ކުދި ވިޔަފާރިތަކުގެ މެދުގައި ޑިޖިޓަލްކޮށް ވިޔަފާރި ކުރިއެރުވުމަށް އުރީދޫން ވިޔަފާރިވެރިންނަށް ހާއްސަ ސެޝަންތަކެއް ފަށައިފި އެވެ.
ކުދި ވިޔަފާރިތަކަށް ހާއްސަކޮށް އުރީދޫން އަލަށް ފެށި މި މަސައްކަތުގައި އިއްޔެ ވަނީ އެސްއެމްއީ އެންޓްރަޕްރެނިއާ ފެޑޭރޭޝަން އޮފް މޯލްޑިވްސް އިން ވެސް ގުޅިފަ އެވެ.
އިއްޔެ އެ ސެޝަންތައް ފަށާފައި ވަނީ ގިނަ އަދަދެއްގެ ކުދި ވިޔަފާރިތަކަށް ހާއްސަ ވިޔަފާރިވެރިންނާ އެކު އެވެ.
އުރީދޫން ބުނީ އެ ސެޝަންތަކަކީ އެސްއެމްއީ ކޮމިއުނިޓީއަށް އޮންނަ ބައިވެރިވުން ރަނގަޅުކޮށް ޑިޖިޓަލްކޮށް ހިދުމަތްތައް ހޯދުމަށް މަގުފަހިކޮށް އެކަމަށް ހޭލުންތެރި ކުރުމަށް ކަމަށް ފެށި މަސައްކަތެއް ކަމަށެވެ.
އަލަށް މި ފެށި ސެޝަންތަކުގެ ސަބަބުން ކުދި ވިޔަފާރިތަކަށް ވަރަށް ބޮޑު ފައިދާއެއް ކުރާނެ ކަމަށްވެސް އުރީދޫން ބުންޏެވެ. އެގޮތުން މީގެ ސަބަބުން ވަޒީފާ ހޯދުމަށް މަގުފަހިވެގެންދާނެ ކަމަށްވެސް ބުންޏެވެ.
އިއްޔެ ވިޔަފާރިވެރިންނާ އެކު ކުރިއަށް ގެންދިޔަ ސެޝަންގައި މަޝްވަރާ ކުރެވިފައި ވަނީ:
- މިކަން ކުރިއެރުވުމަށް ކުރެވިދާނެ ކަންކަން
- ރާއްޖެއަށް އެންމެ ބޮޑަށް ބޭނުންވަނީ ކޮން ދާއިރާތަކެއްކަން
- އެ ދާއިރާތައް ކުރި އެރުވުމަށް ބޭނުންވަނީ ކޮން ކަހަލަ ހައްލުތަކެއްކަން
މިއީ އަލަށް ފެށި ކަމެއް ނަމަވެސް، މި އަހަރުގެ ކުރިއަށް އޮތް ދުވަސްތަކުގައި ރާއްޖޭގެ އެކި ސަރަހައްދުތަކުގައި ބޭއްވުމަށް ރާވާފައިވާ ހަރަކާތްތަކެއް ކަމަށްވެސް އުރީދޫން ބުންޏެވެ.
