އެމެރިކާއިން އިސްވެ އޮވެ ހިންގާ ނޭޓޯ ފަދަ އަސްކަރީ ކޯލިޝަނެއް މެދުއިރުމައްޗަށް ބޭނުންވާ ކަމަށް އުރުދުންގެ ރަސްގެފާން އަބްދުﷲ ދެ ވަނަ ވިދާޅުވެއްޖެ އެވެ.
ސީއެންބީސީއަށް ދެއްވި އިންޓަވިއުއެއްގައި ރަސްގެފާން އަބްދުﷲ ވިދާޅުވީ އެފަދަ އަސްކަރީ ކޯލިޝަނެއްގެ ޗާޓަރު ނުވަތަ މަގްސަދުތައް ވަރަށް ސާފުވާން ޖެހޭނެ ކަމަށެވެ.
"މެދުއިރުމަތީގެ ނޭޓޯއަކަށް ތާއީދު ކުރާނެ އެންމެ ފުރަތަމަ މީހުންގެ ތެރޭގައި އަޅުގަނޑު ހިމެނޭނެ. އެކަމަކު އެހެން ގައުމުތަކާ އެ ކޯލިޝަނާ އޮންނަ ގުޅުން ފަދަ ކަންކަން ވަރަށް ސާފުވާން ޖެހޭނެ. އެހެން ނޫނީ އެންމެން ތިބޭނީ އޮޅުމެއްގެ ތެރޭގައި،" އެމަނިކުފާނު ވިދާޅުވި އެވެ.
އަސްކަރީ ކަންކަމުގައި އިޒްރޭލާއި އަރަބި ގައުމުތަކުން މިހާރަށް ވުރެ ބޮޑަށް ގުޅިގެން މަސައްކަތް ކުރުމަކީ އެމެރިކާއިން ބާރު އަޅާ ކަމެކެވެ.
ދާދި ފަހުން އެމެރިކާގެ ސެނެޓާއި ކޮންގްރެސްއަށް ތައާރަފް ކުރި ބިލެއްގެ ބޭނުމަކީ ވެސް އިރާނާ ދެކޮޅަށް މެދުއިރުމަތީގެ ވައިގެ ދިފާއީ ޕްލޭނެއް ހެދުމަށް ބާރު އަޅާ ބިލެކެވެ.
މީގެ ކުރިން އިޒްރޭލްގެ އޮފިޝަލުން ވެސް ބުނީ ވައިގެ ދިފާއީ ކަންކަމުގައި އަރަބި ގައުމުތަކާ އެކު މަސައްކަތް ކުރާ ކަމަށެވެ. ނަމަވެސް ވަކި ގައުމެއްގެ ނަން ހާމައެއް ނުކުރެ އެވެ.
އެމެރިކާގެ ރައީސް ޖޯ ބައިޑެން މެދުއިރުމައްޗަށް ކުރައްވާ ފުރަތަމަ ދަތުރުގައި ޖުލައި މަހުގެ ކުރީކޮޅު ސައުދީ އަރަބިއްޔާ އާއި ހުޅަނގު އައްސޭރި އަދި އިޒްރޭލަށް ވަޑައިގަންނަވާނެ އެވެ.
