ފިލިޕީންސްގައި 165 މީހުންނާ އެކު ދަތުރު ކުރަމުން ދިޔަ ފެރީއެއްގައި ބޮޑު އަލިފާނުގެ ހާދިސާއެއް ހިނގައިފި އެވެ.
ކޯސްޓްގާޑުން ބުނީ 165 މީހުންގެ ތެރެއިން ދެ މީހުން ފިޔަވައި އެންމެން ސަލާމަތްކޮށްފައިވާ ކަމަށެވެ. އެކަކު މަރުވެފަައިވާ އިރު އިތުރު މީހަކު ވަނީ ގެއްލިފަ އެވެ.
މާމާ މޭރޯ ކްލޮއީގެ ނަން ދީފައިވާ ފެރީ ދަތުރު ކުރަމުން ދިޔައީ ބޮހޯލް އާއި ލެއިޓޭ އައިލެންޑާ ދެމެދުގަ އެވެ. ބޯޓުން ސަލާމަތް ކުރި މީހުން ގެންދިޔައީ ލެއިޓޭ އަށެވެ.
އަށް ކްރޫ މެމްބަރުންނާއި 157 ޕަސެންޖަރުންނާ އެކު ފެރީ ދަތުރު ފެށީ ބޮހޯލް ރަށުގެ ޔުބޭ އިންނެވެ. ބައެއް ރިޕޯޓުތައް ބުނާ ގޮތުން އަލިފާން ރޯވުމުން ކުޑަކުދިން މޫދަށް ފުއްމާލި އެވެ.
ޔޫޓިއުބްގައި އާއްމުކޮށްފައިވާ ވީޑިއޯއަކުން ފެންނަނީ ބޯޓުގައި ވަރަށް ބޮޑަށް ހުޅު ހިފައި، ކަޅު ދުން އަަރާ މަންޒަަރާއި ގިނަ ބަޔަކު މޫދުގައި ތިބި މަންޒަރެވެ.
އޮފިޝަލުން ބުނީ ރޯވާން ދިމާވި ސަބަބު އަދި ނޭނގޭ ކަމަށެވެ. ނަމަަވެސް އޭގަައި ތިބީ ޕަސެންޖަރުން އުފުލޭ އެންމެ ގިނަ އަދަދަށް ވުރެ މަަދުންނެވެ.
ފިލިޕީންސްގެ ބޯޓުތަކުގައި ވަރަށް ގިނައިން ނުރައްކާތެރި ހާދިސާތައް ހިނގަ އެވެ. ޖަޒީރާ ރަށްތަކެއް ގޮތަށް އުފެދިފައި އޮންނަ ފިލިޕީންސަށް ވަރަށް ގިނައިން ތޫފާންތައް ކުރިމަތިވާ އިރު، ބޯޓުތަކުގައި މާ ގިނައިން މީހުން އުފުލުމާއި ސަލާމަތީ ފިޔަވަޅުތައް ގޯސްވުމުން ހާދިސާތަކަށް މަގުފަހިވެ އެވެ.
