މީގެ 20 އަހަރު ކުރިން އިންޑިއާގައި މުސްލިމުންނާއި ހިންދޫންނާ ދެމެދު ހިނގި ލޭއޮހޮރުވުމުގައި މިހާރުގެ ބޮޑު ވަޒީރު ނަަރެންދްރަ މޯދީގެ އަތެއްވާ ކަމަށް ކަނޑައެޅުމަށް ކޯޓަށް ދިޔަ އެކްޓިވިސްޓަކު ހައްޔަރު ކުރުމުން، ބަައެއް ސިޓީތަކުގައި މުޒާހަރާކޮށްފި އެވެ.
ހުޅަނގު ގުޖަރާތު ސްޓޭޓުގެ ޗީފް މިނިސްޓަރަކަށް މޯދީ ހުންނެވި އިރު 2002 ވަނަ އަހަރު ހިނގި ލޭއޮހޮރުވުމުގައި 1000 އަށް ވުރެ ގިނަ މީހުން މަރުވި އިރު، ގިނައިން ހިމެނެނީ މުސްލިމުންނެވެ.
އެކަމުގައި މޯދީ އެއްވެސް ޒިންމާއެއް ނަންގަވަން ނުޖެހޭނެ ކަމަށް ކުރިން ނިންމި ނިންމުން ބަދަލު ކުރަން އެކްޓިވިސްޓް ޓީސްޓާ ސެތަލްވާދް އަދި އޭނާގެ އެންޖީއޯގެ ފަރާތުން ކޯޓަށް ހުށަހެޅި މައްސަލަ ބޭރުކޮށްލީ ހުކުރު ދުވަހު އެވެ. އަދި ހޮނިހިރު ދުވަހު ސެތަލްވާދް ހައްޔަރު ކުރި އެވެ.
ސެތަލްވާދްއާ އެކު އެ މައްސަލަ ކޯޓަށް ހުށަހެޅީ ޒާކިއާ ޖަފްރީ އެވެ. އޭނާގެ ފިރިމީހާ، ކުރީގެ މަޖިލިސް މެމްބަރު އިހްސާން ޖާފްރީ މަރުވީ އެ ލޭއޮހޮރުވުމުގެ ތެރޭގަ އެވެ.
ޖިނާއީ ކުށެއް ކުރަން އުޅުމާއި ލިޔެކިޔުން އުފެއްދުމާާއި ދޮގު ހެކި ކޯޓަށް ހުށަހެޅުމުގެ ތުހުމަތުގައި ސެތަަލްވާދް ހައްޔަރު ކުރީ ޓެރަރިޒަމާ ދެކޮޅު ފުލުހުންނެވެ.
އޭނާ ހައްޔަރު ކުރުމުން މުމްބާއީ ޕްރެސް ކްލަބުން ކަންބޮޑުވުން ފާޅުކޮށް، ބަދަލު ހިފުމުގެ ސިޔާސަތު ދޫކޮށްލަން ގޮވާލި އެވެ.
އދ. ގެ ހާއްސަަ ރެޕަޓުއާ މޭތީ ލޯލޯ ވެސް ވަނީ ކަންބޮޑުވުން ފާޅު ކުރައްވާފަ އެވެ. އޭނާ ވިދާޅުވީ އިންސާނީ ހައްގުތަކަށް ވަކާލާތު ކުރުމަކީ ކުށެއް ނޫން ކަމަށެވެ.
ސެތަލްވާދް ހަައްޔަރު ކުރުމުން ބެންގަލޫރާއި، މުމްބާއީ އަދި ނިއު ދިއްލީގައި ވެސް މުޒާހަރާ ކުރި އެވެ. އެއްވި މީހުން ގޮވާލީ އޭނާ ދޫކޮށްލުމަށެވެ.
