އަލްޖިއާޒް، އަލްޖީރިއާ (ޖޫން 21) - ދަރިފުޅުގެ ހިސާބު އިމްތިހާނުގައި މަކަރު ހަދަން އެހީވާން އުޅުމުން އަލްޖީރިއާގެ ގާނޫނު ހަދާ މަޖިލީހުގެ މެމްބަރަކު ތިން އަހަރަށް ޖަލަށް ހުކުމްކޮށްފި އެވެ.
ދައުލަތުގެ އޭޕީއެސް ނިއުސް އެޖެންސީން ބުނީ މަޖިލިސް މެމްބަރުގެ އިތުރުން، ފުލުހުންގެ ވެރިޔަކާއި، ސްކޫލް ޕްރިންސިޕަލް އަދި ހަތަރު ވަނަ މީހަކަށް ވެސް ތިން އަހަރުގެ ޖަލު ހުކުމް އިއްވި ކަމަށެވެ.
ވެރިކަން ކުރާ ނޭޝަނަލް ލިބެރޭޝަން ފްރަންޓް (އެފްއެލްއެން) ގެ މަޖިލިސް މެމްބަރު އަބްދިނާސިރް އަރްދްޖޫން ހައްޔަރު ކުރީ މި މަހުގެ ކުރީކޮޅު އެވެ.
އޭނާއަށް ތުހުމަތު ކުރީ ހިސާބު އިމްތިހާނުގެ ޖަވާބުތައް ރައްކާކޮށްފައި އޮތް ސިޓީ އުރައެއް އިމްތިހާން މަރުކަޒުގައި ހުރި އަންހެން ދަރިފުޅަށް ފޯރުކޮށްދޭން އުޅުނު ކަމަށެވެ.
އިމްތިހާން މަރުކަޒު ބަލަހައްޓަން ހަވާލުވެ ހުރި މީހާއަށް އެކަން ފާހަގަވެ ރިޕޯޓު ކުރުމާ އެކު އަރްދްޖޫން ހައްޔަރު ކުރި އެވެ. އަދި ސިޓީ އުރަ ހިފައިގެން ދިޔަ ފުލުހުންގެ ވެރިޔާ ވެސް ހައްޔަރު ކުރި އެވެ.
އަލްޖީރިއާގެ އިމްތިހާންތަކުގައި މަކަރު ހަދާ މައްސަލަ ބޮޑުވެ، އިދާރާތަކުން އަންނަނީ ހަރުކަށި ފިޔަވަޅު އަޅަމުންނެވެ. އެގޮތުން އިމްތިހާން ކުރިއަށްދާ ވަގުތު އިންޓަނެޓްގެ ހިދުމަތް ކަނޑާލުމާއި އިމްތިހާންގެ މައުޟޫއުތައް ލީކުކޮށްފި ނަމަ 15 އަހަރުގެ ޖަލު ހުކުމް ފަދަ ކަންކަން ތައާރަފްކޮށްފައިވެ އެވެ.
