މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސް ކަމުން ސަހުބާން ފަހުމީ ވަކިކުރަން އެ ކައުންސިލްގެ ބައެއް މެމްބަރުން ދެފަހަރެއްގެ މަތިން ކުރިން މަސައްކަތް ނާކާމިޔާބުވި ނަމަވެސް އޭނާ އެންމެ ފަހުން އެ މަގާމުން އިސްތިއުފާ ދެއްވައިފި އެވެ.
ޝަހުބާން އާއި އޭނާގެ ބޭބެ އަދި ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީގެ ހިއްސާ އޮންނަ ކުންފުންޏަކަށް މަނީ ލޯންޑަގެ ތުހުމަތު ކުރެވިގެން ޝަހުބާން ފުލުހަށް ހާޒިރު ކުރި މައްސަލާގައި އެމްއެމްސީގެ މެންބަރުން ނެރުނު ގަރާރުގައި ބުނީ އެއީ ގިނަ ނޫސްވެރިންގެ ކަންބޮޑުވުން އޮތް މައްސަލައެއް ކަމަށެވެ.
ސަހުބާން ވަނީ ކައުންސިލްގެ ރައީސްކަމުން އިސްތިއުފާދެއްވިކަން "އަދަދު" އަށް ކަށަވަރުކޮށްދެއްވައިފަ އެވެ.
އިސްތިއުފާ ދެއްވި ސަބަބެއް ކަމަށް އޭނާ ވިދާޅުވީ އޭނާއަށް ކޮށްފައިވާ ތުހުމަތާ ގުޅިގެން އަމިއްލަ ނަފްސާއާއި އާއިލާގެ ރައްކާތެރި ކަމަށް ކަމަށެވެ.
"އަޅުގަނޑުގެ ރިޔާސަތަށް ދަހިވެރިތިވެފައި ތިބި ބަޔަކު ކުރި މަސައްކަތުގެ ތެރެއިން އަޅުގަނޑުގެ އަމިއްލަ ނަފްސުގެ ރައްކާތެރިކަން މިއަދު ގެއްލިފައިވާ ކަމަށް ގަބޫލުކުރެވޭތީ އަޅުގަނޑު އިސްތިއުފާ ދިނީ،" ސަހުބާން ވިދާޅުވި އެވެ.
އޭނާ ވިދާޅުވީ ގާނޫނުގައި ބުނާ އިޖުރާއަތްތައް ފުރިހަމަ ކުރުމަށްފަހުވެސް އޭނާ އެ މަގާމުން ވަކި ކުރުމަށް ކުރި މަސައްކަތް ކާމިޔާބު ނުވި ކަމަށެވެ.
އެ މަގާމުގައި ހުންނަވައިފި ނަމަ، ކައުންސިލްގެ ޖަލްސާތަކާއި ކޮމިޓީތަކުގެ ބައްދަލުވުންތައް ކުރިއަށް ނުގެންދެވި ކައުންސިލްގެ މަސައްކަތް ހުއްޓިގެންދާނެ ކަމަށް ގަބޫލު ކުރައްވާ ކަމަށާއި އެކަމުގެ ނަތީޖާއެއްގެ ގޮތުން މިއަހަރުގެ ނޫސްވެރިކަމުގެ އިނާމު ވެސް ނުބޭއްވިދާނެކަމުގެ ބިރު ހީވެފައިވާތީ އިސްތިއުފާ ދެއްވީ ކަމަށް ވެސް ސަހުބާން ވިދާޅުވި އެވެ.
މީހުން ފަލީހަތް ކުރުމަކީ މިއަދު ރާއްޖޭގައި ވަރަށް ފަސޭހަ ކަމެއް ކަމަށާއި ނަމަވެސް ކުށެއްގެ ތުހުމަތުވާހާ މީހަކު މަގާމުން އިސްތިއުފާ ދިނުމަކީ ގަބޫލުކުރާ ކަމެއް ނޫން ކަމަށްވެސް އޭނާ ވިދާޅުވި އެވެ.
މިފަދަ އެތައް ސަބަބުތަކަކަށްޓަކައި ދިވެހި ނޫސްވެރިންނަށާއި މީޑިއާ ކައުންސިލަށް ވެސް އޮތް އެންމެ ރަނގަޅު ގޮތަކީ އޭނާ އިސްތިއުފާ ދެއްވުން ކަމަށް ގަބޫލުކުރައްވާތީ އިސްތިއުދާ ދެއްވީ ކަމަށްވެސް އޭނާ ވިދާޅުވި އެވެ.
ސަހުބާނަށް ކުރެވޭ ތުހުމަތު
ސަހުބާނާއި އޭނާގެ އެއްބަނޑު އެއްބަފާ ބޭބެ އަލްހާން ފަހުމީ ވަނީ "ކިންގްސް ފޮރެކްސް ޓްރޭޑިން" ކިޔާ ކުންފުންޏެއް މެދުވެރިކޮށް އާއްމުންގެ އަތުން ފައިސާ ނަގައިގެން އޮންލައިން ޓްރޭޑިން ކުރިޔަށް ގެންގޮސްފަ އެވެ.
މިދިޔަ މާޗް މަހުގެ 10 ވަނަ ދުވަހު، އެމްއެމްއޭ އިން ނުސީދާކޮށް ކިންގްސް ފޮރެކްސްއާ ދެކޮޅަށް ބަޔާން ނެރެ، ބީއެމްއެލްގައި ހުޅުވާފައިވާ ކިންގްސް ކެޕިޓަލް ހޯލްޑިންސްގެ އެކައުންޓްތައް ފްރީޒް ކުރީ، ކުޑަ މުއްދަތެއްގައި ބޮޑު ފައިދާއެއް ހޯދައިދޭނެ ކަމަށް ބުނެ މީހުންގެ އަތުން ފައިސާ ނަގައިގެން ބޮޑު ފްރޯޑެއް ހިންގަމުން އަންނަ ކަމަށް ތުހުމަތު ކޮށްފަ އެވެ.
އެ މައްސަލަ ފުލުހުން ތަހުގީގު ކުރަމުން އަންނައިރު ސަހުބާނާއި އަލްހާނު ވަނީ ފުލުހަށް ހާޒިރުކޮށް ސުވާލު ކޮށްފަ އެވެ.
