ރާއްޖޭގައި އަލަށް ވިޔަފާރި އެއް ފެށުމަށް ނުވަތަ ހިންގަމުންދާ ވިޔަފާރިއެއް ކުރިއެރުވުމަށް މާލީ އެހީތެރިކަން ފޯރުކޮށްދިނުމުގެ މަގްސަދުގައި ބެންކް އޮފް މޯލްޑިވްސް އިން ދޭ "ސްޓާޓް-އަޕް" ގްރާންޓު ހަތަރު ވިޔަފާރިއަކަށް ދީފި އެވެ.
މިއީ އެ ބޭންކުގެ 40 ވަނަ އަހަރީ ދުވަހާ ގުޅިގެން ތައާރަފްކުރި ހާއްސަ ހަރަކާތްތަކުގެ ތެރެއިން ތިންވަނަ ހަރަކާތެވެ. މި ހަރަކާތް އިފްތިތާހު ކުރީ މިއަހަރުގެ ޖެނުއަރީ މަހު އެވެ.
މި ގްރާންޓުގެ ދަށުން މި ހަތަރު ވިޔަފާރިއަށް އެހީގެ ގޮތުގައި 500،000ރ. ބީއެމްއެލް އިން ދޭނެ އެވެ. އެ ފައިސާ އަކީ ބީއެމްއެލް އަށް އަނބުރާ ދައްކަން ނުޖެހޭ ގޮތަށް، ހިލޭ އެހީގެ ގޮތުން ބޭންކުން ދޫކުރާ ފައިސާ އެވެ.
މި ގްރާންޓް ލިބޭ ހަތަރު ވިޔަފާރިއަކީ؛
- މުހައްމަދު ނަޒްލީ އަދި އައިޝަތު ޝައްމަ މުހައްމަދު (ނިރިސް އެސް އެމްބްރޮއިޑެރީ) - ހިންގަމުންދާ އެމްބްރޮއިޑެރީ ވިޔަފާރި ފުޅާކުރުމަށާއި،
- އާމިނަތު އިރާޝާ (ކިޑްސް ޒޯން) - ހާއްސަ އެހީއަށް ބޭނުންވާ ކުދިންނަށް އަމާޒުކޮށް ލަކުޑިން ގިނަ ބާވަތުގެ ތަކެތި ތައްޔާރު ކުރަން ދަސްކޮށްދިނުމަށް އަލަށް ފަށާ ވިޔަފާރިއަކާއި،
- ހައްވާ ސޫޒަން (ހައްވަން ކޭކްސް) - ގޭގައި ހިންގަމުންދާ ކޭކު އަޅާ ވިޔަފާރި ފުޅާކޮށް ބޭކަރީ އެއް ހަދައި މި ދާއިރާއިން ތަމްރީން ދިނުމާއި އަދި،
- އައިޝަތު ލިއުޝާ (ކްލައިމެޓް ސްމާޓް ގުޑް އެގްރިކަލްޗަރަލް ޕްރެކްޓިސަސް) - ހިންގަމުންދާ ވިޔަފާރި ފުޅާކޮށް ތިމާވެއްޓާ ރައްޓެހި ގޮތްތައް ބޭނުންކޮށްގެން ދެމެހެއްޓެނެވި ގޮތެއްގައި ދަނޑުވެރިކަން ކުރުމަށެވެ.
"ސްޓާޓަޕް ގްރާންޓަށް މިއަދު މި ހޮވުނު ފަރާތްތަކަކީ އެފަރާތްތަކުގެ ވިޔަފާރި ފުޅާކުރުމަށާއި ދެމެހެއްޓެނެވި ގޮތެއްގައި ވިޔަފާރި ކުރިއަރުވަން ޕްލޭން ތައްޔާރުކޮށް އެ ޕްލޭން ހުށަހަޅައިދިން ފަރާތްތަކުގެ ތެރެއިން އެންމެ ރަނގަޅު އަދިހަމައެހެންމެ އުފެދެމުން އަންނަ ވިޔަފާރިވެރިން. އަޅުގަނޑުމެންގެ އުއްމީދަކީ މި ވިޔަފާރިތަކުން އައު ވަޒީފާގެ ފުރުސަތުތައް ހުޅުވާލައި، މުޖުތަމައަށް ހެޔޮ ބަދަލެއް ގެނުވުން،" ގްރާންޓް ޕްރޮގްރާމާ ގުޅޭގޮތުން ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ ޓިމް ސޯޔާ ވިދާޅުވި އެވެ.
މި ހަތަރު ވިޔަފާރިއަށް އެހީ ދޭން ބޭންކުން ނިންމީ ގްރާންޓަށް އެދި ހުށަހެޅި 100 އަށްވުރެ ގިނަ ޕްރޮޕޯސަލްގެ ތެރެއިންނެވެ.
ސްޓާޓަޕް ގްރާންޓް ކާމިޔާބު ކުރި ފަރާތްތައް ހޮވާފައިވަނީ ދެ މަރުހަލާއަކަށް ބަހާލައިގެން ގެންދެވުނު ވާދަވެރި އިވެލުއޭޝަން ޕްރޮސެސްއަކަށް ފަހު ކަމަށް ބީއެމްއެލް އިން ބުނެ އެވެ.
ފުރަތަމަ މަރުހަލާގައި ބިޒްނަސް ޕްލޭންތައް އިވެލުއޭޓް ކުރުމަށްފަހު އެންމެ ފާހަގަކޮށްލެވޭ 10 ވިޔަފާރި ޝޯޓްލިސްޓު ކުރުމަށް ފަހު ދެވަނަ މަރުހަލާގައި ޝޯޓްލިސްޓްވި ވިޔަފާރިއާ ގުޅޭ ޕްރެސެންޓޭޝަން އިވެލުއޭޝަން ކޮމިޓީއަށް ހުށަހަޅާފައިވެ އެވެ.
