އިންޑިއާގެ ބޮޑު ވަޒީރު ނަރެންދްރަ މޯދީ ޔޫއޭއީއަށް ވަޑައިގެން އެ ގައުމުގެ ރައީސް ޝެއިހް މުހަައްމަދު ބިން ޒައިދް އަލް ނަހްޔާންއާ ބައްދަލުކުރައްވައިފި އެވެ.
މޯދީ ޔޫއޭއީއަށް ވަޑައިގެންފައިވާ އިރު، އެމަނިކުފާނުގެ ޕާޓީގެ ތަރުޖަމާނަކު ކީރިތި ރަސޫލާއަށް ފުރައްސާރަ ކުރި މައްސަަލައެއްގައި ދާދި ފަހުން ގަލްފް ގައުމުތަކުން ނުރުހުން ފާޅު ކުރި އެވެ.
އަންގާރަ ދުވަހު އަބޫ ދާބީ އެއާޕޯޓުން މޯދީއަށް މަރުހަބާ ދެންނެވީ ރައީސް މުހައްމަަދު އެވެ. މޯދީ ކުރެއްވި ޓްވީޓެއްގައި ވަނީ އެމަނިކުފާނަށް ޝުކުރު އަދާ ކުރައްވާފަ އެވެ.
އެއް ދުވަހުގެ ދަތުރެއްގައި މޯދީ ޔޫއޭއީއަށް ވަޑައިގެންނެވީ ޖަރުމަނުގައި އޮތް ޖީ7 ސަމިޓުގައި ހާއްސަ މެހެމާނެއްގެ ގޮތުން ބައިވެރިވެވަޑައިގެންނެވުމަށް ފަހު އެވެ.
އިންޑިއާގެ ފޮރިން މިނިސްޓްރީން ބުނީ ދަތުރުގެ ބޭނުމަކީ ޔޫއޭއީގެ ކުރީގެ ރައީސް ޝެއިހް ހަލީފާ ބިން ޒައިދް އަލް ނަހްޔާން މިދިޔަ މޭ މަހު އަވަހާރަވުމުން ތައުޒިޔާ ދަންނަވައި، އާ ރައީސަށް މަރުހަބާ ދެންނެވުން ކަމަށެވެ.
އިންޑިއާ އާއި ޔޫއޭއީއާ ދެމެދު ވިޔަފާރީގެ ގުޅުން ވަރަށް ވަރުގަދަ އެވެ. ޔޫއޭއީގެ ޖުމްލަ އާބާދީއަކީ 10 މިލިއަން މީހުންނަށް ވާއިރު، އޭގެ 35 ޕަސެންޓަކީ އިންޑިއާ ރައްޔިތުންނެވެ.
އިންޑިއާ އާއި ޔޫއޭއީގެ ވިޔަފާރީގެ ގުޅުން އަގު ކުރެވެނީ 59 ބިލިއަން އެމެރިކާ ޑޮލަރަށެވެ. ޗައިނާ އާއި އެމެރިކާއަށް ފަހު އިންޑިއާއާ އެކު އެންމެ ގިނަ މުއާމަލާތް ކުރަނީ ޔޫއޭއީ އިންނެވެ.
