ނޫސްވެރިންގެ ޖަމިއްޔާ، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ގެ ރައީސް ހޮވުމަށް ބާއްވާ އެ ޖަމިއްޔާ އަހަރީ އާންމު ޖަލްސާ މި މަހުގެ 18 ވަނަ ދުވަހު ބާއްވަން ހަމަޖައްސައިފި އެވެ.
އެމްޖޭއޭއިން ބުނި ގޮތުގައި އެ ޖަމިއްޔާގެ އަހަރީ އާންމު ޖަލްސާ އޮންނާނީ އެ ދުވަހުގެ ހަވީރު 3:45 ގައި ސްޓެލްކޯގެ ސެމިނާ ހޯލުގަ އެވެ. ރައީސް ކަމަށް ޝައުގުވެރިކަން ފާޅުކުރުމަށް އެ ޖަލްސާގައި ހުޅުވާލުމަށްފަހު, އާންމު މެންބަރުންގެ ވޯޓެއް ނަގާނެ އެވެ.
އެ ޖަލްސާގައި އެ ޖަމިއްޔާގެ ރައީސް އިންތިހާބު ކުރުމަށް ނިންމީ، އެ މަގާމު މިހާރު ހުހަށް އޮތުމުންނެވެ. މަގާމު ހުސްވީ އެ މަގާމުގައި ކުރިން ހުންނެވި "ދައުރު" ނޫހުގެ ސީނިއާ އެސޯސިއޭޓް އެޑިޓަރު މުހައްމަދު ހަމްދޫން އިސްތިއުފާ ދެއްވުމާއެކު އެވެ.
ޖަމިއްޔާގެ ރައީސްގެ މަގާމަށް ނޫސްވެރިޔަކު އިންތިހާބު ކުރުމުގެ އިތުރަށް ޖަމިއްޔާގެ ހިންގާ ގަވާއިދަށް ގެނައުމަށް ހިންގާ ކޮމިޓީން ފާސްކޮށްފައިވާ އިސްލާހުތަކަށް ވޯޓަށް އެހުން ވެސް އެ ޖަލްސާގައި އޮންނާނެ އެވެ.
ހިންގާ ކޮމިޓީން ގަވާއިދަށް ގެނައި މައިގަނޑު ބަދަލަކަށް އޮތީ ވެސް އެ ކޮމިޓީގެ އެކުލެވުމެވެ. އެގޮތުން އަންހެން ދެ މެންބަރަކު ކޮމިޓީއަށް އިންތިހާބު ކުރާނެ އެވެ. އަދި ކުރިން ކޮމިޓީގައި ތިބޭ ޖަމިއްޔާގެ ފައުންޑަރުން ވަނީ އެކުލެވުމުން އުނިކޮށްފަ އެވެ.
ކޮމިޓީން ފާސްކުރި އެކުލެވުމުގައިވާ ގޮތުން ހިންގާ ކޮމިޓީގައި ތިބޭނީ ހަތް މެންބަރުންނެވެ. އެއީ ރައީސްއާއި، ނައިބު ރައީސްއާއި، ސެކްރެޓަރީ ޖެނެރަލްއާއި، ބަޖެޓް ސެކްރެޓަރީއާއި، އާންމު މެންބަރުންގެ ތެރެއިން މެންބަރަކާއި، އާންމު މެންބަރުންގެ ތެރެއިން އަންހެން ދެ މެންބަރެކެވެ.
ހިންގާ ގަވާއިދަށް އިސްލާހު ގެންނަން އެޖެންޑާ ކޮށްފައި އޮތުމުން، އަހަރީ އާންމު ޖަލްސާ ބޭއްވޭނީ ޖަމިއްޔާގެ ޖުމުލަ މެންބަރުންގެ ހަތަރުބައިކުޅަ އެއްބައި ބައިވެރިވެގެނެވެ. އެހެންވެ ވީހާ ވެސް ގިނަ މެންބަރުން ބައިވެރިވާން އެމްޖޭއޭއިން އެދެ އެވެ.
