އަހަރުތަކަކަށް ފަހު މިސްރާއި ގަތަރުގެ ގުޅުން ރަނގަޅު ވާން ފަށައި، މިސްރުގެ ރައީސް އަބްދުލް ފައްތާހް އަލް ސިސީ އާއި ގަތަރުގެ އަމީރު ޝެއިހް ތަމީމް ބިން ހަމަދް އަލް ސާނީ ބައްދަލުކުރައްވައިފި އެވެ.
މި ވަގުތު މިސްރުގެ ގާހިރާއަށް ވަޑައިގެން އުޅުއްވާ ގަތަރުގެ އަމީރު ޝެއިހް ތަމީމް އަދި ސިސީގެ މަޝްވަރާގައި ދެ ގައުމާއި މެދުއިރުމައްޗަށް މުހިއްމު ކަންކަމުގެ ވާހަކަ ދެއްކެވި އެވެ.
ހަކަތަ އާއި ދަނޑުވެރިކަމުގައި ދެ ގައުމު ގުޅިގެން ކުރިއަށް ދިޔުމަށާއި މިސްރުގައި ގަތަރުގެ އިންވެސްޓްމަންޓް އިތުރު ކުރުމަށް މަޝްވަރާ ކުރެއްވި ކަމަށް މިސްރުގެ ރައީސް އޮފީހުން ބުންޏެވެ.
މިސްރުގެ އަލް އަހްރާމް ނޫހުން ބުނީ މަޝްވަރާގެ މަގްސަދަކީ މިސްރާއި ގަތަރުގެ ގުޅުން އަލުން ފުރިހަމައަށް އިއާދަ ކުރުން ކަމަށެވެ. ގުޅުން ކަނޑާލުމަށް ފަހު އަލުން ދެ ގައުމުން ގުޅުން ގާއިމްކުރީ 2021 ގަ އެވެ.
ގަތަރުން ޓެރަރިޒަމަށް އެއްބާރުލުންދޭ ކަމަށް ބުނެ މިސްރާއި ޔޫއޭއީ، ބަހްރެއިން އަދި ސައުދީ އަރަބިއްޔާއިން ގަތަރު ބޮއިކޮޓް ކުރީ 2017 ގަ އެވެ. އެ ތުހުމަތު ގަތަރުން ދޮގުކުރެ އެވެ.
މިސްރާއި ގަތަރުގެ ގުޅުން ރަނގަޅުވާން ފަށައި ޝެއިހް ތަމީމް މިސްރަށް ވަޑައިގެންފައިވާ އިރު، އެންމެ ފަހުން އެމަނިކުފާނު މިސްރަށް ދަތުރެއް ކުރެއްވީ 2015 ގަ އެވެ.
