ހުޅުމާލެ ދެ ފިޔަވަހި ގުޅޭ ކޯރާ ދިމާލުގައި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ން ތަރައްގީކުރަމުން އަންނަ ޗެނަލް ޕާކު ސަރަހައްދުގައި އޯވާވޯޓާ ރެސްޓޯރަންޓެއް އަޅާނެ ބަޔަކު ހޯދަން އެ ކޯޕަރޭޝަނުން އިއްޔެ އިއުލާނުކޮށްފި އެވެ.
މިކަމަށް ޝައުގުވެރިވާ މީހުން ޕްރޮޕޯސަލް ހުށަހަޅަން ދައުވަތުދީ އެޗްޑީސީން ކުރި އިއުލާނުގައިވާ ގޮތުގައި މި ޕާކު ހުންނަނީ ފޭސް ޓޫ އަތިރިމައްޗާ ދިމާލަށެވެ. މިތަން އެއްގަމާ ގުޅުވާލަން ބޭނުންކުރާނީ މިހާރު ވެސް ރާއްޖޭގެ ގިނަ ރިސޯޓުތަކެއް ވޯޓާ ވިލާ އާއި މޫދުގައި ހުންނަ އެހެން އިމާރާތްތަކަށް ދާން ބޭނުންކުރާ ކަހަލަ ރޭމްޕެކެވެ.
ހުޅުމާލޭ އޯވާ ވޯޓާ ރެސްޓޯރަންޓު ތަރައްގީކުރަން ފުރުސަތު ދޭން ނިންމާފައިވަނީ އެންމެ މަތިން އެކުއިޒިޝަން ކޮސްޓާއި ކުލި ހުށަހަޅާ ފަރާތަކަށެވެ. އޭގެ އިތުރުން ވިޔަފާރި ޕްރޮޕޯސަލް އަށާއި ތަޖުރިބާއަށް ބަލާނެ އެވެ.
އޯވާވޯޓާ ރެސްޓޯރަންޓު އަޅާ ސަރަހައްދު: މިއީ ދެ ފިޔަވަހި ގުޅޭ ކޯރު ހުންނަ ޗެނަލް ޕާކާ ދިމާލުގައި އަޅާ ތަނެއް. --
މިއީ ފެނުން މަތީގައި އަޅާ ރެސްޓޯރަންޓެއް ކަމުން ކެފޭ/ރެސްޓޯރަންޓު ވިޔަފާރިތަކުގެ އިތުރުން ސްވިމިން ޕޫލް އޮޕަރޭޓަރުންނާއި ކުޅިވަރު ފެސިލިޓީތައް އޮޕަރޭޓުކުރާ ވިޔަފާރިތަކަކީ ވެސް މިކަމުގެ ތަޖުރިބާ ހުރި ވިޔަފާރިތަކުގެ ގޮތުގައި ބަލައިގަންނަ ގޮތަށް އެޗްޑީސިން ވަނީ ނިންމާފަ އެވެ.
ހުޅުމާލޭގައި އަޅާ އޯވާވޯޓާ ރެސްޓޯރަންޓުގެ މުހިންމު މައުލޫމާތު
- ޖާގަ - 10،519 އަކަފޫޓު
- ކުލި - ފުރަތަމަ ފަސް އަހަރު އަކަފޫޓަކަށް މަދުވެގެން 25ރ.
- އެކުއިޒިޝަން ކޮސްޓު - މަދުވެގެން 180،000ރ.
- ބިޑް ސެކިޔުރިޓީ - 500،000ރ.
- މުޅި ޕްރޮޖެކްޓަށް ހިނގާނެ ކަމަށް ލަފާކުރާ ހަރަދު - 22.4 މިލިއަން ރުފިޔާ
އޯވާ ވޯޓާ ރެސްޓޯރަންޓު އަޅަން ޕްރޮޕޯސަލް ހުށަހެޅުމުގެ ސުންގަޑިއަކީ އަންނަ ޖުލައި 21 އެވެ. މިއީ ސުންގަޑި ނަމަވެސް އަންނަ މަހުގެ 6 އިން ފެށިގެން އޮންލައިންކޮށް ޕްރޮޕޯސަލް ހުށަހެޅުމުގެ ފުރުސަތު ހުޅުވާލާނެ އެވެ.
ހުޅުމާލޭގައި ތަރައްގީކުރާ ފުރަތަމަ އޯވާވޯޓާ ރެސްޓޯރަންޓެއް ނޫން
ފާހަގަކޮށްލަން ޖެހޭ ގޮތުގައި މިއީ ހުޅުމާލޭގައި މިގޮތަށް ފެނުން މަތީގައި ތަރައްގީކުރާ ފުރަތަމަ އޯވާވޯޓާ ތަނެއް ނޫނެވެ. މީގެ ކުރިން ފޭސް ވަންއިން މެލޭޝިއާގެ މިރީ ހައުސިން ޑިވެލޮޕްމަންޓް ރިއަލްޓީއަށް ރެކްރިއޭޝަނަލް ވޯޓާ ތީމް ޕާކެއް އަޅަން ދިން ބިމާ ދިމާލުގައި އޯވާވޯޓާ ތަނެއް އެބަހުއްޓެވެ.
ހުޅުމާލޭ ވޯޓާ ތީމް ޕާކު: މިއީ އަމިއްލަ ބަޔަކަށް ހުޅުމާލޭން ދީފައިވާ އެންމެ ބޮޑު ބިން. -- ފޮޓޯ: އާއިމް ޒަމީރު/އަދަދު
މި މަޝްރޫއަކީ 2017 ގައި ފަށާ ގިނަވެގެން ދެ އަހަރެއްހާ ދުވަހުގެ ތެރޭގައި ނިންމާލެވޭނެ ކަމަށް ބުނި މަޝްރޫއެކެވެ. އެކަމަކު އިމާރާތްތަކުގެ ސްޓްރަކްޗަރަލަ މަސައްކަތް ނިންމުމަށް ފަހު ޕްރޮޖެކްޓު އޮތީ ހުއްޓިފަ އެވެ. އަދި މިއަދާ ހަމައަށް ޕްރޮޖެކްޓު ނިމޭނެ ކަމުގެ އެއްވެސް އަލިމަގެއް ނުފެނެ އެވެ.
މައްސަލަ ބޮޑުވެފައިވާ މި ޕްރޮޖެކްޓާ ގުޅޭ ބައެއް މައްސަލަތައް ސިވިލް ކޯޓުގައި ވެސް ހިނގަމުން އެބަދެ އެވެ.
