މައިޑުގުރީ، ނައިޖީރިއާ (ޖޫން 22) - ނައިޖީރިއާގެ ބޯކޯ ހަރާމް ޓެރަރިސްޓް ގްރޫޕުން މީގެ އަށް އަހަރު ކުރިން ރަހީނު ކުރި ކުދިންގެ ތެރެއިން ދެ ކުއްޖަކު ހޯދައިފި އެވެ.
ނައިޖީރިއާގެ ސަލާމަތީ ބާރުތަކުން އެކަން އާއްމުކޮށް، ދައްކާލި ދެ އަންހެނުންނާ އެކުގައި ދެ ތުއްތު ކުދިން ތިއްބެވެ. ބެލެވޭ ގޮތުގައި އެއީ އެ މީހުންގެ ދަރިންނެވެ.
މޭޖާ ޖެނެރަލް ކްރިސްޓޮފާ މޫސާ ވިދާޅުވީ އެ މީހުން ފެނުނީ ޖޫން 12 އަދި ޖޫން 14 ވަނަ ދުވަހު ތަފާތު ދެ ސަރަހައްދަކުން ކަމަށެވެ.
އޭގެ ތެރެއިން ހައްވާ ޖޯސެފް ފެނުނީ ބޯކޯ ހަރާމްގެ ކޭމްޕެއް ރޫޅާލަން ސިފައިން ހިންގި އޮޕަރޭޝަނެއްގެ ތެރެއިން ބާމާ ސަރަހައްދުންނެވެ. އަދި މޭރީ ދާއޫދާ ފެނުނީ ކެމެރޫންގެ ބޯޑަރު ކައިރީގައި އޮންނަ ންގޯޝޭ އަވަށުންނެވެ.
"އަހަރެން ރަހީނުކޮށްގެން ގެންދިޔަ އިރު ނުވަ އަހަރު. އޭގެ ފަހުން އަހަންނަށް ޖެހުނީ ކައިވެނި ކުރަން. މިއީ އެ ކައިވެންޏަށް ލިބުނު ކުއްޖެއް،" ޖޯސެފް ބުންޏެވެ.
އޭނާ ބުނީ ފިރިމީހާ އާއި ފިރިމީހާގެ ބައްޕަ މަރުވީ ސިފައިންގެ އޮޕަރޭޝަނެއްގައި ކަމަށާއި އޭގެ ފަހުން އުޅެމުން ދަނީ 14 މަހުގެ ދަރިފުޅު ގޮވައިގެން އެކަނި ކަމަށެވެ.
ބޯކޯ ހަރާމްގެ ހަނގުރާމަވެރިން ޗީބޯކްގައި ހުންނަ ބޯޑިން ސްކޫލަކަށް ވަދެ، 276 އަންހެން ކުދިން ރަހީނު ކުރީ 2014 ވަނަ އަހަރު އެވެ. އޭރު އެ ކުދިންގެ އުމުރަކީ 12-17 އަހަރެވެ.
ރަހީނު ކުރިތާ ކުޑަ ވަގުތުކޮޅެއްގެ ތެރޭގައި 57 ކުދިން އަމިއްލައަށް ސަލާމަތްވި އެވެ. އިތުރު 80 ކުދިން ސަލާމަތްވީ ޖަލުގައި ތިބި ބޯކޯ ހަރާމްގެ ބައެއް މެމްބަރުން ދޫކޮށްލުމުންނެވެ.
ފަހަކަށް އައިސް ބޯކޯ ހަރާމްގެ އެތައް ހާސް މެމްބަރުން ދަނީ އަމާންދެމުންނެވެ. އެއީ ސަރުކާރުން ހިންގާ އޮޕަރޭޝަންތައް ވަރުގަދަ ކުރުމާ އެކު އިސްލާމިކް ސްޓޭޓް (އައިއެސް) އާ ދެކޮޅަށް ވެސް ހަނގުރާމަ ކުރަން ޖެހޭތީ އެވެ.
ނައިޖީރިއާގެ މި ހަމަނުޖެހުމުގައި މިހާތަނަށް 40،000 އަށް ވުރެ ގިނަ މީހުން މަރުވެފައިވާ އިރު 2.2 މިލިއަނަށް ވުރެ ގިނަ މީހުންގެ ގެދޮރު ގެއްލިފައިވެ އެވެ.
