ރައިޕޫރް، އިންޑިއާ (ޖޫން 15) - އިންޑިއާގެ މެދުތެރޭ ޗައްޓިސްގަރް ސްޓޭޓުގައި ހަތަރު ދުވަސް ވަންދެން ފުން ވަޅެއްގައި ތާށިވެފައި ހުރި އުމުރުން 10 އަހަރުގެ ފިރިހެން ކުއްޖަކު ސަލާމަތްކޮށްފި އެވެ.
އަންގާރަ ދުވަހު ވަޅުން ސަލާމަތް ކުރި ރާހުލް ސަހޫއަކީ އިވުމާއި ވާހަކަ ދެއްކުމުގެ ނުކުޅެދުންތެރިކަން ހުންނަ ކުއްޖެކެވެ. ހުކުރު ދުވަހު މެންދުރު ގޭގެ ގޯތި ތެރޭގައި ކުޅެން އުޅެނިކޮށް އޭނާ ވެއްޓުނީ 80 ފޫޓު ފުން ވަޅަކަށެވެ.
އެ ކުއްޖާ ސަލާމަތް ކުރުމުގެ ގޮތުން ވަޅު ކައިރިން ބިން ގަރާހެއް ކޮނުމުގައި ސިފައިންނާއި ކާރިސާތަކާ ބެހޭ އޮފީހުގެ މުވައްޒަފުން ހަރަކާތްތެރިވި އެވެ.
"ހުރިހާ އެންމެންގެ ދުއާ އާއި ރެސްކިއު ޓީމުގެ ބުރަ މަސައްކަތާ އެކު ސަހޫ ސަލާމަތް ކުރެވިއްޖެ،" ޗައްޓިސްގަރްގެ ޗީފް މިނިސްޓަރު ބުޕޭޝް ބާގެލް ޓްވިޓާ މެދުވެރިކޮށް ވިދާޅުވި އެވެ.
ސަހޫގެ ގެ ހުންނަ ޑިސްޓްރިކްޓް އޮފީހުގެ އޮފިޝަލް ޖީތެންދްރަ ޝުކްލާ ވިދާޅުވީ "ކުއްޖާ ދިރި ހުރި ނަމަވެސް ވަރަށް ބޮޑަށް ވަރުދެރަވެފައިވާ" ކަމަށެވެ. އޭނާއަށް ފަރުވާ ދިނުމަށް ވަނީ "ސުޕާ ސްޕެޝަލިޓީ" ހޮސްޕިޓަލަކަށް ގެންގޮސްފަ އެވެ.
"ވަޅުގެ ތެރެއިން ހަރުފައެއް ފެނުނު ނަމަވެސް، އެ ކުއްޖާ ވަނީ ނަމޫނާ ހިތްވަރު ދައްކައި އޮޕަރޭޝަން ކުރިއަށް ދިޔަ އިރު ހަމަޖެހިގެން އެއްބާރުލުންދީފައި،" އޭނާ ވިދާޅުވި އެވެ.
އޮފިޝަލުން ބުނީ ކުއްޖާ ސަލާމަތް ކުރުމުގެ މަސައްކަތަށް ހުރަސް އެޅުނީ މޫސުން ގޯސްވުމާއި، ވިހަގަދަ ހަރުފަ އަދި ވެލިގަނޑުން ނިކުތް އެހެން ސޫފާސޫފީގެ ސަބަބުން ކަމަށެވެ.
ޖާންގްޖިރް ޑިސްޓްރިކްޓުގެ ފުލުހުންގެ ވެރިޔާ ވިޖޭ އަގްރަވާލް އޭއެފްޕީއަށް ވިދާޅުވީ އޮޕަރޭޝަންގެ ތެރޭގައި ކުއްޖާގެ ހާލަތާއި ހަރަކާތްތައް މޮނީޓާ ކުރަން ކެމެރާއެއް ބޭނުން ކުރި ކަމަށެވެ.
"އެ ކުއްޖާގެ އަޑު އިވުމާއި ވާހަކަ ދެއްކުމުގެ ނުކުޅެދުންތެރިކަމުގެ ސަބަބުން އިތުރު ގޮންޖެހުމާ ކުރިމަތިވި،" އޭނާ ވިދާޅުވި އެވެ.
ސަރުކާރުގެ ތަރުޖަމާނަކު ވިދާޅުވީ ސަހޫއަށް ސާފު ވައި ފޯރުކޮށްދިނީ އޮކްސިޖަން ހޮޅިއެއްގެ އެހީގައި ކަމަށާއި ބިންގަރާސް ކޮނުމުގައި އުނދަގޫވީ ވެލިގަނޑުގައި ބޮޑެތި ގާ ގިނަކަމުން ކަމަށެވެ.
އިންޑިއާގެ ދަނޑުވެރި އަވަށްތަކުގައި ފުން، ހަނި ވަޅުތައް ގިނައިން ހުންނަ އިރު، އެފަދަ ވަޅުތަކަށް ކުޑަކުދިން ވެއްޓި ވަރަށް ގިނައިން ހިތާމަވެރި ހާދިސާތައް ހިނގަ އެވެ.
ދެހާސް ނަވާރަ ވަނަ އަހަރު އުތުރު ޕަންޖާބް ސްޓޭޓްގައި ހަތަރު ދުވަސް ވަންދެން ހިންގި އޮޕަރޭޝަނަކަށް ފަހު އުމުރުން ދެ އަހަރުގެ ކުއްޖަކު ވަޅުން ނެގި އިރު އޮތީ މަރުވެފަ އެވެ.
ހަމަ އެ އަހަރު ހަރްޔާނާ ސްޓޭޓުގައި ދޮޅު އަހަރުގެ ކުއްޖަކު ދެ ދުވަސް ވަޅެއްގައި ތާށިވެފައި ހުއްޓައި ކާމިޔާބުކަމާ އެކު ސަލާމަތް ކުރި އެވެ. -- އޭއެފްޕީ --
