ބެއިޖިން، ޗައިނާ (ޖޫން 21) - ދެކުނު ޗައިނާގެ ބައެއް ހިސާބުތަކަށް އާދަޔާ ހިލާފަށް ބޯކޮށް ވާރޭ ވެހި ހިނގި ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތަކާ ހެދި އެތައް ހާސް ބަޔަކު ރައްކާތެރި ހިސާބުތަކަށް ބަދަލުކޮށްފި އެވެ.
ވާރޭގެ ސަބަބުން ޕާލް ރިވާ ބޭސިން ފުރި ބަންޑުންވެއްޖެ ނަމަ އިގްތިސާދީ ގިނަ މަސައްކަތްތަކަށް ބުރޫ އަރާނެކަމުގެ ބިރު އެބަ އޮތެވެ. ކޮވިޑާ ގުޅިގެން ހަރުކަށި ލޮކްޑައުންތައް ތަންފީޒު ކުރާރީ މިހާރު ވެސް އުފެއްދުންތެރި ކަމަށް ވަނީ އަސަރުކޮށްފަ އެވެ.
މޭ މަހުން ފެށިގެން ޖޫން މަހުގެ މެދާ ހަމައަށް ގުއާންގްޑޯންގް، ފުޖިއާން އަދި ގުއާންގްޒީ ޕްރޮވިންސަށް އެވްރެޖުކޮށް ވެހިފައި ވަނީ 621 މިލިމީޓަރުގެ ވާރެ އެވެ. ޗައިނާގެ ނޭޝަނަލް މީޓިއޮރޮލޮޖިކަލް ސެންޓަރުން ބުނީ އެއީ 1961 ވަނަ އަހަރަށް ފަހު ރެކޯޑް މިންވަރެއް ކަމަށެވެ.
ގުއާންގްޑޯންގްގެ ޝާއޯގުއާން ސިޓީގެ ސްކޫލްތައް ވަގުތީ ހިޔާތަކަށް ބަދަލުކޮށްފައިވާ އިރު، ކުޅިވަރަށް ހާއްސަ ބިންތަކުގައި ވެސް އެތައް ސަތޭކަ ޓެންޓު ޖަހައިފައިވެ އެވެ. ގުއާންގްޒީ ސަރަހައްދުގެ އަވަށްތަކުން މީހުން ސަލާމަތް ކުރީ ރަބަރު ޑިންގީތަކުގަ އެވެ.
ގުއާންގްޑޯންގްގެ އިދާރާތަކުން ބުނީ 200،000 އަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވާ އިރު، 254 މިލިއަން ޑޮލަރުގެ ގެއްލުން ލިބިފައިވާ ކަމަށެވެ. ބޯކޮށް ވާރޭ ވެހުމުގެ އަސަރު 480،000 މީހުންނަށް ކޮށްފައިވާ ކަމަށް ބެލެވެ އެވެ.
ޝާއޯގުއާންގައި ފެންބޮޑުވާނެ ކަމަށް ރަތް އެލާޓް ނެރިފައިވާ އިރު، ގުއާންގްޒީގައި އެންމެ ފަހުން މިހާ ބޮޑަށް ފެންބޮޑުވީ 2005 ވަނަ އަހަރުގައި ކަމަށް އޮފިޝަލުން ބުނެ އެވެ. މޫސުމާ ބެހޭ އިދާރާތަކުން ބުނީ ގުއާންގްޒީގެ 28 ކޯރެއް ބަންޑުންވާން ކައިރިވެފައިވާ އިރު، އަންގާރަ ދުވަހު ވެސް ބޯކޮށް ވާރޭ ވެހޭނެ ކަމަށެވެ.
ޖިއާންގްޒީ ޕްރޮވިންސުން ވެސް ފެންބޮޑުވާނެ ކަމަށް ރަތް އެލާޓް ނެރިފައިވާ އިރު، ފުޖިއާންގައި 220،000 މީހުން ވަނީ ރައްކާތެރި ހިސާބުތަކަށް ބަދަލުކޮށްފަ އެވެ.
މި މަހުގެ ކުރީކޮޅު ޗައިނާގެ މެދުތެރޭގައި އޮންނަ ހުބެއި ޕްރޮވިންސްގައި ފެންބޮޑުވެ 21 މީހުން މަރުވި އެވެ. މިދިޔަ އަހަރުގެ ހޫނު މޫސުމުގައި ޗައިނާގެ މެދުތެރޭގައި އޮންނަ ހެނާން ޕްރޮވިންސްގައި ވެސް ފެންބޮޑުވެ، 398 މީހުން މަރުވެ 10 ބިލިއަން ޑޮލަރުގެ ގެއްލުން ލިބުނެވެ.
