ހައި ކޯޓުގައި ހުސްވެފައިވާ ދެ ފަނޑިޔާރުންގެ މަގާމަށް މާލޭގައި ހުންނަ އެެހެން ސުޕީރިއާ ކޯޓުތަކުގެ ގާޒީން ކުރިމަތިލައްވައިފި އެވެ.
ހައި ކޯޓުގައި ދެ ފަނޑިޔާރެއްގެ މަގާމު ހުސްވެގެން ދިޔައީ ކުރިން އެ ކޯޓުގައި ފަނޑިޔާރަކަށް ހުންނެވި އަބްދުއްރައޫފް އިބްރާހީމް މަގާމުން އިސްތިއުފާ ދެއްވުމުންނާއި، ފަނޑިޔާރަކަށް ހުންނެވި އަބްދުﷲ ހަމީދު މަގާމުން ވަކިކުރަން ރައްޔިތުންގެ މަޖިލީހުން ފާސްކުރުމުންނެވެ.
އެ ދެ މަގާމަށް ސިވިލް ކޯޓުގެ ދެ އަންހެން ގާޒީއަކާއި، ސިވިލް ކޯޓުގެ ފިރިހެން ގާޒީއަކާއި، ކްރިމިނަލް ކޯޓުގެ އަންހެން ގާޒީއަކާއި، އަންހެން ވަކީލެއް ވަނީ ކުރިމަތިލައްވައިފަ އެވެ.
ހައިކޯޓަށް ކުރިމަތިލެއްވި ބޭފުޅުން
- ސިވިލް ކޯޓުގެ ގާޒީ ޒުބައިރު މުހައްމަދު
- ސިވިލް ކޯޓުގެ ގާޒީ ހާފިޒާ އަބްދުއްސައްތާރު
- ސިވިލް ކޯޓުގެ ގާޒީ އަޒުފާ އަބްދުލްޣަފޫރު
- ކްރިމިނަލް ކޯޓުގެ ގާޒީ ދީބަނާޒް ފަހުމީ
- ކުރީގެ ޑެޕިއުޓީ ޕްރޮސެކިއުޓާ ޖެނެރަލް މަރިޔަމް ނިހާޔަތު
ހައި ކޯޓުގެ ފަނޑިޔާރަކަށް ހުންނެވި މުހައްމަދު ސަމީރު ވެސް މަގާމުން އިސްތިއުފާ ދެއްވުމުން، ހުސްވި މަގާމަށް ވަނީ ފެމިލީ ކޯޓުގެ އިސް ގާޒީއަކަށް ހުންނެވި ހުޒައިފާ މުހައްމަދު ވަނީ އައްޔަންކޮށްފަ އެވެ.
ހައިކޯޓުގައި މިހާރު ނުވަ ފަނޑިޔާރުން ތިއްބަވަ އެވެ. އޭގެ ތެރޭގައި ހިމެނެނީ ދެ އަންހެން ފަނޑިޔާރުންނާއި ހަތް ފިރިހެން ފަނޑިޔާރުންނެވެ.
