުޖެހުން ފެތުރުމުގެ ބިރު ބޮޑުވެއްޖެ އެވެ.
އުދައިޕޫރް ޑިސްޓްރިކްޓުގައި މަރާލީ ކަންހައިޔާ ލާލް ނަމަކަށް ކިޔާ ހެދުން ފަހާ މީހެކެވެ. އޭނާގެ ބޯ ބުރިކުރި ދެ މުސްލިމް ފިރިހެނުން ވަނީ އެ މަންޒަރު ވީޑިއޯކޮށް އަޕްލޯޑްކޮށްފަ އެވެ.
އެ މީހުން ބުނީ އެއީ ވެރިކަން ކުރާ ބީޖޭޕީގެ ތަރުޖަމާނަކު ކީރިތި ރަސޫލާއަށް ފުރައްސާރަ ކުރުމުން ލާލް އެކަަަމަށް ތާއީދުކޮށްފައި ވާތީ ބަދަލު ހިފުމުގެ ގޮތުން ހިންގި އަމަލެއް ކަމަށެވެ.
އެ ސަރަހައްދުގައި އިންޓަނެޓްގެ ހިދުމަތް ކަނޑާލައި، ބޮޑެތި އެއްވުންތައް ބޭއްވުން މިހާާރު ވަނީ މަނާކޮށްފަ އެވެ. ވީޑިއޯއިން ފެނުނު ދެ މީހުން މިހާރު ތިބީ ފުލުހުންގެ ބެލުމުގެ ދަށުގަ އެވެ.
އިތުރު ވީޑިއޯއެއްގައި އެ ދެ މީހުން ވަނީ އެ އަމަލާ ގުޅޭ ގޮތުން ފޮނި ކަނޑައި، ކަތިވަޅި ހިފައިގެން ތިބެ ބޮޑު ވަޒީރު ނަރެންދްރަ މޯދީއަށް އިންޒާރު ދީފަ އެވެ.
ރާޖަސްތާން ފުލުހުންގެ އިސް އޮފިޝަލަަކު ވަނީ ވީޑިއޯތައް ދައުރު ނުކުރަން މީޑިއާތަކަށް އަންގާފަ އެވެ.
އިންޑިއަން އެކްސްޕްރެސް ނޫހުން ބުނީ ލާލް މަރާލުމުގެ ތިން ހަފްތާ ކުރިން އޭނާ ހައްޔަރު ކުރި ކަމަށެވެ. އެއީ މުސްލިމުންނަށް ފުރައްސާރަ ކުރި ކަމަށް ތުހުމަތު ކުރެވޭ މައްސަލައެއްގަ އެވެ.
ފުލުހުންގެ ބަންދުން ދޫކޮށްލުމުން، މަރާލާނެކަމުގެ އިންޒާރު ލިބެން ފެށި ކަމަށާއި އެހެންވެ ފުލުހުންގެ ހާއްސަ ރައްކާތެރިކަމަށް އޭނާ އެދުނު ކަމަށް އެ ނޫހުގައިވެ އެވެ.
